CHIIYO 51
Kujana Wamubotezya Biyeni Jehova Munzila Njuwambuulaayo?
Jehova wakatupa chipo chibotu loko, chipo chakwaambuula. Jehova ulaandaba na anzila njituchibelesyaayo chipo eechi? Iiyi ulaandaba! (Bala Jakobo 1:26.) Kujana twachibelesya biyeni chipo chakwaambuula munzila iibotezya Jehova?
1. Tweelede kuchibelesya biyeni chipo chakwaambuula?
Bbayibbele lyaamba kuti “amuzumanane kukulwaizyanya akuyakana umwi amweenzinyina.” (1 Batesalonika 5:11) Kuli muntu na nguzi uuyanda kusungwaazigwa? Niinzi nzweelede kuchita kuti umusungwaazye? Mubuzye kuti ulaandaba anguwe. Ulakonzya kumubuzya zintu zikubotezya atala anguwe. Yeeya vesi njukonzya kubelesya kuti umusungwaazye. Kuli mavesi miingi loko ngukonzya kubelesya. Utalubi kuti nzila njuwambuulaayo ilaanguzu zyakusungwaazya muntu. Nkinkaako, weelede kwaambuula munzila yaluzyalo alubomba chiindi choonse.—Tusimpi 15:1.
2. Ngaali majwi ngituteelede kwaambuula?
Bbayibbele lyaamba kuti: “Kutazwi jwi libolede neliba lyomwe mukanwa lyanu.” (Bala Baefeso 4:29.) Eezi zyaamba kuti tatweelede kwaambuula majwi aatali kabotu naakuti kutukila bamwi katuyanda kuti banyeme. Alubo tatweelede kuvwiya akubejelezya bamwi.—Bala Tusimpi 16:28.
3. Niinzi chikonzya kutugwasya kuti twaambuule ziyaka bamwi?
Chiindi chiingi, twaambuula zintu zili mumyoyo yesu naakuti zili mumizeezo. (Luka 6:45) Nkinkaako, tweelede kulizibizya kwaambuula zintu ziluleme, zisalala, ziyandwa azintu zilaampuwo mbotu. (Bafilipi 4:8) Kuti tukonzye kuchita zintu eezi, tweelede kusala zyakulikondelezya abeenzuma munzila yabusongo. (Tusimpi 13:20) Alubo tweelede kusaanguna kuyeeya katutanawambuula. Weelede kuyeeya kuti majwi nguyanda kwaambuula alabajata biyeni bamwi. Bbayibbele lyaamba kuti: “Majwi aambwa cakutayeeya alayasa mbuli panga, pele mulaka wabasongo ulaponya.”—Tusimpi 12:18.
YIYA ZYIINGI
Bona mbukonzya kwaambuula majwi aabotezya Jehova alubo aasungwaazya bamwi.
4. Lijate munzila njuwambuulaayo
Chimwi chiindi, nga twaambuula zintu nzitunga twazoolisola. (Jakobo 3:2) Bala Bagalatiya 5:22, 23, mpawo musandule mibuzyo iitobela:
Mbuubuli buntu mbuyanda kukombela bukonzya kukugwasya kuti ulijate munzila njuwambuulaayo? Kujana buntu oobu bwakugwasya biyeni?
Bala 1 Bakorinto 15:33, mpawo musandule mubuzyo uutobela:
Bantu mbumvwananaabo azyakulikondelezya nzusala kujana zyiichincha biyeni nzila njuwambuulaayo?
Niinzi chikonzya kuchincha nzila njuwambuulaayo?
Bala Mukambausi 3:1, 7, mpawo musandule mubuzyo uutobela:
Ubonaanga ndiilili nweelede kuumuna naakuti kulindila chiindi chilikabotu chakuti uwambuule?
5. Wambuula zintu zilikabotu atala abamwi
Niinzi nzitweelede kuchita kuti tutatukili bamwi naakuti kwaambuula majwi aatali kabotu atala ambabo? Mweebele KAVIDIYO, mpawo musandule mibuzyo iitobela.
Nkamboonzi mukwesu ooyu naakali kuyanda kuchincha nzila njaambuulaayo atala abamwi?
Niinzi nzyaakachita kuti achinche?
Bala Mukambausi 7:16, mpawo musandule mubuzyo uutobela:
Niinzi nzitweelede kuyeeya kuti twaamba kwaambuula majwi aatali kabotu atala awumwi?
Bala Mukambausi 7:21, 22, mpawo musandule mubuzyo uutobela:
Kujana mavesi aaya akugwasya biyeni kuti utafwambaani kunyema kuti umwi waambuula majwi aatali kabotu atala anduwe?
6. Wambuula kabotu abamumpuli
Niinzi chikonzya kukugwasya kuti waambuule munzila iilikabotu abamumpuli?
Bala Baefeso 4:31, 32, mpawo musandule mubuzyo uutobela:
Niinzi nzitweelede kuchita kuti twaambuule majwi aayaka mumpuli?
Jehova wakatondeezya mbaakali kumuyanda Mwanaakwe, Jesu. Bala Matayo 17:5, mpawo musandule mubuzyo uutobela:
Kujana wamutobelezya biyeni Jehova munzila njuwambuulaayo abamumpuli?
Yanduula myeenya yakusungwaazya bamwi
BAMWI BAAMBA KUTI: “Ndaambuula kufumbwa nzindiyanda. Nsikwe ndaba pe kuti nzindaambuula zibajata biyeni bamwi.”
Zilikabotu na eezi? Nkamboonzi?
CHIFWIINSYO
Majwi alaamanguzu. Tweelede kuziba nzituyanda kwaamba, nitweelede kuzyaamba ambutweelede kuzyaamba.
Mibuzyo Yakwiindulula
Kujana waambuula biyeni munzila iigwasya bamwi?
Ngaali majwi ngituteelede kwaambuula?
Niinzi chikonzya kutugwasya kuti twaambuule zintu zilikabotu alubo ziyaka bamwi?
YANDUULISISYA
Niinzi chikonzya kutugwasya kuti twaambuule majwi aalikabotu?
Bona zikonzya kukugwasya kuti utaambuuli majwi aatali kabotu.
Bona chikonzya kukugwasya kuti utantamuke kuvwiya.
Bona Jehova mbaakagwasya umwi mwaalumi wakali aapenzi lyakukonka.
“Ndakasaanguna Kuyeeyesesya Atala Abuumi Bwangu” (Ngaziyakulinda, August 1, 2013)