MUNYIKA YAZUKILA AAMAPENZI

2 | Kwabilila Zintu Zikugwasya Kuti Upone

NKAMBOONZI NIKUYANDIKANA

Buzuba abuzuba, bantu biingi balikubeleka changuzu kuti bajane zintu zyakuponaazyo. Pesi kulabayumina kuzijana akaambo kamapenzi aali munyika alubo zintu zilikwiindilila biya kubija. Nkamboonzi?

Zintu zili mbuli chakulya amalenti zilikudula akaambo kamapenzi aali munyika.
Kuyuma kwazintu kulikupa kuti milimu ibulike naakuti bantu bafole mali nche.
Mapenzi aalichitikila alikupa kuti bantu bafwabe nkaambo anyonyoona mabbizinesi aabo, maanda azintu zyabo.

Nzweelede Kuziba

Kuti wayibelesya kabotu mali, ilakonzya kukugwasya nikwachitika mapenzi.
Mali njitulaayo azintu zyesu zilakonzya kumaninwa mulimu.
Kuli zimwi zintu mali nziitakonzyi pe kuula zili mbuli kubotelwa akujatana mumpuli.

Nzukonzya Kuchita Lino

Bbayibbele lyaamba kuti: “Twanoojisi cakulya azisani, tunookkutila azintu eezyi.”—1 Timoteyo 6:8.

Kukkutisikana kuswaanizya kujata moyo kuzintu zitayandikani loko akukkutisikana azintu ziyandikana loko zikugwasya kuti uzumanane kupona. Eezi ziyandikana loko ikapati kuti waba aamali nche.

Kuti ube muntu uukkutisikana, kulayandikana kuti upone aazintu nzulaazyo. Kuti wawula zintu zyiinda mali njujana, buumi bulakuyumina.

NZUKONZYA KUCHITA—Malayilile Aagwasya

Muchiindi chili boobu chiyumu, kwabilila zintu zikugwasya kuti upone kwiinda mukuchita zintu eezi

CHESYA ZINTU NZUULA

Chesya zintu nzuula

Utafwambaani kuchincha zintu zili mung’anda naakuti zigogo kazitanazakala. Ulakonzya kulibuzya kuti: ‘Nzindiyanda kuchita, ziyanda kuti ndibelesye moota na? Ndilime gaadeni na kuchitila kuti ndiseve mali?’
Kutanawula chimwi chintu, weelede kulibuzya kuti: ‘Ndilikuchiyanda chachoonzyo na chintu eechi? Mali njindilaayo ilakkwana na?’
Ulakonzya kulembesya kumitabi yamfulumende iigwasya bantu naakuti imwi mitabi kuti kayiliwo nkukkala.

“Twakakkala aansi mbuli mpuli mpawo twakalanga mbutwakali kubelesya mali. Twakagwisya zimwi zintu zyakali kubelesya mali nyingi mbuli zyakulikondelezya. Alubo twakasaanguna kulijikila chakulya nkaambo ziseva mali.”—Gift.

BBAJETA

Bbajeta

Bbayibbele lyaamba kuti: “Makanze aabankutwe masimpe apa kuzwidilila, pele bantu boonse baingana kucita zintu ncobeni balacetaala.” (Tusimpi 21:5) Kubbajeta kulakonzya kukugwasya kuti utabelesyi mali yiinda njujana.

Chakusaanguna, lemba aansi mali njujana amweezi.
Kuzwa waawo, ulembe aansi zintu nzuyanda kubbadala akuula mumweezi.
Chamamanino, yezyanisya zintu nzuyanda kuula mumweezi amali njujana. Kuti mali eeyo kayitakkwani, gwisya zimwi zitayandikani.

“Mweezi amweezi, nga twalemba aansi mali njitujana azintu nzituyanda kuula. Mpawo nga twabikka kamwi kamali aambali kakubelesya nikwaba zyiimo zyachibukila mbuta. Kuchita oobu, kutugwasya kuti tutakataazikani loko nkaambo nga tukkede katuzi mbutuyanda kwiibelesya mali yesu.”—Carlos.

UTANJILI MUZIKWELETE / SEVA MALI

Utanjili muzikwelete / seva mali

Yanduula nzila zyakuti uchesye zikwelete. Kuti kakukonzeka, utakweleti pe. Pesi yezya kuseva mali yakuti uule zintu ziyandikana.
Mweezi amweezi, bikka kamali aambali nkukonzya kubelesya mumweezi ooyo naakuti nikwachitika mapenzi aachibukila mbuta.

BELEKA CHANGUZU / UTACHITI ZINTU ZIPA KUTI WAANDWE MULIMU

Bbayibbele lyaamba kuti: “Mulimo uuli woonse uubelekwa canguzu ujanya mpindu.”—Tusimpi 14:23.

Beleka changuzu / utachiti zintu zipa kuti waandwe mulimu

Ba aamaboneno aalikabotu atala amulimu ngubeleka. Nikuba kuti mulimu ooyo teenguwo pe nguwakali kuyanda pesi ukugwasya kuti ujane mali yakusanina mpuli.
Beleka changuzu alubo usyomeke kumulimu. Eezi zilakonzya kukugwasya kuti utamaninwi mulimu naakuti ufwambaane kujana umwi mulimu kuti ngulaawo wamana.

“Tandisali pe milimu. Nikuba kuti kanditawuyandi naakuti mali iifolwa kayili nche ndibeleka kupela. Ndibeleka changuzu mbuli kuti ndilikubeleka aakkampani yangu.”—Dmitriy.

Kuti kulikuyanduula mulimu . . .

Bweza ntaamu. Foonena basimabbizinesi mbuyeeyela kuti balakonzya kukunjizya mulimu nikuba kabatali ku-adivetayiza. Buzya beenzinyokwe naakuti bamumpuli kuti ulikuyanduula mulimu.
Ba muntu uuchinchika. Chimwi chiindi, ulakonzya kujana mulimu ngutayandi pe.