Makani Aakumamanino

Mulumbe Kubazyali BachiKristu:

Mbuli bazyali, mulaachiyandisyo chakugwasya bana banu bayandwa kuti bayande Jehova akulipeda kulinguwe. Kujana mwabagwasya biyeni kuti balibambile kubbabbatizigwa? Ndiilili nibeelede kutola ntaamu eeyi iiyandikana?

Jesu wakabuzya batobeli bakwe kuti: “Kamuya mukayiisye bantu bazisi zyoonse kuti babe basikwiiya, akubabbapatizya.” (Mt. 28:19) Kweendelana amakani aaya, chintu chiyandikana kuti muntu abbabbatizigwe nkutobelezya njiisyo zyaKristu kutali kuzimvwisisisya akuzisyoma luzutu. Eechi nchintu chikonzya kuchitwa amuntu woonse nikuba kachili mwana.

Amube chikozyano chibotu kubana banu, alubo mubayiisye njiisyo zyaJehova. (Dt. 6:6-9) Mulakonzya kubelesya bbuku liti Mbukonzya Kubotelwa Mubuumi Kukabe Kutamani! kuti mubayiisye kasimpe kajanika muBbayibbele akubagwasya kubelesya njiisyo zyalo. Amubagwasye kuti bakonzye kupandulula nzibasyoma. (1 Pet. 3:15) Luzibo akubasungwaazya nkumuchita, kwiiya kabali abalikke, kukomba kwampuli, kunjila miswaangano yambungano akuliswaanizya abantu bali kabotu, ziyoobagwasya kuti balibambile kubbabbatizigwa akupeekezya kuchita zimwi. Amubagwasye kuti balichitile zipeekezyo zyamubukombi.

Lugwalo lwaTusimpi 20:11 lwaamba kuti: “Naba mwana musyoonto ulazyibwa kumicito yakwe, kuti naa ulasalala alimwi uliluleme mukulilemeka kwakwe.” Nziizili zimwi nchito zitondeezya kuti mwanaanu waba sikwiiya waJesu Kristu akuti walibambila kubbabbatizigwa?

Mwana walibambila kubbabbatizigwa weelede kuswiilila bazyali bakwe. (Mil. 5:29; Kol. 3:20) Bbayibbele lyaamba kuti chiindi Jesu naakali aminyaka iili 12: “Wakazumanana kubamvwida [kubazyali bakwe].” (Lk. 2:51) Tamweelede kulangila kuti mwanaanu abe muntu uumaninide. Pesi kuti walibambila kubbabbatizigwa, weelede kutobelezya chikozyano chaJesu akulibombya kubazyali bakwe.

Uyootondeezya chiyandisyo mukwiiya kasimpe kamuBbayibbele. (Lk. 2:46) Mwanaanu ulanjila na miswaangano akutola lubazu? (Int. 122:1) Ulabala na Bbayibbele chiindi choonse akuchita chiiyo chakwe alikke?—Mt. 4:4.

Mwana uulibambila kuzoobbabbatizigwa ubikka Bwaami mubusena bwakusaanguna. (Mt. 6:33) Ubikkila maanu kumulimu wakukambawuka. Ubelesya nzila zisiyene-siyene zyakukambawuka alubo ubuzya mbayiyaabo abayiisi bakwe kuti nguKamboni waJehova. Mikuli njapegwa kuMuswaangano waBuumi Amulimu Wesu wiichita amoyo woonse.

Alubo uyoolijata kabotu akutaliswaanizya abantu batali kabotu. (Tus. 13:20; 1 Kor. 15:33) Eezi zilakonzya kuboneka munzila njasalaayo nyimbo, mamuvi, mapulogilamu aamuTV, zisobano zyamakkompiyuta akubelesya Intaneti.

Biingi bakazumina kuyiisigwa abazyali babo, bakachita kasimpe kaba kabo alubo bakabbabbatizigwa kabachili baniini. Nibazyali, Jehova amulongezye mbukunga muliikugwasya bana banu kuti babweze ntaamu eeyi iiyandikana iiyoobagwasya kuti babe beenzinyina baJehova.

Mulumbe kuli Sikupupulula Uutanabbabbatizigwa:

[Chifanikisyo chilaa peji 182]

Nchilongezyo kuba sikupupulula uutanabbabbatizigwa mumbungano. Ulalumbayizigwa akaambo kakwiinkilila kunembo muzintu zyabukombi. Wakamuziba Leza kwiinda mukwiiya Jwi lyakwe alubo wakatondeezya lusyomo muzisyomezyo zyakwe.—Joh. 17:3; Heb. 11:6.

Kutanatalika kwiiya aBakamboni baJehova, kulakonzeka kuti wakali kunjila chimwi chikombelo naakuti taakwe chikombelo nchwaakali kunjila. Amwi wakali kuchita imwi michito iiteendelani anjiisyo zyamuBbayibbele. Pesi lino wakatondeezya lusyomo kwiinda mukuchincha, chaamba kulisola kuzintu nzwaakali kuchita zitali kabotu, alubo wakasanduka chaamba kusiya zintu zitali kabotu akutalika kuchita zintu zibotu mumeso aaLeza.—Mil. 3:19.

Amwi “kuzwa kubuvwanda ulaazyi malembe aasalala,” alubo wakali kukwabililwa kuti utachiti zintu zitayandikani kumaKristu akuti utachiti zintu zibi. (2 Tim. 3:15) Wakayiya kuzunda jungwe alumwi lweeno kutegwa utachiti zintu zibi mumeso aaJehova. Wakatondeezya lusyomo kwiinda mukusumpula bukombi bwakasimpe akubuzya bamwi nzusyoma. Wakayiisigwa kuchita mulimu uuchitwa amaKristu wakukambawuka. Lino wasala kubelekela Jehova kuli sikupupulula uutanabbabbatizigwa.

Kufumbwa kuti wakayiya nzila zyaJehova kuzwa nwakachili mwana naakuti wakazoomuziba Jehova mukweenda kwachiindi, ulakonzya kuyeeyesesya atala antaamu zibili zikugwasya kuti wiinkilile kunembo muzintu zyabukombi, kulipeda akubbabbatizigwa. Ulipeda kuli Jehova kwiinda mukukomba kuli nguwe kumubuzya kuti wasala kukomba nguwe alikke kukabe kutamani. (Mt. 16:24) Utondeezya kulipeda ooku kwiinda mukubbabbatizigwa mumaanzi. (Mt. 28:19, 20) Kwiinda mukulipeda akubbabbatizigwa, nga watondeezya kuti uli mubelesi waJehova Leza. Eechi nchilongezyo chipati loko!

Uyooswaana buyumu-yumu busiyene-siyene mbuli mbuwakabona chiindi nwakali kwiiya Bbayibbele. Yeeya kuti, chiindi Jesu naakazwa kubbabbatizigwa, “wakasololelwa amuuya munkanda kutegwa akasunkwe a Diabolosi.” (Mt. 4:1) Nwaabbabbatizigwa akuba sikwiiya waKristu, uyooswaana masunko miingi loko. (Joh. 15:20) Uyoosunkwa munzila zisiyene-siyene. Ulakonzya kukazigwa abamumpuli. (Mt. 10:36) Ulakonzya kusekwa ambuyiyaabo, mbubelekaabo abeenzinyokwe bachiindi. Chiindi choonse, weelede kuyeeya majwi aJesu aajanika muli Marko 10:29, 30 aakuti: “Ncobeni ndimwaambila kuti, kunyina wakasiya ŋanda naa banabokwabo naa bacizyi bakwe naa banyina naa bausyi naa bana bakwe naa myuunda akaambo kandime alimwi akaambo kamakani mabotu. uutakajani zintu ziyungizyidwe ziindi zili 100 muciindi cino—nkokuti maanda, banabokwabo, bacizyi, bamamama, bana alimwi amyuunda antoomwe akupenzyegwa—eelyo mubweende bwazintu buboola, ibuumi butamani.” Aboobo yinkilila kunembo kubeleka changuzu kuti ube afwiifwi aJehova akuti upone kweendelana azyeelelo zyakwe ziluleme.

Ikuti kuyanda kubbabbatizigwa, weelede kubuzya mulangizi wakabunga kabaalu. Baalu bayoowambuuzyania anduwe kababelesya mibuzyo iitobela mulumbe ooyu akubona kuti uleelela na kubbabbatizigwa. Ulakonzya kusaanguna kulanga-langa mibuzyo eeyi chiindi nuchita chiiyo chako awulikke.

Chiindi nulibambila kwaambuuzyania ooku, bala alubo ulange-lange Magwalo aabikkidwe. Ulakonzya kulilembela tumwi twaambo mubbuku eeli naakuti kufumbwa mpukonzya kulembela. Ulakonzya kubelesya twaambo ntwaakalemba alubo weelede kuba abbuku eeli chiindi nwaambuuzyania abaalu. Ikuti kuli amibuzyo njutamvwisisisyi kabotu, toyelede kuyoowa kubuzya muntu ukuyiisya Bbayibbele naakuti baalu kuchitila kuti bakugwasye.

Chiindi nwaambuuzyania abaalu, toyelede kupa nsandulo ndamfu naakuti zitondeezya kuti ulaaluzibo lwiingi. Pesi ulakonzya kwaamba nsandulo zitakataazyi, mfwiifwi alubo zyeendelana akumvwisisisya kwako. Kumibuzyo myiingi, zilagwasya kusandula kubelesya Magwalo.

Ikuti kutanazimvwisisisya kabotu njiisyo zyamuBbayibbele, baalu bayoobamba kuti ugwasigwe lubo kuchitila kuti umvwisisisye Magwalo akuti uzooyelele kubbabbatizigwa muchiindi chitobela.

[Zyeelede kubikkilwa maanu abaalu bamumbungano: Malayilile aayelede kutobelezegwa mukwaambuuzyania ababo bayanda kubbabbatizigwa ajanika mupeji 208-212.]