Jesu Ngwani?

Jesu nguumwi wabantu bazibinkene loko. Bantu biingi bazi zina lyakwe luzutu pesi tabazi pe kuti muntu uuli biyeni. Alubo bamwi bali aamaboneno aasiyene-siyene atala anguwe. Pesi Bbayibbele lityeni atala aJesu?

1. Jesu ngwani?

Jesu nchilenge chamuuya alubo ukkala kujulu. Wakalengwa aaJehova Leza zintu zyoonse kazitanalengwa. Eezi nzizyo zipa kuti aambwe kuti “imutaanzi kuzyalwa kuzilenge zyoonse.” (Bakolose 1:15) Bbayibbele lyaamba kuti Jesu mwana waLeza “simuzyalwaalikke” nkaambo nguwe alikke wakalengwa aaLeza kumugama. (Johane 3:16) Jesu wakagwasya Jehova kulenga zintu zyoonse. (Bala Tusimpi 8:30.) Jehova aJesu bamvwanana loko. Jesu ngusikwaambuulila Leza, eezi nzizyo zipa kuti ayitwe kuti “Ijwi.”—Johane 1:14.

2. Jesu wakazidaanzi aanyika?

Muminyaka iili 2 000 yayinda, Jehova wakachita chigambyo kabelesya muuya uusalala kwiinda mukupa kuti musimbi uutegwa Mariya abe aada. Eezi zyakapa kuti Jesu azyalwe aanyika. (Bala Luka 1:34, 35.) Jesu wakaza aanyika kuti azoobe Mesiya naakuti Kristu akuti azoofutule bantu.a Bupolofita boonse buli atala aMesiya bulembedwe muBbayibbele bwakazuzikizigwa aali Jesu. Eezi zyakagwasya bantu kuti babone kuti Jesu uleelela kuba “Kristo, Mwana wa Leza muumi.”—Matayo 16:16.

3. Jesu ulikuli lino?

Chiindi Jesu naakafwa, wakabusigwa kali chilenge chamuuya mpawo wakabweeda lubo kujulu. “Leza wakamusumpula akumupa cuuno caatala.” (Bafilipi 2:9) Lino, Jesu utobela Jehova mubweendelezi.

4. Jesu teeLeza Singuzuzyoonse pe

Nikuba kuti Bbayibbele lyaamba kuti Jesu nchilenge chamuuya chilaanguzu, pesi uli aansi aWisi, Jehova. Nkamboonzi nitwaamba oobo? Mweebele KAVIDIYO kuti mubone musiyano uuliwo aakati kaJesu aLeza.

KAVIDIYO: Jesu Kristu nguLeza Na? (3:22)

Mavesi aatobela alatugwasya kubona kuti Jehova aJesu basiyene biyeni? Bala mavesi aatobela mpawo musandule mibuzyo iitobela:

Bala Luka 1:30-32.

• Mungelo wakaamba kuti Jesu aJehova Leza “Mupatikampatila” basiyene biyeni?

Bala Matayo 3:16, 17.

• Chiindi Jesu naakabbabbatizigwa, ijwi lyakazwa kujulu lyakatyeni?

• Ubonaanga ngwani wakali kwaambuula?

Bala Johane 14:28.

• Ngwani mupati, wisi amwana?

• Jesu wakali kwaambaanzi chiindi naakaamba kuti Jehova nguWisi?

Bala Johane 12:49.

• Jesu ulibona kayelene na aWisi? Uyeeyaanzi?

5. Niinzi chakatondeezya kuti Jesu nguMesiya?

KAVIDIYO: Jesu Wakazuzikizya Bupolofita (3:03)

Bala mavesi aatobela mpawo musandule mibuzyo iitobela:

Bala Mika 5:2 kuti ubone kuti Jesu wakali kuyoozyalilwa kuli.b

• Bupolofita oobu bwakazuzikizigwa na kuli Jesu?—Matayo 2:1.

Bala Intembauzyo 34:20 a Zekariya 12:10 kuti ubone bupolofita bwakaambwa atala alufu lwaMesiya.

• Bupolofita oobu bwakazuzikizigwa na?—Johane 19:33-37.

• Ubonaanga Jesu nguwe wakapa kuti zintu eezi zyoonse zizuzikizigwe aali nguwe na?

• Bupolofita bwakazuzikizigwa butondeezyaanzi atala aJesu?

CHIFWIINSYO

Jesu nchilenge chamuuya chilaanguzu. Mwana waLeza alubo nguMesiya.

Mibuzyo Yakwiindulula

• Nkamboonzi Jesu naambwa kuti “imutaanzi kuzyalwa kuzilenge zyoonse”?

• Katanaza aanyika Jesu wakali kuli alubo wakali kuchitaanzi?

• Tuzizi biyeni kuti Jesu nguMesiya?

YANDUULISISYA

Bona zintu Jesu nzyaakachita kali Mesiya.

“Bupolofita Buli Atala aMesiya Butondeezya Kuti Jesu nguMesiya Na?” (Chiiyo chijanika aaIntaneti)

Bona kuti nkamboonzi Bbayibbele nilyaamba kuti Leza nguWisi waJesu.

“Nkamboonzi Jesu Naambwa Kuti Mwana waLeza?” (Chiiyo chijanika aaIntaneti)

Bona kuti nkamboonzi njiisyo yakuti Leza uli mubutatu nitazwi muBbayibbele.

“Jesu NguLeza Na?” (Ngaziyakulinda, April 1, 2009)

Bona umwi mwanakazi mbaakachincha naakaziba zyiingi atala aJesu.

“Mwanakazi muJuda Wakachincha Nzyaakali Kusyoma” (Amubuke!, May 2013)