Zikombelo Zyakubeja Ziyiisya Makani Aakubeja Atala aLeza

Kuti kakuli Leza nduyando, nkamboonzi bantu balyaamba kuti balamukomba nibachita zintu zibi? Kaambo kali aantanganana nkakuti, zikombelo eezi nzyakubeja alubo ziyiisya zintu zitali nzizyo atala aLeza. Ngaali makani aakubeja ngibaamba atala aLeza? Leza umvwa biyeni atala anzibaamba? Alubo uzoozibambulula biyeni eezi?

1. Ngaali makani aakubeja aali atala aLeza aayiisigwa muzikombelo zyakubeja?

Zikombelo zyakubeja zyakachincha “kasimpe ka Leza akutobela bubeji.” (Baroma 1:25) Muchikozyano, muzikombelo zyiingi zina lyaLeza taliyiisigwi pe. Pesi Bbayibbele litondeezya kuti tweelede kubelesya zina lyaLeza. (Baroma 10:13, 14) Kuti kwachitika chimwi chintu chitali kabotu, bafundisi biingi baamba kuti nkuyanda kwaLeza. Ooku nkubeja. Leza teenguwe pe uupa kuti zintu zibi zichitike. (Bala Jakobo 1:13.) Zilawusisya kuti zintu ziyiisigwa muzikombelo zilikupa kuti bantu batamuyandi pe Leza.

2. Nziizili zintu zitali kabotu zichitwa muzikombelo zyakubeja?

Muzikombelo zyakubeja, bantu tabajatwi mbuli mbayanda pe Jehova. Bbayibbele lyaamba kuti zibi zyachikombelo chakubeja “zyalundana kusikila kujulu.” (Ciyubunuzyo 18:5) Kuzwa chiindi, bantu bali muzikombelo zyakubeja balikunjilila muli zyapolitikisi, munkondo alubo balikupa kuti bantu biingi bajayigwe. Bafundisi biingi balinotede alubo babuzya bantu mbibazulwida kuti babape mali. Zintu zyoonse eezi, zitondeezya kuti tabamuzi pe Leza alubo tabeeleli pe kuti bamukombe.—Bala 1 Johane 4:8.

3. Leza uzibona biyeni zikombelo zyakubeja?

Kuti zintu zichitwa muzikombelo zyakubeja kazikunyemya, chaamba kuti Jehova zimunyemya zyiindilide. Jehova ulabayanda bantu pesi ulabazonda bafundisi bayiisya makani aakubeja atala anguwe alubo batabajati kabotu bamwi. Leza wakaamba kuti chikombelo chakubeja chiyoonyonyoonwa “alimwi kunyina [nichiyoojanwa] limbi pe.” (Ciyubunuzyo 18:21) Kwasyaala chiindi chifwiifwi loko kuti Leza azoonyonyoone bukombi bwakubeja.—Ciyubunuzyo 18:8.

YIYA ZYIINGI

4. Leza taziyandi pe zikombelo zyoonse

Bantu biingi baamba kuti nikuba kuti macheechi miingi pesi kukombwa Leza uumwi luzutu. Nkasimpe na aaka? Bala Matayo 7:13, 14, mpawo musandule mubuzyo uutobela:

• Bbayibbele lyaamba kuti nzila iitola kubuumi ili biyeni?

Mweebele KAVIDIYO, mpawo musandule mubuzyo uutobela.

KAVIDIYO: Zikombelo Zyoonse Zilatambulika Na Kuli Leza?—Kapanzi (3:22)

• Bbayibbele litondeezya kuti zikombelo zyoonse zilamubotezya na Leza?

5. Muzikombelo zyakubeja tamukwe luyando pe

Zikombelo zyakubeja zichita zintu zitayandwi aaLeza. Chimwi chazintu zibi nchibachita nkuliswaanizya munkondo. Kuti uzibone eezi, mweebele KAVIDIYO. Kuzwa waawo, musandule mibuzyo iitobela.

KAVIDIYO: Zikombelo Zyakanjilila muNkondo yaNyika Yabili (2:22)

• Nziizili zintu zyakachitwa aazikombelo muNkondo yaNyika Yabili?

• Ulimvwa biyeni atala azintu nzibakachita?

Bala Johane 13:34, 35 a 17:16. Kuzwa waawo, musandule mibuzyo iitobela:

• Ubonaanga Jehova umvwa biyeni kuti basizikombelo banjilila munkondo?

• Muzikombelo zyakubeja muchitwa zintu zibi loko. Niinzi chikutondeezya kuti muzikombelo zyakubeja tamukwe luyando pe?

6. Leza uyanda kuti bantu bazwe muzikombelo zyakubeja

Bala Ciyubunuzyo 18:4,a mpawo musandule mubuzyo uutobela:

• Kuziba kuti Leza uyanda kuti bantu bazwe muzikombelo zyakubeja kupa kuti umvwe biyeni?

7. Zumanana kwiiya atala aLeza

Zintu zibi zichitwa mumacheechi tazyeelede kukukachizya kuti wiiye atala aLeza. Muchikozyano, atuteedi umwi mwana wakaka kulayigwa awisi. Kuzwa waawo, mwana ooyo wazwa aang’anda mpawo wasaanguna kupona buumi butali kabotu. Wisi tabotelwi pe azintu zinga zilikuchitwa aamwana ooyu. Zilachita na kuti tupe wisi mulandu akaambo kakuti mwanaakwe wasaanguna kupona buumi butali kabotu?

• Ubonaanga kuli kabotu na kuti tuzonde Jehova akuleka kwiiya atala anguwe akaambo kazintu zibi zichitwa muzikombelo zyakubeja?

CHIFWIINSYO

Bantu bali muzikombelo zyakubeja bayiisya makani aakubeja atala aLeza alubo bachita zintu zibi. Leza uzoozinyonyoona zikombelo zyakubeja.

Mibuzyo Yakwiindulula

• Njiisyo zyakubeja azintu zitali kabotu zichitwa muzikombelo zipa kuti umvwe biyeni?

• Jehova uzibona biyeni zikombelo zyakubeja?

• Leza uzoozichitaanzi zikombelo zyakubeja?

YANDUULISISYA

Bona zintu zibili zichitwa muzikombelo zyakubeja zitamubotezyi Leza.

“Zikombelo Zyoonse Ziyiisya Chintu Chimwi Na? Ziyiisya Kasimpe Na Atala aLeza?” (Chiiyo chijanika aaIntaneti)

Nkamboonzi Jehova nayanda kuti tumukombe katulaamwi abamwi?

“Muntu Weelede Kuba aaChikombelo Nchanjila Na?” (Chiiyo chijanika aaIntaneti)

Umwi mupati wachikombelo, wakali kukataazikana atala azintu zibi zyakali kuchitwa mucheechi yabo. Pesi eezi teezyakamukachizya kuti ayiye kasimpe atala aLeza.

“Umwi Mupati Wacheechi Wakasiya Chikombelo Chakwe” (Amubuke!, February 2015)

Kuzwa chiindi, muzikombelo zyakubeja bayiisya kuti Leza takwe ndaba pe abantu akuti ulaalunya. Bona kasimpe kali atala amakani aakubeja aayiisigwa muzikombelo.

“Makani Aakubeja Aapa Kuti Bantu Babonaanga Leza Takwe Luyando” (Ngaziyakulinda, November 1, 2013)