Ulasyoma Na Kuti Jehova Uchita Zintu Zilikabotu Chiindi Choonse?

1-2. (a) Nkamboonzi bantu biingi nikubayumina kusyoma bantu bazulwida? (b) Tulalanga-langaanzi muchiiyo eechi?

BANTU biingi mazubaano kulabayumina kusyoma bantu bazulwida. Bakabona kuti bamfulumende abasimilawu tababagwasyi pe bantu bafwaba pesi bakwabilila bantu banotede abazibinkene. Eezi nzizyo zipa kuti Bbayibbele lyaambe kuti: ‘Muntu weendelezya muntunyina munzila iimuletela mapenzi.’ (Muk. 8:9) Kuyungizya aali zeezi, bamwi bapati bazikombelo bachita zintu zibi loko alubo nzibachita ngazyapa kuti bantu biingi batamusyomi pe Leza. Nkinkaako, kuti umwi muntu wazumina kwiiya Bbayibbele andiswe, tweelede kumugwasya kuti asyome Jehova abantu mbasalide kuti bazulwide mumbunga yakwe.

² Bantu bayiya Bbayibbele teembabo pe abalikke bayelede kwiiya kusyoma Jehova ambunga yakwe. Nikuba aabo bali aaminyaka myiingi kabali mukasimpe, beelede kukkala kabayeeya kuti Jehova uchita zintu zilikabotu chiindi choonse. Chimwi chiindi tulakonzya kuswaanana aazyiimo zikonzya kupa kuti kutuyumine kusyoma Jehova. Muchiiyo eechi, tulabona zyiimo zitatu lusyomo lwesu mbulukonzya kusunkwa: (1) chiindi nitubala tumwi twaano twamuBbayibbele, (2) chiindi nitupegwa malayilile kuzwa kumbunga yaJehova, alubo (3) twaakuswaanana aabuyumu-yumu kuchiindi chili kunembo.

SYOMA JEHOVA CHIINDI NUBALA BBAYIBBELE

3. Niinzi chikonzya kupa kuti kutuyumine kusyoma Jehova chiindi nitubala Bbayibbele?

³ Chiindi nitubala Bbayibbele, tulakonzya kuba aamibuzyo atala anzila Jehova njakabajataayo bamwi bantu anzila njakasalaayo. Muchikozyano, mubbuku lyaMyeelwe tubala atala awumwi mwaalumi wakatebba naakuti kutema nkuni mubuzuba bwaSabata mpawo Jehova wakalayilila kuti ajayigwe. Pesi nikwakayinda minyaka myiingi, mubbuku lyaSamuele wachibili tubala kuti Jehova wakalekelela Mwaami Davida nikuba kuti wakachitide bwaamu aBbatishebba akulayilila kuti mulumi wakwe ajayigwe. (My. 15:32, 35; 2 Sam. 12:9, 13) Chiindi nitubala makani aaya, tulakonzya kulibuzya kuti, ‘Nkamboonzi Jehova naakalekelela Davida wakachita chibi chipati chili boobu akupa kuti mwaalumi wakachita chibi chibonekaanga nchiniini ajayigwe?’ Kuti tusandule mubuzyo ooyu, atubone zintu zitatu nzitweelede kuyeeya chiindi nitubala Bbayibbele.

4. Lugwalo lwa Matalikilo 18:20, 21 alwa Deuteronomo 10:17, lutugwasya biyeni kuti tubone kuti Jehova ubeteka munzila iilikabotu?

⁴ Chimwi chiindi Bbayibbele talitubuzyi pe makani woonse atala ayimwi nkani. Muchikozyano, litubuzya kuti Davida wakatondeezya kweempwa kwachoonzyo akaambo kazintu nzyaakachita. (Int. 51:2-4) Pesi lilatubuzya na makani miingi atala mwaalumi wakatyola mulawu waSabata, mbuli kuti wakali muntu ulibiyeni? Wakalisola na akaambo kazintu nzyaakachita? Kuli naakali watyola milawu yaJehova na? Wakali muntu utaswiilili na chiindi naakali kuchenjezegwa? Bbayibbele talitubuzyi pe. Nkinkaako, tatukonzyi pe kubeteka nkani eeyi kweendelana amakani ngituzi. Pesi kasimpe nkituzi nkakuti, Jehova ‘tachiti zitaluleme.’ (Dt. 32:4) Chiindi Jehova nabeteka, tabeteki kweendelana anzyamvwa, tasaluuli pe alubo tanyonganisigwi azimwi zintu zikonzya kupa kuti bantu batabeteki munzila iilikabotu. Pesi nga ulaamakani woonse. (Bala Matalikilo 18:20, 21; Deuteronomo 10:17.) Kukkala katwiiya atala Jehova amilawu yakwe kuyoopa kuti twiisyome amoyo woonse nzila njabetekaayo. Nikuba kuti twaba aamibuzyo njitutakonzyi pe kujana nsandulo zyayo chiindi nitubala Bbayibbele pesi nzituzi atala aLeza wesu zipa kuti tube aachoonzyo chakuti “uliluleme munzila zyakwe zyoonse.”—Int. 145:17.

5. Chibi nchitulaacho chipa kuti tubeteke bamwi munzila iili biyeni? (Langa kabbokesi kati “Chibi Nchitulaacho Chipa Kuti Tutabeteki Kabotu.”)

⁵ Tatukonzyi pe kubeteka munzila iilikabotu chiindi choonse nkaambo tulaachibi. Leza wakatulenga muchikozyano chakwe nkinkaako, tuyanda kuti bantu bajatwe munzila iilikabotu. (Matl. 1:26) Pesi akaambo kachibi nchitulaacho tulakonzya kubeteka bamwi munzila iitali kabotu nikuba katubonaanga tulizizi zyoonse zyakachitika. Muchikozyano, atuyeeye chikozyano chaJona. Jona taakabotelwa pe chiindi Jehova naakabatondeezya luse bantu bakuNineve. (Jon. 3:10–4:1) Akaambo kakuti Jehova wakabatondeezya luse, bantu bayinda ku120 000 bakafutuka. Eezi zitondeezya kuti Jona nguwe wakali aamaboneno aatali kabotu atala abantu aaba kutali Jehova.

6. Nkamboonzi Jehova nateelede kutubuzya twaambo toonse tupa kuti asale kuchita zimwi zintu?

⁶ Takuyandiki kuti Jehova atubuzye twaambo toonse tupa kuti asale kuchita zimwi zintu. Nisimpe kuti aali chimwi chiindi Jehova wakazumizya bakombi bakwe kuti baambe maboneno aabo atala azintu nzyaakali wasala naakuti zintu nzyaakali kuyanda kusala. (Matl. 18:25; Jon. 4:2, 3) Alubo aali chimwi chiindi, wakali kupandulula kaambo kapa kuti asale kuchita chimwi chintu. (Jon. 4:10, 11) Nikuba boobo, Jehova tasungilizigwi pe kuti atubuzye twaambo tupa kuti asale kuchita chimwi chintu. Nkamboonzi? Nkaambo nguwe wakatulenga, nkinkaako takuyandikani kuti atukumbile mvumo chiindi nayanda kuchita chimwi chintu alubo takuyandikani kuti amvwe maboneno eesu chiindi naamana kuchichita.—Is. 40:13, 14; 55:9.

SYOMA JEHOVA KUTI WAPEGWA AAMWI MALAYILILE

7. Niinzi zikonzya kutuyumina alubo nkamboonzi?

⁷ Tulaachoonzyo chakuti Jehova uchita zintu zilikabotu chiindi choonse, pesi chimwi chiindi kulakonzya kutuyumina kusyoma bantu mbaakasala kuti batuzulwide. Tulakonzya kulibuzya kuti, ‘Bantu aaba bachita kweendelana anzibabuzigwa aJehova na naakuti kweendelana anzibayeeya?’ Kulakonzeka kuti bamwi bakombi baJehova bachiindi bakali kuyeeya oobo. Atuyeeye atala azikozyano zyaambwa mufuka 3. Bbululu wamwaalumi wakatyola mulawu waSabata wakali kukonzya kulibuzya kuti, ‘Mozesi wasaanguna kubuzya kuli Jehova na katanalayilila kuti muntu ooyo ajayigwe?’ Alubo mweenzinyina waUriya muHiti, ulaamwanakazi wakachita bwaamu aDavida, wakali kukonzya kuyeeya kuti Davida wakabelesya nguzu zyakwe mbuli Mwaami kuti atajayigwi akaambo kachibi nchaakachita. Jehova ulabasyoma bantu mbaakasala kuti batuzulwide. Nkinkaako, simpe ndyakuti tatukonzyi pe kwaamba kuti tulamusyoma Jehova kuti katutakonzyi kusyoma bantu mbaakasala kuti batuzulwide.

8. Zyaambidwe muli Milimo 16:4, 5, zikozyenie biyeni ambuyibeleka mbungano yachiKristu mazubaano?

⁸ Mazubaano Jehova uzulwida mbunga yakwe yaanyika kabelesya “muzike usyomeka alimwi uucenjede.” (Mt. 24:45) Muzike ooyu uzulwida bakombi baLeza munyika yoonse alubo upa baalu malayilile mbuli mbubakali kuchita bamukabunga keendelezya kambungano yachiKristu yakusaanguna. (Bala Milimo 16:4, 5.) Baalu ngabazoobelesya malayilile aayo kumbungano. Tutondeezya kuti tulayisyoma nzila Jehova njachitaayo zintu kwiinda mukuswiilila malayilile azwa kumbunga yakwe akubaalu.

9. Ndiilili nikukonzya kutuyumina kuzuminana aakusala kuchitwa abaalu alubo nkamboonzi?

⁹ Chimwi chiindi kulakonzya kutuyumina kuti tuzuminane aakusala kunga kwachitwa abaalu. Muchikozyano, muminyaka miche yayinda kwakaba kuchincha mumbungano zyiingi amumabazu. Muli zimwi ndawu, baalu bakakumbila bamwi basikupupulula kuti bakanjile azimwi mbungano kuchitila kuti zyuuno zyoonse zinga zili muNg’anda yaBwaami zikonzye kubelesegwa. Kulakonzya kutuyumina kusiya beenzuma abamumpuli kuti twabuzigwa kuti tulongele kuliimwi mbungano. Baalu nga babuzigwa aLeza na kuti sikupupulula umwi awumwi kanjila ambungano iili? Peepe. Eezi zilakonzya kupa kuti kutuyumine kuswiilila malayilile ngibatubuzya. Pesi Jehova ulabazumizya kuti bachite kusala ooko akaambo kakuti ulabasyoma. Andiswe tweelede kubasyoma.b

10. Kweendelana alugwalo lwa Bahebrayo 13:17, nkamboonzi nitweelede kubelekelaamwi abaalu?

¹⁰ Nkamboonzi nitweelede kuzuminana aakusala kuchitwa abaalu nikuba kuti nzibasala ngateenzizyo pe nzitwali kuyanda? Nkaambo kuchita oobo kupa kuti kube kujatana akati kabakombi baLeza. (Ef. 4:2, 3) Kuti boonse mumbungano kabatobelezya kusala kwachitwa abaalu, mbungano ilasima. (Bala Bahebrayo 13:17.) Alubo kwiinda zyoonse ngatuli kutondeezya kuti tulamusyoma Jehova kwiinda mukubelekelaamwi abaabo mbaakasala kuti batuzulwide.—Mil. 20:28.

11. Niinzi chikonzya kutugwasya kuti twaasyome amoyo woonse malayilile ngitupegwa aabaalu?

¹¹ Tulakonzya kwaasyoma amoyo woonse malayilile ngitupegwa aabaalu kuti twayeeya kuti ngabakomba kabakumbila muuya uusalala chiindi nibalanga-langa nkani zigwasya mbungano. Alubo chiindi nibali kulanga-langa imwi nkani, babelesya malayilile amuBbayibbele kuswaanizya amalayilile aazwa kumbunga aayendelana ankani eeyo. Bali aachiyandisyo chakuchita zintu zibotezya Jehova akuzulwida bakombi bakwe munzila iilikabotu. Baalumi aaba basyomeka balizi kuti bayoolyaambilila kuli Leza anzila njibabajataayo bakombi bakwe. (1 Pet. 5:2, 3) Yeeya atala azeezi, munyika bantu tabajisini pe akaambo kakuti mbamisyobo iisiyene, banjila zikombelo zisiyene alubo mbatubunga twapolitikisi tusiyene pesi bakombi baJehova bakomba Leza uumwi wakasimpe kabajisini. Eezi zilikukonzeka akaambo kakuti Jehova nguwe ulikugwasya mbunga yakwe.

12. Niinzi nzibeelede kulanga-langa baalu kuti babone kuti sikubisya wakachincha na?

¹² Jehova wakapa baalu mulimu mupati wakuti babe aachoonzyo chakuti mbungano ikkala kiisalala. Kuti muKristu wachita chibi chipati Jehova ulangilila kuti baalu balange-lange nkani yakwe babone kuti ulakonzya na kuzumanana kali mumbungano. Alubo beelede kulanga-langa kuti muntu ooyo ulikulisola na azintu nzyaakachita. Ulakonzya kwaamba kuti wakasiya zibi zyakwe pesi ulatondeezya na kuti ulazizonda nzyaakachita? Nzyalikuchita zilatondeezya na kuti tazoochiyindululi lubo pe chibi chakwe? Kuti kakuli kuti beenzinyina mbabo bakapa kuti achite chibi eecho, ulilibambilide na kusiyana aabo? Chiindi nibalanga-langa nkani yakwe, baalu balakomba, balalanga-langa Magwalo akulanga-langa kuti sikubisya ulimvwa biyeni atala azintu nzyaakachita. Kuzwa waawo, ngabazoosala kuti muntu ooyo azumanane kali mumbungano na naakuti agwisigwe.—1 Kor. 5:11-13.

13. Niinzi nzitukonzya kuyeeya kuti mweenzuma naakuti bbululu wesu wagwisigwa mumbungano?

¹³ Nkuuba loko kusyoma baalu kuti muntu wagwisigwa mumbungano katali mweenzuma naakuti bbululu wesu. Pesi kulakonzya kutuyumina kuti muntu ooyo kali bbululu wesu naakuti mweenzuma. Tulakonzya kukataazikana katuyeeya kuti baalu bakaalanga-langa na makani woonse aswaanizidwe? Alubo tulakonzya kuyeeya kuti baalu bakamubeteka munzila Jehova njaakali kuyoomubetekaayo na? Atubone chikonzya kutugwasya kuti tukkale katuli aamaboneno aalikabotu atala anzibasala baalu.

14. Niinzi zikonzya kutugwasya kuti baalu basala kuti mweenzuma naakuti bbululu wesu agwisigwe mumbungano?

¹⁴ Tweelede kuyeeya kuti Jehova nguwe wakabikka mabambe aakugwisya sikubisya mumbungano akuti mabambe aayo agwasya mbungano asikubisya. Kuti sikubisya uuteempwi taagwisigwa pe mumbungano, ulakonzya kupa kuti bamwi bachite chibi. (Gal. 5:9) Ulakonzya kutabona kuti chibi nchaakachita nchipati biyeni alubo ulakonzya kutabona twaambo tupa kuti kuyandikane kuti achinche buntu bakwe kuchitila kuti abambulule bweenzinyina aJehova. (Muk. 8:11) Tulakonzya kuba aachoonzyo chakuti baalu bawuchita kabotu mulimu wabo chiindi nibasala kuti umwi muntu agwisigwe mumbungano. Balizi kuti mbuli mbubakali kuchita babetesi muchiindi chamaIsrayeli, ‘tababetekeli muntu pe pesi babetekela Jehova.’—2 Mak. 19:6, 7.

KUSYOMA JEHOVA AMOYO WOONSE LINO KUYOOTUGWASYA BIYENI MUCHIINDI CHILI KUNEMBO?

15. Nkamboonzi nikuyandikana loko kuti tusyome malayilile aazwa kuli Jehova lino?

¹⁵ Mbukunga mamanino aanyika eeyi abaafwiifwi, tweelede kusyoma nzila Jehova njachitaayo zintu kwiinda mbutwakali kuchita chiindi. Nkamboonzi? Nkaambo muchiindi chamapenzi mapati tulakonzya kuyoopegwa malayilile ayoobonekaanga taabeleki pe, taamvwisisiki pe alubo mayumu kwaatobelezya. Jehova takaambuuli aandiswe mulomo mpande pe. Kulakonzeka kuti uyoobelesya bantu mbaakasala kuti batuzulwide. Aachiindi eecho, takukayandikani kuti tukayeeye tubili atala amalayilile ngituyoopegwa katulibuzya kuti, ‘Nichoonzyo na kuti malayilile aaya azwa kuli Jehova naakuti bakwesu bazulwida baamba nzibayeeya?’ Uyoosyoma Jehova na ambunga yakwe muchiindi eecho chiyumu? Nsandulo iyeeme aakuti uwabona biyeni malayilile ngitupegwa abakwesu bazulwida lino. Kuti kwaasyoma akwaaswiilila malayilile ngitupegwa mazubaano kulakonzya kuyookuubila muchiindi chamapenzi mapati.—Lk. 16:10.

16. Niinzi ziyoochitika kunembo zikonzya kuyoopa kuti kukatuyumine kusyoma nzila Jehova njabetekaayo?

¹⁶ Chimwi nchitweelede kuyeeyesesya nchakuti, tuyooyibona biyeni nzila Jehova njayoobabetekaayo bantu muchiindi chili kunembo. Lino tulaabulangilizi bwakuti bantu biingi batakombi Jehova kuswaanizya ababbululu besu balakonzya kuchincha mamanino kaatanasika. Pesi aachiindi chaArmagedoni, Jehova uyoobelesya Jesu kuti akasale kuti uyoobachita biyeni bantu aaba. (Mt. 25:31-33; 2 Tes. 1:7-9) Teemulimu wesu pe wakuyoosala kuti mbaani beelede kuyoofwidwa luse aJehova akuti mbaani beelede kuyoonyonyoonwa. (Mt. 25:34, 41, 46) Tuyooyisyoma na nzila Jehova njabetekaayo naakuti tuyooleka kumukomba akaambo kakuti tatukazuminani pe akusala nkwaayoochita. Zili aantanganana kuti tweelede kusyoma Jehova amoyo woonse lino kuchitila kuti tukakonzye kuchita oobo muchiindi chili kunembo.

17. Mbuubuli bubotu buyooba akaambo kanzila Jehova njayoobetekaayo muchiindi chili kunembo?

¹⁷ Atuyeeye atala abubotu buyooba munyika mpya akaambo kanzila Jehova njayoobetekaayo. Bukombi bwakubeja buyoomana, bazyamabbizinesi batangala abazyapolitikisi badyaaminina bantu akupa kuti bantu bafwabe tabachinooliwo pe. Kuchiswa, kuchembaala alufu ziyoomana. Saatani amadimoni bayoosungwa kwaminyaka iili 1 000. Mapenzi akeetwa akaambo kakupapila kwabo ayoomana. (Ciy. 20:2, 3) Tuyoobotelwa loko akaambo kakuti twakasala kusyoma nzila Jehova njachitaayo zintu.

18. Twiiyaanzi kuzwa kuchikozyano chamaIsrayeli chilembedwe muli Myeelwe 11:4-6; 21:5?

¹⁸ Kuli zimwi na zyiimo nzituyooswaana munyika mpya ziyoopa kuti kukatuyumine kusyoma nzila Jehova njachitaayo zintu? Muchikozyano, atuyeeye atala azyakachitika nikwakayinda chiindi chifwiifwi kuzwa maIsrayeli nibakaangununwa mubuzike kuEgepita. Bamwi bakasaanguna kung’ung’una akaambo kakuti bakali kuyeeya chakulya nchibakali kulya kuEgepita. Alubo bakali kwaamba kuti mana njakabapede Jehova nchisesemyo. (Bala Myeelwe 11:4-6; 21:5.) Kujana zyachitika na kuti andiswe tukabe amaboneno aali boobo nayoomana mapenzi mapati? Tatuzi pe kuti kunooli mulimu mwiingi biyeni wakusalazya nyika akupa kuti ikabe paradayizi. Kweelede kuti kunooli mulimu mwiingi akuti buumi buyootuyumina kumasaangunino. Tuyoong’ung’una na atala azintu Jehova nzyayootupa aachiindi eecho? Choonzyo nchituzi nchakuti, kuti twakkala katulumba zintu Jehova nzyatupa lino, kuyootuubila kuti tukachite oobo muchiindi chili kunembo.

19. Twayiyaanzi muchiiyo eechi?

¹⁹ Tweelede kuba aachoonzyo chakuti Jehova uchita zintu munzila iilikabotu chiindi choonse. Alubo tweelede kusyoma aabo Jehova mbaakasala kuti batuzulwide. Tatweelede kwaaluba pe majwi Jehova ngaakabuzya mupolofita Isaya aakuti: “Mulaba anguzu kufumbwa buyo kuti mubatame akuba alusyomo.”—Is. 30:15.