Nkamboonzi Bamwi Bantu Nibatalemeki Buumi?

NKAMBOONZI NITWEELEDE KULEMEKA BUUMI?

Kuti twachita zintu zikonzya kupambanisya mibili yesu ayabamwi nga tulikutondeezya kuti tatubulemeki pe buumi.

Kufwepa kupa kuti muntu abe aabulwazi bwakkensa alubo kupa kuti masooja aamubili wamuntu ooyo atabeleki kabotu. Bantu biingi bakajayigwa aakkensa yamumapunga akaambo kakufwepa naakuti kuyoya busi bwamuntu uulikufwepa.
Kudubuka kwamabbomba kupa kuti bantu biingi bakataazikane munyaka amunyaka. Lipoti yakazwa kuYunivesiti yaStanford yakaamba kuti: “Kuyanduulisisya kwakachitwa kwakatondeezya kuti nikuba bantu bazwa kabatalichiside pe nikwadubuka bbomba nga bazooba aapenzi lyakukataazikana kwaminyaka myiingi.”
Bantu badilayiva kabakoledwe bukande naakuti kababelesya madrugs bapa kuti bantu babelesya migwagwa batentuuke. Kuti bantu kabachita zintu zitondeezya kuti tababulemeki pe buumi, bantu batakwe mulandu mbabo banjila mupenzi.

NZUKONZYA KUCHITA

Kwabilila buumi bwako. Ulakonzya kutantamuka michito iitali kabotu iili mbuli kufwepa kandundu, kufwepa kubelesya kapayipi, kunywa bukande zyiindilide naakuti kulikondelezya aamadrugs. Michito eeyi ipambanisya mibili yesu alubo itondeezya kuti tatubulemeki pe buumi bwabamwi abwabamumpuli yesu.

“Atulisalazye kuzintu zyoonse zipa kuti tutasalali kumubili.”—2 Bakkorinte 7:1.

Kwabilila bamwi kuswaanizya anduwe. Kuti ukkale kukwabililidwe, wubambe kabotu munzi wako. Dilayiva munzila iilikabotu alubo moota yako yeelede kukkala kiili muchiimo chilikabotu. Utazumini kweenwa aabamwi kuti uchite zintu zikonzya kunjizya buumi bwako naakuti bwabamwi mungoozi.

“Kuti wayaka ng’anda, weelede kuyaka chitabililo aachiluli chang’anda eeyo, kuchitila kuti uteeti mulandu waganzi kung’anda yako nkaambo umwi muntu ulakonzya kuwa kazwa aajulu aang’anda.”—Detoronomi 22:8.a

Bajate kabotu bamwi. Kulemeka buumi kuswaanizya mbutubabona bantu boonse, nkubazwa ambubakakomezegwa. Kulwana ankondo ziba akaambo kakusaluulana akuzondana.

“Amusowe misyobo yoonse yakulutila, kunyema, bukali, kupopota amajwi mabi, kuswaanizya achintu choonse chikonzya kuchisa bamwi. Pesi amufwidilane luzyalo.”—Ba-efeso 4:31, 32.

ZILIKUCHITWA AABAKAMBONI BAJEHOVA

Bakamboni baJehova bayiisya bamwi kuti balikwabilile. Mulimu wesu wakuyiisya Bbayibbili ulikugwasya bantu kuti basiye michito iitali kabotu yakazyatila mulimbabo.

Tutobelezya milawu yakulikwabilila mumayake eesu. Basikulipeda bagwasilizya kukuyaka masena eesu aakukombela aamwi mayake aasumpula mulimu wesu wakukambawuka ngabapegwa malayilile aabagwasya kuti batalichisi pe. Mayake eesu akkala kaalangwa-langwa kuchitila kuti ayendelane aamilawu yakulikwabilila yakundawu ooko.

Ngatwagwasya bantu baswaana mapenzi aalichitikila. Mu 2022 kwakachitika mapenzi aalichitikila aasika ku 200 alubo twakabelesya mali yazipo iisika ku 12 miliyoni dolazi kukugwasya bantu bakachitikilwa mapenzi aalichitikila.

Nikwakaba bulwazi bwa-Ebola kuWest Africa mu 2014 akuDemocratic Republic of Congo mu 2018, twakayiisya bantu mbubakonzya kulikwabilila kubulwazi oobu bujeya. Twakatuma biiminini kuti bakaambuule aatubunga atala amutwe utii, “Kuswiilila Kulafutula.” Kumasena eesu aakukombela kwakabikkwa zyakusambila maboko alubo twakayiisya bantu mbukuyandikana kusamba kumaboko akutobelezya zimwi nzila zyakulikwabilila.

KuSierra Leone, Bakamboni baJehova bakalumbwa munyuzi mulediyo akaambo kakuyiisya Bakamboni abantu batali Bakamboni mbubakonzya kuzunda kazunda ka-Ebola.

Bakamboni baJehova balilayinide kabali kusamba mumaboko kabatananjila muNg’anda yaBwaami. — Chakusambila mumaboko chili aaNg’anda yaBwaami kuLiberia nikwakali bulwazi bwa-*Ebola* mu 2014

a Chiindi kuMiddle East, kutobelezya malayilile aaya kwakali kukwabilila bamumpuli abamwi.