Kuti Wamvwa Kutachiyandi Kupona

Mwanakazi uutegwa Adriana uukkala kuBrazil, wakali kukkala kakataazikana mumoyo alubo wakali kulimvwa katagwasyi. Wakati: “Ndakali kuyeeya kulijaya.”

KULI nwaakamvwide kutachiyandi kupona na? Kuti kakuli boobo kweelede kuti ulimvwa mbuuli mbaakali kulimvwa Adriana. Adriana wakazooziba kuti wakali abulwazi bupa kuti muntu alimvwe kakataazikene mumoyo (depression).

Umwi mwaalumi wakali kulangania bazyali bakwe bakali kuchiswa uutegwa Kaoru uukkala kuJapan, wakati: “Ndakali kuza kandikatede kuzwa kumulimu, eezi zyakali kupa kuti ndikachilwe kulya akulala. Ndakali kuyanda kufwa kuchitila kuti ndipumune.”

Umwi mwaalumi uutegwa Ojebode uukkala kuNigeria wakati: “Ndakali kukataazikana zyakuti ndakali kukkala kandilila, eezi zyakapa kuti ndiyande kulijaya.” Ojebode, Kaoru aAdriana teebakazoolijaya pe. Nikuba boobo, kkole akkole kuli bantu biingi balijaya.

NKUUKULI NKUKONZYA KUJANA LUGWASYO?

Bantu biingi balijaya mbaalumi nkaambo balaansoni kukumbila lugwasyo. Jesu wakayiisya kuti bantu bachiswa beelede kuyoobona musilisi. (Luka 5:31) Nkinkaako, kuti kulimvwa kukataazikene zyakuti nga wayeeya kulijaya, utabi aansoni kukumbila lugwasyo. Bantu biingi bakali aabulwazi bwakukataazikana (depression), kuswaanizya Ojebode, Kaoru aAdriana bakajana lugwasyo kuchibbadela.

Kuti basilike bantu balaabulwazi bwakukataazikana (depression), madokotela balakonzya kubelesya minsamu naakuti kwaambuulaabo. Bantu balaabulwazi oobu bayanda kutondeezegwa luyando abamumpuli abeenzinyina. Mweenzuma mupati uukonzya kubagwasya nguJehova Leza alubo ulakonzya kubagwasya kabelesya Jwi lyakwe Bbayibbele.

KULI CHINTU CHIYOOMANA PENZI EELI NA?

Bantu balaabulwazi bwakukataazikana balanonoka kupona alubo kuti bakonzye kupona, beelede kuchincha zimwi zintu mubuumi bwabo. Kuti kulaabulwazi bwakukataazikana, ulakonzya kugwasikana kuti wayeeya bulangilizi mbwalaabo Ojebode. Wakati: “Ndilangilila chiindi businsimi buli muli Isaya 33:24 nibuyoozuzikizigwa. Muchiindi eecho taakwe muntu ulaanyika uutakaambe kuti, ‘Ndachiswa.’” Anduwe ulakonzya kusimisigwa amajwi aali muBbayibbele atondeezya kuti kuyooba ‘nyika mpya’ iitakwe ‘machise.’ (Ciyubunuzyo 21:1, 4) Aakuzuzikizigwa majwi aaya, bulwazi bwakukataazikana buyoomana. Machise ngitumvwa lino akaambo kakukataazikana ‘takooyooyibalukwa limbi nikuba kuyeeyegwa.’—Isaya 65:17.

Mavesi AamuBbayibbele Aakonzya Kukugwasya

Leza ulizi mbulimvwa.

“Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”—Isaya 41:13.

Jehova nguwe alikke uuzi mbutulimvwa kwiinda bantu boonse alubo uyanda kutugwasya.

Kuyeeyesesya atala aJwi lyaLeza kulakonzya kukugwasya.

Eliya “wakakumbila kuti afwe. Wakati, Cazulila. Kondinyanzya buumi bwangu, O Jehova.”—1 Bami 19:4.

Ojebode wakaamba kuti: “Kuyeeyesesya atala amakani aajanika muBbayibbele kwakandigwasya. Ndakabona kuti Eliya wakali kulimvwa mbuuli mbundakali kulimvwa.”

Zikozyano zyamuBbayibbele zilakonzya kukugwasya.

Jesu wakabuzya Petro kuti: “Ndakukombela kuti lusyomo lwako lutamani.”—Luka 22:32.

Mwaapostolo Petro naakakaka Jesu ziindi zitatu, wakakataazikana loko zyakuti wakalila. Kaoru wakaamba kuti: “Zyakachitika kuli Petro zyakandigwasya kubona kuti Jehova aJesu bakali aandaba ambaakali kulimvwa Petro. Kuyeeyesesya atala ankani eeyi kwakandisungwaazya.”

Machise ngitumvwa lino akaambo kakukataazikana ‘takooyooyibalukwa limbi nikuba kuyeeyegwa.’—Isaya 65:17