CHIIYO 2

Kwaambuulaanga Ulikuzuwa

2 BaKorinto 2:17

CHIFWIINSYO: Wambuula munzila iimvwisisika, iitondeezya bulemu alubo iitondeezya mbulimvwa atala abaswiilizi amakani ngulikwaambuula.

Komba saansi kutanalibambila. Komba kuti ubikkile maanu kumakani nguyanda kwaambuula kutali kulinduwe. Yeeyesesya atala atwaambo tupati ntuyanda kwaamba. Pandulula makani mumajwi aako kutali kubala zilembedwe aapepa.

Kuti kakuli lugwalo nduyanda kubala muBbayibbele naakuti mulilimwi bbuku, azibe kabotu makani kuchitila kuti waabale munzila iimvwisisika. Kuti kulikubala majwi akaambwa abantu, abale munzila iisiyene aamwi majwi pesi utayindilizyi.
Waambuula kazizwa aansi amoyo. Yeeyesesya kuti nkamboonzi baswiilizi nibeelede kumvwa makani aayo. Babikkile maanu. Kuti wachita oobo, mbuyimvwi, mbunyanyaasya mubili ambuboneka kubusyu kuyootondeezya kuti ulasangalizya akuti ulazisyoma nzulikwaamba.

Utapi kuti kaambo kako katamvwisisiki akaambo kakwaambuula zintu zisesya, zitagwasyi. Yeeya mbaayandikana makani ngulikwaambuula kwiinda mukwaambuula kabotu akubelesya mabala aamvwisisika.
Langa baswiilizi. Balange kumeso baswiilizi kuti kuchita oobo kakutapi kuti babe aabweeme. Nulikupa nkani, langa muswiilizi umwi awumwi kumeso, kutali kubalanga kabali kabunga.