Aajanika Makani aaKabbuku Kamuswaangano waBuumi Amulimu Wesu
FEBRUARY 4-10
LUBONO LUZWA MUJWI LYALEZA | BAROMA 1-3
“Atuzumanane Kuyiisya Myoyo Yesu”
Kujana Wachita Biyeni Kuti Ukkale Kulaa Manjezeezya Aalikabotu?
6 Chipego eechi chamanjezeezya chijanika kubabelesi baJehova luzutu na? Atulange-lange majwi akasololelwaa muuya uusalala akalembwaa mwaapostolo Paulo aakuti: “Nkaambo bamasi batakwe Mulao nibacita camumoyo makani aamu-Mulao, elyo aba batakwe Mulao balibeda Mulao beni. Aba balatondezya mulimo wa-Mulao uulembedwe mumyoyo yabo, nkabela kuciindi nciconya manjezeezya aabo aalo alazumina, amiyeeyo yabo ilabapa milandu nanka kubalubusya.” (BaRoma 2:14, 15) Nikuba bantu batazi milawu yaJehova manjezeezya aabo apa kuti chimwi chiindi bachite kweendelana azyeelelo zyaLeza.
Kujana Wachita Biyeni Kuti Ukkale Kulaa Manjezeezya Aalikabotu?
8 Kujana wasala biyeni kweendelanaa manjezeezya? Bamwi balakonzya kusala zyakuchita kwiinda mukutobela mbobalimvwa ambobayeeya. Balakonzya kwaamba kuti: “Zili kabotu kweendelanaa manjezeezya aangu.” Ziyandwaa myoyo yesu zilakonzya kweena manjezeezya eesu. Bbayibbele lyaamba kuti: “Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede.” (Jeremiya 17:9) Nkinkaako, tatweelede kutobelezya ziyandwaa myoyo yesu. Pesi, tweelede kutobelezya zintu zibotezya Jehova Leza.
9 Ikuti nzitusala kazyeendelana amanjezeezya eesu ayiisidwe kabotu, tuyootondeezya kuti tulamuyoowa Leza kutali kuchita ziyandwaa myoyo yesu. Atubone chikozyano chaMweendelezi uusyomeka, Nehemiya. Nehemiya wakalaa cheelelo chakubweza mali achakubbadalisya mitelo kubantu bakuJerusalema. Pesi taakachita mbuboobo pe. Nkamboonzi? Nkaambo wakali kuyoowa kubisizya Jehova kwiinda mukudyamizya bantu baLeza. Wakaamba kuti: “Mebo teendakacita obo pe, nkaambo kakuyoowa Leza.” (Nehemiya 5:15) Kuyoowa Jehova Leza, Ndeende wesu wakujulu aamoyo woonse akuyoowa kumubisizya, kulayandikana. Kuyoowa kuli boobu kuyoopa kuti tuyande busolozi buzwa muJwi lyaLeza chiindi notusala zyakuchita.
Kuyanduula Lubono muJwi lyaLeza
w08 6/15 30 ¶5
Makani Aazwa Mubbuku lyaBaRoma
3:4. Kuti nzibaamba bantu kaziteendelani anzilyaamba Jwi lyaLeza, tuchita kuti ‘Leza abe wamasimpe’ kwiinda mukusyoma nzilyaamba Bbayibbele akuzitobelezya. Tulakonzya kugwasya bamwi kuti babone kuti Leza ngwamasimpe kwiinda mukusungwaala mumulimu wakukambawuka.
w08 6/15 29 ¶6
Makani Aazwa Mubbuku lyaBaRoma
3:24, 25—‘Chinunuzyo chaJesu Kristu’ chivumba biyeni ‘zibi zyakachitwa chiindi’? Businsimi bwakusaanguna bulembedwe muli Matalikilo 3:15, bwakazuzikizigwa mu33 C.E. chiindi Jesu naakajayigwa aachisamu chakupenzezya. (Gal. 3:13, 16) Jehova nakaamba businsimi oobu, kwakali mbuuli kuti mbadalo yachinunuzyo yakali yabbadalwa kale. Eezi zitondeezya kuti taakwe chintu chikonzya kukachizya Leza kuti azuzikizye makanze aakwe. Kabelesya chinunuzyo chaJesu Kristu, Jehova ulakonzya kulekelela zibi zyabana baAdamu batondeezya lusyomo. Chinunuzyo chipa kuti bantu bakapona Jesu katanaza aanyika bazoobusigwe.—Inc. 24:15.
FEBRUARY 11-17
LUBONO LUZWA MUJWI LYALEZA | BAROMA 4-6
“Leza Utondeezya Luyando Lwakwe Kulindiswe”
w11 6/15 12 ¶5
Leza Utondeezya Luyando Lwakwe Kulindiswe
5 Naakali kupandulula nkani eeyi, Pawulu wakati: “Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.” (Rom. 5:12) Eezi tulakonzya kuzimvwisisisya nkaambo Leza wakapa kuti tuzibe kuti buumi bwakatalika biyeni kwiinda mukupa kuti zilembwe aansi. Jehova wakalenga bantu babili, Adamu aEva. Mulengi ulimaninide nkinkaako Adamu aEva bakalimaninide. Jehova wakabapa mulawu ngubakeelede kuswiilila alubo wakababuzya kuti bakali kuyoofwa kuti baleka kuuswiilila. (Matl. 2:17) Nikuba boobo, bakasala kutaswiilila Leza, eezi zyakatondeezya kuti bakali kukaka kweendelezegwa aaLeza akuti abape milawu.—Dt. 32:4, 5.
w11 6/15 12 ¶6
Leza Utondeezya Luyando Lwakwe Kulindiswe
6 Adamu wakaba aabana kali waba aachibi, eezi zyakapa kuti bana bakwe boonse bazyalwe kabali aachibi akuti baswaane mapenzi aayetwa akaambo kachibi. Bana bakazyalwa teebakatyola mulawu waLeza achaali mbuuli mbaakachita Adamu alubo taakwe mulawu ngubakali bapegwa. (Matl. 2:17) Nikuba boobo, bana baAdamu bakakona chibi. Eezi zyakapa kuti chibi alufu zyeendelezye kusikila chiindi Leza naakapa maIsrayeli mulawu. Mulawu wakatondeezya aantanganana kuti maIsrayeli bakali aachibi. (Bala BaRoma 5:13, 14.) Chibi nchitwakakona tulakonzya kuchikozyanisya aabulwazi mbutukonzya kukona kubazyali besu. Nikuba kuti bamwi bana mumpuli balakonzya kukona bulwazi kubazyali babo, pesi bamwi balakonzya kupona kabatakwe bulwazi oobo. Teembukubede pe atala achibi. Bantu boonse bakakona chibi kuzwa kuli Adamu, eezi zipa kuti tufwe. Penzi eeli liyoomana na?
w11 6/15 13 ¶9-10
Leza Utondeezya Luyando Lwakwe Kulindiswe
9 Tweelede kwaamvwisisisya biyeni majwi aachiGrikki aakasandululwa kuti ‘baambwa kuti baliluleme’? Umwi sikusandulula Bbayibbele wakalemba kuti: “Mabala aaya maambilambali aabelesegwa kunkuta. Aamba kuchincha nzila Leza njamubonaayo muntu kutali kuti muntu nguwe uungawachincha . . . Maambilambali aaya atondeezya kuti Leza uli mbuuli mubetesi wasala kulekelela muntu wabisya, weetwa kunkuta yakwe yachikozyano.”
10 Niinzi chipa kuti “oyo uubeteka nyika yoonse” akonzye kulekelela muntu wabisya? (Matl. 18:25) Chakusaanguna nchaakachita Leza, nkutuma Mwanaakwe simuzyalwaalikke kuti aze aanyika. Jesu wakachita kuyanda kwaWisi munzila iimaninide nikuba kuti wakali kupenzegwa, kusampawulwa akuumwa. Wakazumanana kusyomeka kusikila naakafwa aachisamu chakupenzezya. (Heb. 2:10) Kwiinda mukupa buumi bwakwe bumaninide, Jesu wakapa chipayizyo chakali kukonzya kunununa bana baAdamu kuzwa kuchibi alufu.—Mt. 20:28; Rom. 5:6-8.
Kuyanduula Lubono muJwi lyaLeza
w08 6/15 29 ¶7
Makani Aazwa Mubbuku lyaBaRoma
6:3-5—Chaambaanzi kubbabbatizigwa “muli-Jesu Kristo” akubbabbatizigwa “mulufu lwakwe”? Batobeli baKristu babbabbatizigwa muli Jesu chiindi Jehova nabananika amuuya uusalala. Ngababa chipanzi chambungano iibumba mubili waKristu, Jesu kali mutwe wambungano. (1 Kor. 12:12, 13, 27; Kol. 1:18) Ooku nkuko kubbabbatizigwa muli Kristu Jesu. Alubo maKristu bananikidwe ‘babbabbatizigwa mulufu lwaKristu’ mukuti bapona buumi bwakulipeda alubo tabakwe bulangilizi bwakupona aanyika. Nikuba kuti lufu lwabo talunununi bantu pesi luleendelana alwaJesu nkaambo balalipeda mbuuli mbaakachita Jesu. Kubbabbatizigwa muli Kristu kuzuzikizigwa chakumaninina chiindi maKristu bananikidwe nibafwa akubusigwa kuti bakapone kujulu.
w14 6/1 11 ¶1
Mbuubuli Bulangilizi Buliwo Atala Ababbululu Besu Bakafwa?
Bantu bataluleme batakabusigwe, bayoobetekwa kweendelana azintu nzibakachita kabatanafwa na? Peepe. Lugwalo lwaBaRoma 6:7 lutii: ‘Nkaambo muntu wafwa waangununwa kuchibi chakwe.’ Bantu bataluleme ngababbadala mulandu wabo chiindi nibafwa. Nkinkaako, bantu bataluleme bayoobetekwa kweendelana azintu nzibayoochita kabali babusigwa kutali nzibakachita kabatanafwa. Eezi ziyoobagwasya biyeni?
FEBRUARY 18-24
LUBONO LUZWA MUJWI LYALEZA | BAROMA 7-8
“‘Ulikulangilila Chakuyandisisya’ Na?”
w12 7/15 11 ¶17
Lwaangunuko Lwachoonzyo Luzwa Kuli Jehova
17 Chiindi naakali kwaambuula atala alwaanguluko Jehova ndwabambilide bakombi bakwe baanyika, Pawulu wakalemba kuti: “Zilenge zilalangila cakuyandisisya kuyubununwa kwabana ba Leza.” Alubo wakayungizya kuti: “Zilenge azyalo ziyakwaangununwa kubuzike bwakubola akuba alwaanguluko lwabulemu bwabana ba Leza.” ( Rom. 8:19-21, NW) “Zilenge” mbantu bajisi bulangilizi bwakuyoopona aanyika, batakajane mpindu akaambo ‘kakuyubununwa’ kwabana baLeza bananikidwe aamuuya uusalala. Kuyubununwa kuyootalika “bana” baakubusigwa kabali aamibili yamuuya, kabalikubelekaamwi aKristu kusalazya nyika eeyi kububi akufutula ‘bankamu mpati’ akubanjizya munyika mpya.—Ciy. 7:9, 14.
w12 3/15 23 ¶11
Bulangilizi Mbutulaabo Bupa Kuti Tubotelwe
11 Jehova wakapa bantu ‘bulangilizi’ chiindi naakasyomezya kuti uyootufutula ‘kumuzoka wachiindi’ uutegwa Saatani Dyabbulosi kwiinda ‘mulunyungu’ lwakasyomezegwa. (Ciy. 12:9; Matl. 3:15) Jesu Kristu nchipanzi chakusaanguna ‘chalunyungu’ oolu. (Gal. 3:16) Kwiinda mulufu akubusigwa kwakwe, Jesu wakapa ntalisyo iisimide yabulangilizi bwabantu kuti bakaangununwe kubuzike bwachibi alufu. Kuzuzikizigwa kwabulangilizi oobu kuleendelana ‘akuyubununwa kwabana baLeza.’ MaKristu bananikidwe babumba chipanzi chabili ‘chalunyungu’ alubo ‘bayooyubununwa’ chiindi baakugwasyania aaKristu kuti banyonyoone nyika eeyi yeendelezegwa aaSaatani. (Ciy. 2:26, 27) Eezi ziyooyeta lufutuko kuli bambelele zimwi, batanooli bayinda mumapenzi mapati.—Ciy. 7:9, 10, 14.
w12 3/15 23 ¶12
Bulangilizi Mbutulaabo Bupa Kuti Tubotelwe
12 “Zilenge” naakuti bantu bayoowangunuka muBweendelezi bwaKristu bwaMinyaka Iili Chuulu! Aachiindi eecho, “bana ba Leza” ‘bayooyubununwa’ kwiinda mukubeleka kabali bapayizi aKristu, kabapa bantu zilongezyo ziba akaambo kachipayizyo chachinunuzyo chaJesu. Bwaakweendelezya Bwaami bwakujulu, “zilenge” naakuti bantu bayootalika kwaangununwa kuzintu zyeetwa aachibi alufu. Mukuya kwachiindi, bantu basyomeka ‘bayoowangununwa kubuzike bwakubola.’ Kuti bantu aabo bazumanana kusyomeka kuli Jehova kwaminyaka iili Chuulu, amumusunko uuyooba kumamanino aabweendelezi bwaMinyaka iili Chuulu, mazina aabo ayoolembwa kwachiindi choonse ‘mubbuku lyabuumi.’ Eezi ziyoopa kuti bakanjile ‘mulwaanguluko lwabulemu lwabana baLeza.’ (Ciy. 20:7, 8, 11, 12) Bulangilizi oobu mbubotu choonzyo.
Kuyanduula Lubono muJwi lyaLeza
w17.06 3
Muchiyeeyede Na?
Muntu ‘uubikkila maanu kuzintu zyanyama’ usiyene biyeni amuntu ‘uubikkila maanu kuzintu zyamuuya’? (Rom. 8:6)
Muntu uubikkila maanu kuzintu zyanyama, uchita zintu nzyayanda alubo ukkala kaambuula atala azintu zyakumubili. Muntu uubikkila maanu kuzintu zyamuuya, uchita zintu ziyandwa aaLeza, ulaamaboneno aali mbuuli aaLeza alubo uzulwidwa aamuuya uusalala. Kubikkila maanu kuzintu zyanyama, kweeta lufu pesi kubikkila maanu kuzintu zyamuuya kweeta buumi aluumuno.—w16.12, pp. 15-17.
w09 11/15 7 ¶20
Nkombyo Zyesu Zitondeezya Mbutubede
20 Chimwi chiindi tulakonzya kubula zyakwaamba chiindi nituli kukomba. Mwaapostolo Pawulu wakalemba kuti: ‘Mbubonya obo awalo Muuya ulatugwasya mukuleezya kwesu. Nkaambo tatuzi pe mbutweelede kukomba, pele Muuya mwini ulatukombelezezya amitongelo iitaambiki. Nkabela oyo [Leza] uulanga-langa myoyo yabantu ulizi nzyuukombelezezya Muuya.’ (Rom. 8:26, 27) Jehova wakapa kuti kulembwe nkombyo zyiingi muBbayibbele. Kuti twamukumbila katutobelezya nkombyo eezi ulatumvwa. Leza ulituzi alubo ulazimvwisisisya zintu zili muBbayibbele zyakazulwidwa aamuuya wakwe uusalala. Jehova ulazisandula nkombyo zyesu kuti muuya uusalala ‘watukombelezezya’ naakuti kutukumbilila. Nkinkaako, kuliziba kabotu Jwi lyaLeza, kuyootugwasya kuti tuzibe zintu nzituyanda kwaamba chiindi nituli kukomba.
FEBRUARY 25–MARCH 3
LUBONO LUZWA MUJWI LYALEZA | BAROMA 9-11
“Chikozyano chaMusamu wama-Olifa”
w11 5/15 23 ¶13
‘Busongo bwaLeza Tabwaambiki’
13 Mwaapostolo Pawulu wakakozyanisya aabo bali muchipanzi chabana baAbrahamu amitabi yamusamu wama-olifa. (Rom. 11:21) Musamu wama-olifa wiiminina kuzuzikizigwa kwamakanze aaLeza kwiinda muchizuminano nchaakachita aAbrahamu. Muyanda wamusamu ooyu ulasalala alubo wiiminina Jehova uupa buumi kumaIsrayeli bakumuuya. (Is. 10:20; Rom. 11:16) Chisiko chiiminina Jesu, chipanzi chakusaanguna mubana baAbrahamu. Mitabi yiiminina “mweelwe woonse” wabaabo bali muchipanzi chabili chabana baAbrahamu.
w11 5/15 24 ¶15
‘Busongo bwaLeza Tabwaambiki’
15 Niinzi Jehova nzyaakachita kuti azuzikizye makanze aakwe? Pawulu upandulula kuti mitabi yamu-olifa wamusokwe yakalumatizigwa aamusamu wama-olifa wakali mumuunda kuti ibweze busena bwamitabi yakagonkwa. (Bala BaRoma 11:17, 18.) Nkinkaako, maKristu bakananikidwe aamuuya bazwa kuzisi zisiyene-siyene mbuuli bakali kuzwa kuRoma, bakali mbuuli kuti bakalumatizigwa aamusamu wama-olifa wakukozyanisya. Eezi zyakapa kuti babe chipanzi chabana baAbrahamu. Bakali mbuuli mitabi yamu-olifa wamusokwe, wakatali kukonzya kujana mweenya wakuba muchizuminano chipati chili boobu. Pesi Jehova wakajula nzila yakuti maKristu aaba babe maJuda bakumuuya.—Rom. 2:28, 29.
w11 5/15 25 ¶19
‘Busongo bwaLeza Tabwaambiki’
19 Makanze aaLeza atala ‘aIsrayeli waLeza’ alikuzuzikizigwa munzila iigambya. (Gal. 6:16) Pawulu wakaamba kuti “bazoofutuka ba-Israyeli boonse.” (Rom. 11:26) Muchiindi chaLeza cheelede, “ba-Israyeli boonse,” nkukwaamba kuti namba iikkwene yamaIsrayeli bakumuuya, bayooyendelezya kabali baami abapayizi kujulu. Taakwe chikonzya kupa kuti makanze aaJehova atazwidilili.
Kuyanduula Lubono muJwi lyaLeza
w13 6/15 25 ¶5
Zumizya Lulayo lwaJehova Kuti Lukubumbe
5 Niinzi chichitika kuti bantu bakaka kubumbwa aaMubumbi Mupati? Leza uwabelesya biyeni manguzu aakwe aabweendelezi? Yeeya chikonzya kuchitika kuti bulongo kabutacheeleli kubelesegwa kumulimu walikuyanda kuchitwa. Sikubumba ulakonzya kubumba chimwi chintu kabelesya bulongo mbuboobo naakuti kubusowa. Chiindi chiingi, sikubumba nguwe uupegwa mulandu kuti bulongo bwapambanika. Teembukubede pe kuMubumbi wesu. (Dt. 32:4) Kuti muntu wakaka kubumbwa aaJehova, penzi nga lili kumuntu ooyo kutali kuli Jehova pe. Mbuuli mbachita mubumbi, Jehova utondeezya nguzu zyakwe kwiinda mukuchincha-chincha mbabajata bantu kweendelana ambubachita chiindi nababumba. Bantu bazumina kubumbwa aaJehova balagwasikana. Muchikozyano, maKristu bananikidwe aamuuya ‘nzilongo zyaluse’ zyakabumbwa kuba ‘zilongo zibotu.’ Kuli lumwi lubazu, aabo bakazya Leza achaali bayooba ‘zilongo zyeelelwa bukali akubambilwa lunyonyooko.’—Rom. 9:19-23.
it-1 1260 ¶2
Bbivwe
Kusungwaalila Zintu Zitagwasyi. Umwi ulakonzya kusungwaalila zimwi zintu pesi katazi pe kuti tazimubotezyi pe Leza. Eezi nzizyo zyakachitikila maJuda biingi bamumwaanda wamunyaka wakusaanguna. Bakali kubonaanga kutobelezya Mulawu waMusa kwakali kupa kuti babe bantu baluleme. Nikuba boobo, Pawulu wakabatondeezya kuti busungu bwabo teebwakali kugwasya nkaambo teebakalikwe luzibo lwakasimpe. Nkinkaako, teebakali kukonzya kuba bantu baluleme mumeso aaLeza. Bakeelede kubona mpubakali kukachilwa akuti baboole kuli Leza kuchitila kuti bajane bululami akwaangununwa kuzwa kuMulawu kwiinda muli Kristu. (Rom 10:1-10) Sawulu wakuTarso nguumwi wabo nkaambo wakalisungweete mukuchita zintu zitagwasyi zyakuti wakali “kupenzesya loko imbungano ya-Leza akwiindinganya.” Kwiinda mukusungwaalila kubamba Mulawu, wakali kubonaanga ‘taakali kubisya’ pe. (Gal 1:13, 14; Flp 3:6) Kusungwaalila ziyanza zyachiJuda nkwaakali kuchita, teekwakali kugwasya pe. Akaambo kakuti wakali aamoyo mubotu, Jehova wakamufwida luzyalo kwiinda muli Kristu kuti abone bukombi bwakasimpe.—1Tim 1:12, 13.