Aajanika Makani aaKabbuku Kamuswaangano waBuumi Amulimu Wesu
NOVEMBER 2-8
LUBONO LUZWA MUJWI LYALEZA | KULONGA 39-40
“Mozesi Wakatobelezya Malayilile”
w11 9/15 27 ¶13
Jehova Ulikwizi Na?
Mozesi wakalisiyene aKkora nkaambo wakali “mubombe kapati kwiinda bantu boonse ibakali anyika.” (My. 12:3) Wakatondeezya kuba muntu mubombemoyo alubo uulibombya kwiinda mukuzumanana kutobela malayilile aaJehova. (Kul. 7:6; 40:16) Taakwe chitondeezya kuti Mozesi wakali kukazya nzila Jehova njaakali kuchitaayo zintu naakuti kunyema chiindi Jehova naakali kumubuzya zyakuchita. Muchikozyano, Jehova wakamupa malayilile atala akuyaka tente lyakukombela mane kusikila kutuntu tuniini twakeelede kuchitwa, tuli mbuli musyobo wantambo anamba yazyaanzikilo zyakeelede kubelesegwa kuti apange moombe wachisitilizyo. (Kul. 26:1-6) Kuti mulangizi mumbunga yaLeza wamupa malayilile aatamvwisisiki, mulakonzya kukataazikana zimwi ziindi. Nikuba boobo, Jehova mulangizi uumaninide, ulabapa milimu babelesi bakwe alubo ulabasyoma. Chiindi napa malayilile miingi, ulaatwaambo tubotu tupa kuti achite oobo. Pesi amubone kuti Mozesi taakwe naakanyemena Jehova akaambo kakumupa malayilile miingi alubo taakwe naakayeeya kuti Jehova taakali kumulemeka naakuti kumwiima lwaanguluko lwakuchita zintu. Muchiindi chaboobo, Mozesi wakabikkila maanu kubona kuti babelesi “bakacita mbubonya oobo.” (Kul. 39:32) Eezi zitondeezya kuti wakali kulibombya! Mozesi wakalizi kuti ooyu wakali mulimu waJehova akuti wakali kubelesegwa biyo mumulimu ooyo.
w05 7/15 27 ¶3
Ulasyomeka Na Muzintu Zyoonse?
Lugwalo lwa Bahebrayo 3:5 lwaamba kuti: “Musa wakali kusyomeka kali mugwasyi.” Niinzi zyakapa kuti Mozesi abe muntu uusyomeka? Chiindi naakapegwa malayilile aambulyakeelede kuyakwa tente lyakukombela aambuzyakeelede kubambwa zintu, Bbayibbele lyaamba kuti: “Musa wakacita zyoonse Jehova nzyaakamulailila. Wakacita mbubonya oobo.” (Kulonga 40:16) Mbutuli bakombi baJehova, andiswe tweelede kutondeezya kuti tulasyomeka kwiinda mukuswiilila Jehova. Eezi zyaamba kuti tweelede kuzumanana kusyomeka kuli Jehova nikuba katulikusunkwa naakuti nituli mubuyumu-yumu. Nikuba boobo, kuzunda masunko mapati teenkuko kutondeezya kuti tulasyomeka. Jesu wakati: “Imuntu uusyomeka mutuntu tusyoonto ulasyomeka amuzintu zipati, alimwi imuntu uutaluleme mutuntu tusyoonto taluleme amuzintu zipati.” (Luka 16:10) Tweelede kusyomeka nikuba muzintu zibonekaanga nziniini.
Kuyanduula Lubono muJwi lyaLeza
it-2 884 ¶3
Chikumba
Mbubakazijana maIsrayeli. Nikuba kuti zikumba zyabanyama kujayilinkene kuti zyakali kujanika kumasena aakuArctic akuAntarctic pesi zimwi zikumba zyakali kujanika kumasena aapya. Mazubaano banyama bali aazikumba zyakali kubelesegwa chiindi bajanika kumasena aali aafwiifwi aLwizi lwaMediterranean akulizimwi ndawu kujanika maanzi aakasaala. Kwaminyaka myiingi yayinda, bantu bakabajaya loko banyama aaba alubo chiindi nikwakali kulembwa Bbayibbele, kulakonzeka kuti banyama bakali aazikumba zyakali kubelesegwa aabantu bakali kujanika kuMediterranean akuLwizi Lusalala. Mumunyaka wa1832, bbuku lipandulula makani aamuBbayibbele lyakalembwa aaCalmet lyakaamba kuti: “Zikumba zyabanyama zilajanika mutusuwa tuli muLwizi Lusalala aafwiifwi akuchilundu chaSinayi.”—Alubo langa bbuku litii, The Tabernacle’s Typical Teaching, lyakalembwa aaA. J. Pollock, London, p. 47.
w15 7/15 21 ¶1
Kuli Muntu Uulandaba Na Anzituchita?
Chiindi tente lyakukombela nilyakamana, kkumbi “lyakatalika kuvwumba tente lyakuswaanganina alimwi bulemu bwa Jehova bwakazuzya tente lyakukombela.” (Kul. 40:34) Eezi zyakatondeezya kuti zyakachitika zyakatambulika kuli Jehova! Ubonaanga Bbezaleli aOholiyabbu bakamvwa biyeni aachiindi eecho? Nikuba kuti mazina aabo taakalembwa aazintu nzibakapanga, kweelede kuti bakakkutisikana akaambo kakuziba kuti Leza wakabalongezya mumulimu ngubakachita. (Tus. 10:22) Muminyaka yakatobela, nisimpe kuti bakali kubotelwa mumyoyo nibakabona kuti zintu nzibakapanga zyakali kubelesegwa mumulimu waJehova. Baakubusigwa munyika mpya, Bbezaleli aOholiyabbu bayoobotelwa loko baakuziba kuti tente lyakukombela lyakabelesegwa mubukombi bwakasimpe kwaminyaka iisika ku500!
NOVEMBER 9-15
LUBONO LUZWA MUJWI LYALEZA | LEVITIKO 1-3
“Makanze Aazipayizyo”
it-2 525
Zipayizyo
Zipayizyo zyuumpwa. Zipayizyo zyuumpwa zyakali kupegwa kuli Leza aluo teekwakali kuzumizigwa pe kuti muntu abweze imwi nyama. (Kozyanisya a Bab 11:30, 31, 39, 40.) Zipayizyo eezi zyakali kupegwa kuli Jehova kuchitila kuti bantu batambulike kulinguwe akuti balekelelwe zibi. Jesu Kristu wakalipeda mbuli ‘chipayizyo chuumpwa’ kuli Jehova kwiinda mukulipeda munzila iimaninide.
it-2 528 ¶4
Zipayizyo
Zipayizyo zyamayila. Zipayizyo zyamayila zyakali kupegwa aamwi azipayizyo zyalumvwanano, zipayizyo zyuumpwa, zipayizyo zyazibi kuswaanizya azipayizyo zyamichelo mitaanzi alubo chimwi chiindi zipayizyo zyamayila zyakali kupegwa aazilikke. (Ku 29:40-42; Le 23:10-13, 15-18; My 15:8, 9, 22-24; 28:9, 10, 20, 26-28; chaand 29) Zipayizyo eezi zyakali kutondeezya kuti balamulumba Leza kuti wabalongezya akuti bali aaluumuno. MaIsrayeli nibakali kupa zipayizyo eezi bakali kuzitila mafuta atununkilizyo. Zipayizyo zyamayila zyakali muchiimo chafulawa mbotu, mayila aayokedwe alubo aakandidwe kabotu aswaanizidwe aamafuta. Zimwi zipayizyo zyamayila zyakali kubikkwa aachipayililo chazipayizyo zyuumpwa, mpawo zimwi zyakali kuligwa aabapayizi alubo chiindi nikwakali kupegwa zipayizyo zyalumvwanano sikupa chipayizyo eecho wakali kulya anguwe. (Le 6:14-23; 7:11-13; My 18:8-11) Zipayizyo zyamayila zyakali kutolwa kuchipayililo teezyakeelede kubikkwa busweezyo naakuti buchi (buchi bulikwaambwa aawa mbwamusinza wankuyu naakuti musinza wamichelo) kuchitila kuti zitafufumuki.—Le 2:1-16.
it-2 526 ¶1
Zipayizyo
Zipayizyo zyalumvwanano (naakuti zipayizyo zyaluumuno). Zipayizyo zyalumvwanano zyakali kupegwa kuchitila kuti bantu babe aaluumuno aJehova. Sikupa chipayizyo eecho kuswaanizya ampuli yakwe bakali kulida chipayizyo eecho (mulubuwa lwatente lyakukombela; kweendelana azyakali kuchitwa chiindi, kwakali kuyakwa zivwuuka mukati kakketeni lyakazyungulukide lubuwa; alubo mutempele kwakali maanda aakulida). Mupayizi wakali kuumpa chipayizyo eecho wakali kujana chimwi chipanzi alubo bamwi bapayizi bakali kubeleka mubuzuba oobo bakali kujana chimwi chipanzi. Jehova wakali kubotelwa naakali kubona busi bwamafuta aakali kuumpwa. Ganzi lyiiminina buumi, lyakali kupegwa kuli Leza. Munzila eeyi, bapayizi, basikupa chipayizyo kuswaanizya aaJehova kwakali mbuli kuti bakali kulyaamwi chiindi nikwakali kupegwa chipayizyo eecho. Eezi zyakali kutondeezya kuti bantu bakali aaluumuno anguwe. Muntu wakali kulya chipayizyo eechi kasofweede (kufumbwa kusofwaala kwakalembedwe muMulawu) naakuti wakali kulya nyama eeyo (kayili yabola) kachili chiinda chiindi chakuti ilyigwe wakali kujayigwa. Kulya chipayizyo chalumvwanano muntu kasofweede naakuti kulya chintu chayanda kubola kwakali kutondeezya kuti muntu ooyo taakali kuzilemeka pe zintu zisalala.—Le 7:16-21; 19:5-8.
Kuyanduula Lubono muJwi lyaLeza
w04 5/15 22 ¶1
Makani Aajanika muBbuku lyaLevitiko
2:13—Nkamboonzi munyo nwaakeelede kulungwa ‘muzipayizyo zyoonse’? Eezi teezyakali kuchitilwa kuti zipayizyo zinone. Munyo ubelesegwa kuti chintu chitafwambaani kubola. Kulakonzeka kuti zipayizyo zyakali kulungwa munyo nkaambo munyo wiiminina kutapambanika naakuti kutabola.
it-1 813
Mafuta
Kaambo kakapa kuti kupegwe mulawu. Mafuta chakali chipanzi chakali kuyandikana loko aamunyama. Kupayizya mafuta aamunyama kwakali kutondeezya kuti muntu wakali kupayizya wakalizi kuti mafuta ngaaJehova. Alubo zyakali kutondeezya kuti sikupa chipayizyo eecho wakali kumulumba Jehova akaambo kazintu nzyaakalaazyo alubo kwakali kutondeezya kuti bantu aabo bakali aachiyandisyo chakupa Jehova zintu zibotu. Mafuta akali kutondeezya mbubakalipedelede kuli Jehova maIsrayeli, chiindi mafuta naakali kuumpwa, busi bwakali kusuka bwakali mbuli ‘chakulya’ alubo bwakali ‘bweema bununkilila’ kulinguwe. (Le 3:11, 16) Nkinkaako, maIsrayeli teebakali kuzumizigwa pe kuti balye mafuta nkaambo akali kupegwa kuli Jehova. Muntu wakali kulya mafuta wakali kujayigwa.
w04 5/15 22 ¶2
Makani Aajanika muBbuku lyaLevitiko
3:17. Mbukunga mafuta chakali chipanzi chiyandikana loko kuli Jehova, maIsrayeli nibakali kukasigwa kuti bataalyi kwakali kubayeezya kuti zipanzi ziyandikana nzizya Jehova. (Matalikilo 45:18) Eezi zituyiisya kuti tweelede kupa Jehova zintu zibotu loko.—Tusimpi 3:9, 10; Bakolose 3:23, 24.
NOVEMBER 16-22
LUBONO LUZWA MUJWI LYALEZA | LEVITIKO 4-5
“Pa Jehova Zintu Zibotu”
it-2 527 ¶9
Zipayizyo
Zipayizyo zyazibi. Zipayizyo zyazibi zyakali kupegwa chiindi muntu naakali kubisya. Zipayizyo zyazibi zyakalisiyene azimwi zipayizyo nkaambo zipayizyo zyazibi zyakali kutondeezya kuti muntu wabisya wakeelede kubambulula chibi nchaakachita. Zyakali kupegwa chiindi muntu naakali kutyola mulawu waJehova naakuti mulawu wachisi. Chipayizyo chazibi chakali kupegwa kutondeezya kuti muntu ooyo wazumina kuti wabisya naakuti watyola mulawu wachizuminano alubo wakali kugwasya kuti sikubisya aangunuke kuchibi nchaachita.—Kozyanisya a Is 53:10.
w09 6/1 26 ¶3
Ulabikkila Maanu Alubo Ulizizi Nzitutakonzyi Kuchita
Mulawu wakali kuti: “Ikuti katacikonzyi kuleta mbelele, nkokuti weelede kuletela Jehova nziba zyobilo naa bana bankwilimba bobilo.” (Vesi 7) Majwi aakuti “ikuti katacikonzyi” alakonzya kusandululwa kuti “ikuti kuboko kwakwe kakutasikili.” MuIsrayeli wakali kufwaba loko zyakuti taakali kukonzya kujana mbelele, Leza wakali kuchitambula chipo nchaakali kukonzya kumupa chaamba nziba zibili naakuti nkwilimba zibili.
w09 6/1 26 ¶3
Ulabikkila Maanu Alubo Ulizizi Nzitutakonzyi Kuchita
Kutegwani kumuntu wakatali kukonzya kupa nikuba nziba zibili? Mulawu wakali kuti: “Nkokuti weelede kuleta cipaanzi cakkumi caefa [nkomesi zili 8 naakuti zili 9] cafulaulu mubotu kacili cituuzyo cazibi kucibi ncaakacita.” (Vesi 11) Kumuntu wakali kufwaba loko, Jehova wakali kuzitambula zipayizyo zyazibi nikuba kuti taakwe ganzi lyatilwa. Muchiindi chamaIsrayeli, kufwaba teekwakali kukachizya bantu kuti balekelelwe zibi naakuti babe aaluumuno aLeza.
Kuyanduula Lubono muJwi lyaLeza
w16.02 30 ¶14
Yiya Kubakombi baJehova Bakali Kusyomeka
Andinywe mulakonzya kusaanguna kusyomeka kuli Jehova akusyomeka kuli bamwi kwiinda mukuba aaluzyalo. Muchikozyano, kulakonzeka kuti kamuli aabumboni bwakuti umwi mukombima wakachita chibi chipati. Mulakonzya kusunkwa kuti mutondeezye kuti mulasyomeka kumuntu ooyo, kapati kuti kali mweenzinyokwe naakuti wamumpuli. Pesi mulizi kuti kusisa chibi chipati kutondeezya kutasyomeka kuli Leza. Alubo mulizi kuti kusyomeka kuli Jehova kuyandikana loko kwiinda zyoonse. Mweelede kuswiilila Jehova mbuli Natani, pesi kumwi kamutondeezya kuti muli aaluzyalo kumukombima. Mweelede kumubuzya kuti akumbile lugwasyo kubaalu akuti afwambaane kuchita oobo. Kuti taababuzya baalu, zyaamba kuti ndinywe mweelede kubabuzya. Kuchita oobu kutondeezya kuti mulasyomeka kuli Jehova. Alubo nga mulikutondeezya kuti mumufwida luzyalo mukombima nkaambo baalu balakonzya kumugwasya kutegwa abe aabweenzinyina bulikabotu aJehova. Baalu balamululamika munzila yalubomba.—Bala Levitiko 5:1; Bagalatiya 6:1.
it-1 1130 ¶2
Kusalala
Banyama Azilyo. Zintu zyoonse zyakali kusalala kuli Jehova zyakeelede kulemekwa. Muchikozyano, kwakali mulawu wakali atala akupa chakkumi. Kuti muIsrayeli wabikka aambali zimwi zilyo kuti akape chakkumi mpawo umwi wamumpuli wabweza zilyo eezyo akuzibelesya naakuti kuzijika katazi kuti zibambilidwe kuyoopegwa kuli Leza, munaazilyo wakali aamulandu wakutalemeka zintu zisalala zyaLeza. MuMulawu kwakalembedwe kuti, kuti eezi zyachitika munaazilyo wakeelede kubbadala chakkumi eecho mpawo ayungizye achipanzi chasanu alinchicho [20 pesenti] amugutu wambelele. Kuchita oobo, kwakali kutondeezya kuti balazilemeka zintu zisalala zyaJehova.—Le 5:14-16.
NOVEMBER 23-29
LUBONO LUZWA MUJWI LYALEZA | LEVITIKO 6-7
“Kutondeezya Kulumba”
Zyiiyo Nzitujana Mubbuku lyaLevitiko
Chiiyo chachibili: Tubelekela Jehova akaambo kakuti tulamulumba. Kuti tumvwisisisye eezi, atulange-lange chipayizyo chalumvwanano chakali kupegwa amaIsrayeli. Chipayizyo eechi chakali kuyandikana mubukombi bwabo. Bbuku lyaLevitiko litupandulwida kuti maIsrayeli akali kupa chipayizyo chalumvwanano “kutegwa atondezye kulumba.” (Lev. 7:11-13, 16-18) MuIsrayeli wakali kupa chipayizyo eechi chakuliyandila alubo wakali kuchipa kuti atondeezye luyando akulumba kuli Jehova Leza. Muntu wakali kupa chipayizyo eecho wakali kulya nyama abamumpuli yakwe kuswaanizya amupayizi. Pesi kuli zimwi zipanzi zyanyama zyakali kupegwa Jehova. Nziili zipanzi eezyo?
w00 8/15 15 ¶15
Zipayizyo Zyakali Kubotezya Leza
Chimwi chituuzyo chakali kupegwa chakuliyandila, nchipayizyo chalumvwanano chaambidwe mubbuku lyaLevitiko chaandaano 3. Majwi aakasandululwa kuti chipayizyo chalumvwanano alakonzya kusandululwa kuti “cipaizyo cazituuzyo zyaluumuno.” MuChihebrayo bbala lyakuti “luumuno” lyaamba zyiingi kunze kwakubula nkondo naakuti kutamvwanana. Bbuku litegwa Studies in the Mosaic Institutions lyaamba kuti: “MuBbayibbele, bbala eeli lyaamba kubula nkondo naakuti kumvwanana alubo lilakonzya kwaamba kuba aaluumuno aLeza, kunota naakuti kubotelwa.” Nkinkaako, zipayizyo zyalumvwanano teebakali kuzipeda kuti bantu babe aaluumuno aLeza luzutu naakuti kuyanda kumukombelezya pesi zyakali kutondeezya kuti maIsrayeli balalumba. Bapayizi abasikupa zipayizyo bakali kulya chipayizyo eecho nibakali kumana kutuula ganzi amafuta kuli Jehova. (Levitiko 3:17; 7:16-21; 19:5-8) Munzila yachikozyano, sikupa chipayizyo, bapayizi aJehova Leza bakali kulya chipayizyo eecho kabalaamwi, eezi zyakali kutondeezya kuti bakali aaluumuno aLeza.
w00 8/15 19 ¶8
Zipayizyo Zyakali Kubotezya Leza
Kutegwani atala amuntu wakali kupa zituuzyo? MuMulawu kwaambidwe kuti muntu woonse wakali kusika kubusyu bwaJehova wakeelede kusalala katakwe kabala. Muntu wakasofweede, chakusaanguna wakeelede kutuula chituuzyo chazibi kuti akonzye kutambulika lubo kuli Jehova akuti chipayizyo chakwe chuumpwa chitambulike kuli Leza. (Levitiko 5:1-6, 15, 17) Tazitondeezyi na eezi kuti tweelede kukkala katuli aabweenzuma bulikabotu aJehova? Kuti katuyanda kuti bukombi bwesu bumubotezye Leza, tweelede kuba bantu bafwambaana kubambulula kuti twabisizya Leza. Tweelede kufwambaana kuyanduula lugwasyo ndutupegwa aaLeza kabelesya “baalu bambungano” naakuti Jesu Kristo ‘cipaizyo cakumanya zibi zyesu.’—Jakobo 5:14; 1 Johane 2:1, 2.
Kuyanduula Lubono muJwi lyaLeza
it-1 833 ¶1
Mulilo
Mbuwakali kubeleka kutente lyakukombela akutempele. MaJuda bakali kubonaanga mulilo wakali aachipayililo wakali kulikutula munzila yachigambyo, pesi maboneno aaya taayendelani pe aMagwalo. Kweendelana amalayilile Jehova ngaakapede Mozesi, wakaambide kuti bana baAroni bakeelede, “kubikka mulilo acipaililo akubamba nkuni atala aamulilo” kabatanabikka chituuzyo aachipayililo. (Le 1:7, 8) Nikwakazwa aakusalwa bapayizi baluzubo lwaAroni alubo kabali babikka zituuzyo nzibakali kuyanda kupayizya aachipayililo, mpimpawo aakazwa mulilo wakazwa kuli Jehova alubo kuyeeyelwa kuti mulilo ooyo wakanjilila mujoba lyakavumbide tente lyakukombela mpawo wakawumpa zituuzyo zyakali aachipayililo. Kweendelana amakani aaya, mulilo ooyu wakaba munzila yachigambyo kutali kuti nkuni zyakali aachipayililo zyakayaka azilikke pesi wakali wakuti uumpe “cituuzyo cuumpwa amafwuta izyakali acipaililo.” Pesi mulilo wakazoozumanana kuyaka aachipayililo, wakali wavwelengana wakazwide kuli Jehova awakakutulidwe kale abapayizi. (Le 8:14–9:24) Munzila iikozyenie, mulilo wachigambyo wakazwide kuli Jehova wakawumpa zituuzyo zyakali aachipayililo chiindi Solomoni naakamana kupa nkombyo yakupeda tempele.—2Mk 7:1; alubo langa Bab 621; 1Ba 18:21-39; 1Mk 21:26 kuti ubone zimwi zikozyano Jehova mpaakabelesya mulilo wachigambyo naakali kutambula zituuzyo zyabakombi bakwe.
si 27 ¶15
Levitiko ndiBbuku lyamuBbayibbele lyachi3
(3) Chituuzyo chazibi chakali kupegwa aabantu bakatali kubisya aachaali. Banyama bakali kupayizigwa kuchituuzyo eechi bakali kusiyana-siyana kweendelana aakuti muntu uuyanda kulekelelwa chibi eecho mupayizi na, nchisi choonse na, mwaalu na naakuti muntu luzutu. Kusiyana azituuzyo zyakuliyandila zili mbuli chituuzyo chuumpwa achituuzyo chalumvwanano, chituuzyo chazibi teechakali chakulisalila biya pe.—4:1-35; 6:24-30.
NOVEMBER 30–DECEMBER 6
LUBONO LUZWA MUJWI LYALEZA | LEVITIKO 8-9
“Bumboni Bwakulongezegwa aaJehova”
it-1 1207
Kusala
Mozesi wakasanzya Aroni abana baAroni Nadabbu, Abbihu, Eliyazara aItamara (naakuti kubalayilila kuti balisanzye) mulichakusambila chamukuba chakali mulubuwa lwatente lyakukombela mpawo wakazwaatika Aroni zyakusama zyabupayizi bupati. (My 3:2, 3) Zigogo zibotu nzyaakazwaatikwa Aroni, zyakali kutondeezya buntu mbwaakeelede kubaabo amulimu ngwakali kuyoochita. Kuzwa waawo, Mozesi wakananika tente lyakukombela azintu zyoonse zyakali mukati, zintu zyakubelesya zyoonse, chipayililo chazituuzyo zyuumpwa kuswaanizya achakusambila chakali kubelesegwa. Zintu zyoonse zyakasalazigwa zyakali kuyoobelesegwa muzintu zili aachakuchita abukombi luzutu. Kumamanino, Mozesi wakazootila Aroni mafuta aakunanika mumutwe.—Le 8:6-12; Ku 30:22-33; In 133:2.
it-1 1208 ¶8
Kusala
Mubuzuba bwachi8, baluzubo lwaAroni kabali basaanguna kubeleka kabali bapayizi (kabatagwasigwi aaMozesi), bakapa chituuzyo chakumania mulandu akaambo kakuti bakali aachibi alubo maIsrayeli aachiindi eecho bakali bazwa aakubisizya Jehova kwiinda mukukomba ng’ombe yangolida. (Le 9:1-7; Ku 32:1-10) Nibakamana kupa chipayizyo bapayizi bapya baluzubo lwaAroni, Jehova wakatondeezya kuti wakabatambula kwiinda mukulosya mulilo kuzwa kujulu. Kulakonzeka kuti mulilo ooyo wakanjilila mujoba lyakavumbide tente lyakukombela mpawo wakawumpa nyama amafuta zyakali zyasyaala aachipayililo.—Le 9:23, 24.
Zyiiyo Nzitujana Mubbuku lyaLevitiko
Chiiyo chachine: Jehova ulikulongezya mbunga yakwe ilaanyika. Atulange-lange zyakachitika mu1512 B.C.E., chiindi tente lyakukombela nilyakabikkwa aafwiifwi aChilundu chaSinayi. (Kul. 40:17) Mozesi wakachita pobwe lyakunanika Aroni abana bakwe kuti babe bapayizi. MaIsrayeli aakabungana kuti azoobone bapayizi kabali kutenta zipayizyo zyabo kakusaanguna. (Lev.9:1-5) Jehova wakatondeezya biyeni kuti wakali kubatambula bapayizi aaba bapya? Chiindi Aroni aMozesi nibakali kwaambuula aabantu Jehova wakapa kuti kuseluke mulilo mpawo wakatenta zipayizyo zyakali aachipayililo.—Bala Levitiko 9:23, 24.
Kuyanduula Lubono muJwi lyaLeza
w14 11/15 9 ¶6
Nkamboonzi Nitweelede Kusalala?
Cheelelo chakuti bapayizi bachiIsrayeli bakeelede kusalala kumubili chili aabupanduluzi bwachoonzyo kubantu baJehova mazubaano. Chiindi chiingi bantu mbitwiiyaabo Bbayibbele balabona kuti tulasalala, tuzwaata kabotu akuti masena eesu aakukombela angawo alasalala. Kusalala kwabapayizi kutugwasya kubona kuti kufumbwa uuyanda kutanta kuchilundu chabukombi bwaJehova weelede kuti ‘kasalala mumoyo.’ (Bala Intembauzyo 24:3, 4; Is. 2:2, 3.) Milimu yesu iisalala kuli Leza yeelede kuchitwa katuli aamizeezo, moyo amubili uusalala. Eezi zyaamba kuti tweelede kulilanga-langa alubo bamwi nga bazoobona kuti beelede kuchincha kuti basalale. (2 Kor. 13:5) Muchikozyano, muntu uubbabbatizidwe weebela zintu zyeeta muzeezo wakoonana achaali weelede kulibuzya kuti, ‘Nzindilikuchita zipa kuti ndisalale na?’ Mpawo weelede kukumbila lugwasyo kuti aleke chiyanza eechi chibi.—Jak. 5:14.
it-2 437 ¶3
Mozesi
Leza wakasala Mozesi kuti abe simwiimaakati wachizuminano chaMulawu nchaakapangene amaIsrayeli. Taakwe muntu wakapedwe chuuno eechi kunze kwaJesu Kristu, Simwiimaakati wachizuminano chipya. Mozesi wakasaansila ganzi lyabanyama bakali kupayizigwa aabbuku lyachizuminano chaMulawu, eezi zyakali kutondeezya kuti Jehova amaIsrayeli (chaamba baalumi bapati bachiIsrayeli) bakapangana chizuminano. Kuzwa waawo, Mozesi wakabala bbuku lyachizuminano chaMulawu mpawo bantu bakavwiila kabati, “Zyoonse nzyaamba Jehova tulazicita.” (Ku 24:3-8; Heb 9:19) Akaambo kakuti Mozesi wakali simwimakaati, wakali aachilongezyo chakulangania mulimu wakuyakwa kwatente lyakukombela, kupangwa kwazibelesyo zyamutente lyakukombela. Leza nguwe wakamubuzya mbulyakeelede kuyakwa. Alubo Mozesi wakapedwe mulimu wakusala bapayizi, kupeda tente lyakukombela akunanika Aroni kuti abe mupayizi mupati. Mozesi nguwe wakali kulanga-langa milimu yakali kuchitwa aabapayizi bapya.—Ku zyaand 25-29; Le zyaand 8; 9.