Ulakonzya kulibambila lino kuti uzooyelele kupona munyika mpya
Nyika Mpya yaParadayizi Yabaafwiifwi!
Leza wakalenga nyika kuti bantu baluleme bakkale mulinjiyo kukabe kutamani. (Intembauzyo 37:29) Wakabikka bantu bakusaanguna, Adamu aEva mumuunda waEdeni, kuti bawulime akuulangania kabalaamwi abana babo.—Matalikilo 1:28; 2:15.
Zintu zilikuchitika munyika mazubaano, zilisiyene anzyaakakanzide Leza. Pesi Leza tanachincha pe makanze aakwe. Uzoozizukizya biyeni nzyaakakanzide chiindi? Mbuli mbutwabona muzyiiyo zyayinda, Leza tazooyinyonyooni pe nyika eeyi. Pesi uzoopa kuti ikkalwe aabantu basyomeka. Munyika kuzooba biyeni Leza aazoozuzikizya chisyomezyo eechi?
Mfulumende iizooyendelezya nyika yoonse
Nikwazooyendelezya Bwaami bwaLeza, bantu bazoobotelwa nkaambo banoojisini kabachita zintu zibotu akubeleka milimu njibayanda. Leza wakasala Jesu kuti abe Mwaami waBwaami bwakwe. Kusiyana abeendelezi bamazubaano, Jesu unoobayanda bantu. Unooyendelezya munzila yaluyando, kalaaluzyalo alubo tanoosaluuli pe.—Isaya 11:4.
Kujatana munyika yoonse
Bantu batazookkale munyika mpya, tabanoosaluulani pe akaambo kankubazwa naakuti musyobo. Bantu boonse bayoojatana. (Ciyubunuzyo 7:9, 10) Bantu boonse banoomuyanda Leza alubo banooyandana kabakkala muluumuno alubo banoobelekelaamwi kuti bazuzikizye makanze aaLeza aakulangania nyika.—Intembauzyo 115:16.
Nyika iyookkalika
Kwaakweendelezya Bwaami bwakwe, Leza uyoopa kuti bwiime bwakunze bube kabotu. (Intembauzyo 24:1, 2) Naakali aanyika Jesu, Leza wakamupa manguzu aakuti awumuzye guwo. (Marko 4:39, 41) Kwanooyendelezya Kristu, taakwe muntu uutanooyoowe mapenzi aalichitikila. Kwaakweendelezya Bwaami bwaLeza, bantu bayooba aaluumuno abanyama alubo tabachinoonyonyooni nyika pe.—Hosea 2:18.
Kuba aamibili iitakwe chibi amandunduundu aachakulya
Bantu boonse bayooba aamibili iitakwe chibi. Taakwe muntu uutanoochiswe, kuchembaala akufwa. (Isaya 35:5, 6) Bantu bazookkala munyika mbotu loko iili mbuli muunda waEdeni. Munyika mpya, kunooli mbuli mumuunda waEdeni nkaambo bantu banootebula kakutakwe uubula chakulya. (Matalikilo 2:9) Mbuli maIsrayeli, bantu boonse banooli muParadayizi bayoolya ‘cakulya cabo akukkuta.’—Levitiko 26:4, 5.
Luumuno akukwabililwa
Nikwazooyendelezya Bwaami bwaLeza, bantu munyika yoonse bazoobotelwa muluumuno alubo banoojata bamwi munzila iilikabotu. Takunoolikwe nkondo, kujatwa chalunya alubo tatunoofwabilili biya pe kuti tujane chakulya. Bbayibbele lyaamba kuti: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya.”—Mika 4:3, 4.
Maanda mabotu amilimu njibayanda bantu
Bantu boonse bazooba aamaanda mabotu alubo tabanoobelekeli kabuyole pe. Bbayibbele lyaamba kuti bantu batazookkale munyika mpya tabanoobelekeli “maliminya pe.”—Isaya 65:21-23.
Bantu bayoojana lwiiyo lwachoonzyo
Bbayibbele lyaamba kuti: “Nyika iyoozula luzyibo lwa Jehova.” (Isaya 11:9) Bantu batazookkale munyika mpya, bazooyiya atala abusongo bwaMulengi wabo Jehova azintu zibotu nzyaakalenga. Tabakapangi zilwanisyo pe naakuti kuchisa bamwi bantu. (Isaya 2:4) Bayookkala muluumuno alubo bayoobelekelaamwi kuti bayilanganie kabotu nyika.—Intembauzyo 37:11.
Kupona kukabe kutamani
Jehova wakabeleka changuzu kuti abikke zintu munyika zipa kuti tubotelwe mubuumi. Uyanda kuti bantu bazookkale aanyika mane kukabe kutamani. (Intembauzyo 37:29; Isaya 45:18) Kuti azoozuzikizye makanze ngakalaawo kuzwa chiindi, Leza “uyoolumena lufwu mane kukabe kutamani.” (Isaya 25:8) Bbayibbele lyaamba kuti: “Lufwu talukabi limbi, akwalo koomoka, kulila nokuba kucisa takukabi limbi pe.” (Ciyubunuzyo 21:4) Leza uzoopa kuti bantu boonse batazoofutuke nikwazoonyonyoonwa basizibi abatazoobusigwe bazoopone kukabe kutamani.—Johane 5:28, 29; Milimo 24:15.
Mamiliyoni aabantu balikulibambila mbubatazoopone munyika mpya. Nikuba kuti balaachibi, balikweezya amanguzu aabo woonse kuti bazooyelele kukkala munyika mpya. Balikuzichita biyeni? Kwiinda mukwiiya atala aJehova Leza aJesu Kristu.—Johane 17:3.
Bona nzweelede kuchita kuti uzoofutuke akuti uzookkale munyika mpya. Kumbila kuti wiiye Bbayibbele awumwi waBakamboni baJehova kutabbadali pe.