Zichitwa ‘Aamuzike Uusyomeka Alimwi Uuchenjede’

Jesu Mutwe wambungano yachiKristu. (Baefeso 5:23) Kalikujulu, Jesu ulikuzulwida batobeli bakwe aanyika kabelesya “muzike uusyomeka alimwi uucenjede.” (Bala Matayo 24:45.) Nikuba kuti “muzike” wakasalwa aaJesu kuti azulwide batobeli bakwe pesi ulalibombya kuli Kristu. Ngwani muzike ooyo? Muzike utugwasya biyeni?

1. Ngwani “muzike uusyomeka alimwi uucenjede”?

Kuzwa chiindi, Jehova wakali kubelesya muntu naakuti kabunga kabantu kuti bazulwide bakombi bakwe. (Malaki 2:7; Bahebrayo 1:1) Naakabweeda kujulu Jesu, baapostolo abaalu bamuJerusalemu mbabo bakali kuzulwida. (Milimo 15:2) Munzila iikozyenie, mazubaano kuli kabunga kabaalu chaamba Kabunga Keendelezya kaBakamboni baJehova bapa bakombi baLeza chakulya chamubukombi akuzulwida mulimu wakukambawuka. Kabunga aaka “muzike uusyomeka alimwi uucenjede ooyo [Jesu] ngwaakasala.” (Matayo 24:45a) Bakwesu balimuKabunga Keendelezya boonse bananikidwe aamuuya uusalala alubo balaabulangilizi bwakuyooyendelezya aaJesu muBwaami bwakujulu nibazoomaninsya mulimu wabo waanyika.

2. Nchiichili chakulya chamubukombi nchatupa muzike uusyomeka?

Jesu wakaamba kuti muzike uusyomeka uyoopa maKristu “cakulya cabo aciindi ceelede.” (Matayo 24:45b) Mbuli chakulya mbuchitugwasya kuti tube aamanguzu amibili iisimide, chakulya chamubukombi chaamba malayilile aazwa muJwi lyaLeza chitupa manguzu aakuti tukkale katusyomeka kuli Jehova akuchita mulimu Jesu ngwaakatupa. (1 Timoteyo 4:6) Tujana chakulya chamubukombi eechi kwiinda mukunjila miswaangano mipati aminiini, kubala mabbuku aapandulula Bbayibbele akweebela mavidiyo aatugwasya kuti tuzibe zintu nzyayanda Leza akuti tube aabweenzinyina busimide anguwe.

YIYA ZYIINGI

3. Bakombi baJehova beelede kubambikana

Kabagwasigwa aaJesu, bamuKabunga Keendelezya bazulwida mulimu waBakamboni baJehova. Mabambe aaya akali kubelesegwa aamaKristu bakusaanguna. Mweebele VIDIYO.

VIDIYO: Tweelede Kubambikana (9:23)

Bala 1 Bakorinto 14:33, 40, mpawo musandule mubuzyo uutobela:

• Mavesi aaya atondeezya biyeni kuti Jehova uyanda kuti bakombi bakwe babambikane?

4. Muzike uusyomeka uzulwida mulimu wesu wakukambawuka

MaKristu bakusaanguna bakali kuubona kuuyandikana mulimu wakukambawuka. Bala Milimo 8:14, 25, mpawo musandule mibuzyo iitobela:

• Muchiindi chamaKristu bakusaanguna, mbaani bakali kuzulwida mulimu wakukambawuka?

• Petro aJohane bakachita biyeni nibakapegwa malayilile abaapostolonyina?

BamuKabunga Keendelezya bawubona kuuyandikana loko mulimu wakukambawuka. Mweebele KAVIDIYO.

KAVIDIYO: Kubikkila Maanu Kumulimu Wakukambawuka (1:37)

Jesu wakatondeezya mbuuyandikana mulimu wakukambawuka. Bala Marko 13:10, mpawo musandule mibuzyo iitobela:

• Nkamboonzi bamuKabunga Keendelezya nibawubona kuuyandikana loko mulimu wakukambawuka?

• Nkamboonzi nikuyandikana kuti “muzike uusyomeka alimwi uucenjede” azulwide mulimu ooyu munyika yoonse?

5. Muzike uusyomeka upa malayilile

BamuKabunga Keendelezya bapa malayilile kumaKristu bali munyika yoonse. Bazichita biyeni kuti bakonzye kusala malayilile aakupa bantu? Bona mbubakali kuzichita bamukabunga keendelezya bakusaanguna. Bala Milimo 15:1, 2, mpawo musandule mibuzyo iitobela:

• Niinzi chakapa kuti maKristu bakusaanguna batamvwanani?

• Pawulu, Bbanabba abamwi bakalujana kuli lugwasyo lwakubambulula kutamvwanana ooku?

Bala Milimo 15:12-18, 23-29, mpawo musandule mubuzyo uutobela:

• Kabatanasala zyakuchita, bamukabunga keendelezya bakusaanguna bakachitaanzi kuti babambulule nkani eeyi?—Langa vesi 12, 15, a 28.

Bala Milimo 15:30, 31 a 16:4, 5, mpawo musandule mibuzyo iitobela:

• MaKristu bakusaanguna bakachita biyeni nibakapegwa malayilile abamukabunga keendelezya?

• Jehova wakabalongezya biyeni akaambo kakuswiilila?

Bala 2 Timoteyo 3:16 a Jakobo 1:5, mpawo musandule mubuzyo uutobela:

• Nzibasala bamuKabunga Keendelezya mazubaano, ziyeeme aali?

CHIFWIINSYO

Kabunga Keendelezya “muzike uusyomeka alimwi uucenjede” wakasalwa aaKristu. Bazulwida maKristu balimunyika yoonse akubapa chakulya chamubukombi.

Mibuzyo Yakwiindulula

• Ngwani wakasala “muzike uusyomeka alimwi uucenjede”?

• BamuKabunga Keendelezya batugwasya biyeni?

• Ulasyoma na kuti Kabunga Keendelezya “muzike uusyomeka alimwi uucenjede”?

YANDUULISISYA

Bona kuti bamuKabunga Keendelezya bawubamba biyeni mulimu wabo.

“Kabunga Keendelezya kaBakamboni baJehova Niinzi?” (Chiiyo chijanika aaIntaneti)

Bona kuti bamuKabunga Keendelezya bachita biyeni kuti tujane chakulya chamubukombi chachoonzyo.

Kupanga Mabbuku Amavidiyo Aalaamakani Aachoonzyo (17:18)

BamuKabunga Keendelezya bawubona biyeni mulimu ngubakapegwa aaJesu?

Chilongezyo Chiyandikana (7:04)

Miswaangano mipati aminiini itondeezya biyeni kuti Jehova nguwe ulikuzulwida bamuKabunga Keendelezya?

Jehova Ulikuyiisya Bakombi Bakwe (9:39)