MBUKONZYA KUZUNDA PENZI LYAKUZONDANA

3 | Gwisya Mizeezo Yakuzondana

Nzilyaamba Bbayibbele:

“Amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—BAROMA 12:2.

Nchizyaamba:

Zintu nzituyeeya zilayandikana kuli Leza. (Jeremiya 17:10) Nisimpe kuti tatweelede kwaamba naakuti kuchita zintu zitondeezya kuti tulabazonda bamwi pesi tatweelede kujinkila aawo pe. Kuzonda bamwi kusaangunina mumizeezo amumyoyo. Eezi zyaamba kuti tweelede kugwisya kufumbwa kamuzeezo kakuzonda bamwi nkitukonzya kuba aako. Kuti twachita oobo, tunooli ‘twasandulwa’ alubo tuyooleka kuzonda bamwi.

Nzweelede Kuchita:

Lilange-lange kuchitila kuti ubone mbuubabona ambulimvwa atala abamwi bantu, kapati bawumwi musyobo naakuti bakuliimwi nyika. Libuzye kuti: ‘Ndibabona biyeni? Maboneno ngindilaawo atala abantu aaba ayeeme atala ambundibazi na naakuti ngakusaluula?’ Leka kweebela mavidiyo, mamuvi naakuti kulikondelezya azintu zisumpula muzeezo wakuzondana akulwana.

Jwi lyaLeza lilakonzya kutugwasya kuti tuzunde penzi lyakuzondana kuli mumyoyo yesu amumizeezo yesu

Teekuba pe kulibuzya makani aachoonzyo atala ambutulimvwa chiindi nitulilanga-langa. Pesi Jwi lyaLeza lilakonzya kutugwasya “kuzyiba mizeezo amakanze aamumoyo.” (Bahebrayo 4:12) Kkala kuubala Bbayibbele. Yezya kuyezyanisya nzubala anziliyiisya mpawo ubeleke changuzu kuti nzuyeeya zyeendelane anziliyiisya. Jwi lyaLeza lilakonzya kutugwasya kuti tuzunde mizeezo yakuzondana ‘miyumu nta’ iikkalilide mumizeezo amumyoyo yesu.—2 Bakorinto 10:4, 5.

Zyakachitika Mubuumi—STEPHEN

Wakachincha Mbakali Kuyeeya

Stephen abamumpuli yabo bakali kuzondwa amakuwa. Eezi zyakapa kuti aliswaanizye akamwi kabunga kabazyapolitikisi kakali kulwanina zyeelelo zyabantu. Mukuya kwachiindi, Stephen wakazootalika kuchita zintu zitondeezya kuti ulabazonda bamwi. Wakaamba kuti: “Chimwi chiindi abeenzuma twakali kweebela mavidiyo aachiindi aatondeezya bantu baku-United States kabali kupenzya bazike bamuAfrica. Eezi zyakali kutunyemya zyakuti mpawaawo twakali kunoonga twawuma makuwa bachikula mbitwakali kunoonga tulikweebela aamwi. Kuzwa waawo, twakalikweenda mumyuunzi ilaafwiifwi katuyanduula makuwa kuti tubawume aambabo.”

Stephen wakachincha zitachiti pe chiindi naakasaanguna kwiiya Bbayibbele aBakamboni baJehova. Wakaamba kuti: “Ndakakomena kandisaluulwa, pesi nzindakabona aakati kaBakamboni baJehova zyakandigambya. Muchikozyano, mukuwa kuti waya kundawu iilikule wakali kusiila muntu uusiya bana bakwe. Imwi mpuli yamakuwa yakabweza umwi mulombe uusiya wakali kuyanduula ndawu yakukkala.” Stephen wakabona kuti Bakamboni baJehova nimpuli iiyandana alubo bazuzikizya majwi aaJesu aakuti maKristu banootondeezyania luyando.—Johane 13:35.

Niinzi chakagwasya Stephen kuti aleke kuzonda bamwi? Wakagwasigwa alugwalo lwa Baroma 12:2. Wakaamba kuti: “Ndakabona kuti ndakeelede kuchincha mbundakali kuyeeya. Teendakeelede kujinkila akuchita zintu zipa kuti kube luumuno luzutu pe pesi ndakeelede kubona kuti eeyi ninzila mbotu yakupona aayo.” Lino Stephen ulikubotelwa nkaambo waba aminyaka yiinda ku40 kazundide penzi lyakuzondana.