Nkamboonzi Bamwi Nibatachilemeki Bamwi?

NKAMBOONZI NIKUYANDIKANA KULEMEKA BAMWI?

Kulemeka bamwi kupa kuti tutakachilani alubo kupa kuti chiimo chitayindilili kubija.

Kasimpi kamuBbayibbili kaamba kuti: “Kuvwiila kabotu kulalesya bukali, pele majwi mabi alanyemya.” (Tusimpi 15:1) Kutalemeka bamwi muzintu nzitwaambuula amuzintu nzituchita, kuli mbuuli kutila palafini aamulilo alubo kupa kuti chiimo chiindilile kubija.
Jesu wakaamba kuti: “Mulomo waamba zizwide mumoyo.” (Mateyo 12:34) Kutalemeka bamwi munzila njitwaambuulaayo kutondeezya kuti tuli aamaboneno aatali kabotu atala amusyobo wabantu aabo, nkubazwa naakuti nzila njibakakomezegwaayo.

Kuyanduulisisya kwakachitwa lino-lino, kwakabuzigwa-buzigwa bantu bayinda ku 32 000 bazwa munyika zili 28, bantu bayinda kuhafu bakabuzigwa-buzigwa bakaamba kuti mazubaano bantu bayindilila biya kutalemekana.

NZUKONZYA KUCHITA

Nikuba kuti uli kuchikolo naakuti kumulimu, lemeka bantu boonse nikuba kutazuminani aanzibaamba. Yanduula zintu nzimukonzya kuzuminana. Eezi zilakugwasya kuti utabikkili maanu kuzintu nzibapambanisya.

“Amuleke kubeteka kutegwa mutabetekwi.”—Mateyo 7:1.

Jata bamwi munzila njuyanda kujatwaayo. Kuti kubajata munzila iilikabotu bamwi, ambabo bayookujata munzila iilikabotu.

“Zintu nzimuyanda kuti bantu bamuchitile, andinywe amubachitile mbuboobo.”—Lukka 6:31.

Bamuntu uulekelela. Toyelede kufwambaana kuyeeya kuti umwi muntu wakanzide kukuchitila chintu chibi.

“Bupampu bwamuntu bulamulesya kufwambaana kunyema, alimwi cilamubotela kujatila milandu.”—Tusimpi 19:11.

Mung’anda yaBwaami miswaangano kitanasaanguna. Bantu balaminyaka isiyene-siyene abalaamaponeno asiyene-siyene balikwaambuula kabali kubotelwa.

ZILIKUCHITWA AABAKAMBONI BAJEHOVA

Nkubakkala ankubabelekela, Bakamboni baJehova balabalemeka bamwi.

Tuyiisya Bbayibbili katutabbadalisyi kubantu boonse, pesi tatubaangili biya pe bamwi kuti basyome zintu nzitusyoma. Tuleezya kubelesya malayilile aamuBbayibbili kwiinda mukubuzya bamwi mulumbe wesu “amoyo uubombede akulemeka kupati.”—1 Petro 3:15; 2 Timoti 2:24.

Tatusaaluuli pe alubo tutambula bantu bakakomezegwa munzila zisiyene-siyene kumiswaangano yesu yambungano alubo bayanda kwiiya Bbayibbili. Tulababikkila maanu alubo ‘tulabalemeka bantu bamisyobo yoonse.’—1 Petro 2:17.

Tulabalemeka balupati-pati bamfulumende bamundawu mutukkala. (Baroma 13:1) Tulayiswiilila milawu akubbadala mitelo. Alubo, nikuba kuti tatunjilili pe mupolitikisi, pesi tulazilemeka nzibasala bamwi kunkani yapolitikisi.