Mwalizi Na?

Niinzi chakagwasya sikwiiya Stefani kuti akkale kabeteme naakali kupenzegwa?

STEFANI wakapenzegwa ankamu yabantu bakali alunya. Mbukunga mbabo bakali kubeteka muNkuta Mpati yamaIsrayeli yakali ababetesi bali 71, baalumi aaba bakali akati kabantu balemekwa muIsrayeli. Bakali bungene kuMupayizi Mupati Kkefasi wakali kubeteka kakwiindide myeezi miche aawo Jesu naakapegwa chisubulo chakuti ajayigwe. (Mt. 26:57, 59; Inc. 6:8-12) Nibakiita bakamboni bakubeja, bakabona chimwi chintu chakali kugambya kuli Stefani nkaambo busyu bwakwe “bwakaba mbuli busyu bwaangelo.”​—Inc. 6:13-15.

Niinzi chakagwasya sikwiiya Stefani kuti akkale kabeteme muchiimo eechi chakali kuyoosya? Katanabetekwa muNkuta Mpati, Stefani wakali kugwasya bakombinyina nkaambo wakali kugwasigwa amuuya uusalala waLeza. (Inc. 6:3-7) Naakali kubetekwa, muuya usalala ooyo wakali kubeleka mulinguwe kawuli sikumuumbulizya akumuyeezya. (Joh. 14:16) Stefani naakali kwaamba nzyasyoma katayoowi, muuya uusalala wakamuyeezya zikozyano zyamuMagwalo aachiHebbrayo zyiinda ku20. (Joh. 14:26) Alubo lusyomo lwaStefani lwakasima zyiindilide naakabona chilengaano chaJesu kayimvwi kukuboko kwaLeza kwachilisyo.​—Inc. 7:54-56, 59, 60.

Limwi zuba andiswe tuyooswaana kukazigwa akupenzegwa. (Joh. 15:20) Kwiinda mukubala Jwi lyaLeza akutola lubazu mumulimu wakukambawuka, tupa kuti muuya uusalala ubeleke mulindiswe. Tuyookonzya kulisimya twaakuswaana kupenzegwa alubo katuli aluumuno lwamumoyo.​—1 Pet. 4:12-14.