Gwasya Bamwi Kuti Balisimye Muziindi Zyamapenzi

1. Chiindi chiingi Jehova uzisandula biyeni nkombyo zyababelesi bakwe?

WALIZI na kuti ulakonzya kubelesegwa aaJehova kuti usandule nkombyo yawumwi? Tazikwe ndaba pe kuti tuli baalu, babelesi bambungano, mapayona, bapati, baniini, bakwesu naakuti bachizi, toonse tulakonzya kubelesegwa aaJehova kugwasya bamwi. Kuti muntu uuyanda Jehova wakomba kulinguwe kali kulilila kugwasigwa, chiindi chiingi Leza ubelesya baalu abamwi babelesi bakwe basyomeka kuti ‘bawumbulizye’ muntu ooyo. (Kol. 4:11) Nchilongezyo chipati kaka kubeleka aaJehova abakombima mumulimu ooyu wakugwasya bamwi bali mumapenzi. Tulakonzya kutola lubazu mumulimu ooyu chiindi nikwabbuka malwazi, mapenzi aalichitikila anikwaba kupenzegwa.

GWASYA BAMWI NIKWABBUKA BULWAZI

2. Nkamboonzi nikukonzya kutuyumina kugwasya bamwi chiindi nikwabbuka bulwazi?

² Kuti kwabbuka bulwazi nga kwayuma kuti tugwasyanie. Muchikozyano, tulakonzya kuba achiyandisyo chakuswaya beenzuma, pesi eezi zilakonzya kutunjizya mumapenzi. Chimwi chiindi tulakonzya kulimvwa katuyanda kutamba bamwi balaapenzi lyamali kuti tuzoolyaamwi, pesi kuchita oobo kulakonzya kutunjizya mupenzi. Chimwi chiindi tulakonzya kuba aachiyandisyo chakugwasya bamwi, pesi nga tulaabamwi bamumpuli balikuchiswa. Nikuba oobo, tweelede kubagwasya bakwesu abachizi alubo Jehova ulabotelwa kuti twachita zyoonse nzitukonzya kuti tubagwasye. (Tus. 3:27; 19:17) Pesi kujana twabagwasya biyeni?

3. Twiiyaanzi kuzwa kubaalu bamumbungano yamuchizi Desi? (Jeremiya 23:4)

³ Nzibakonzya kuchita baalu. Kuti kuli mwaalu buzibe kabotu butanga bwako. (Bala Jeremiya 23:4.) Muchizi Desi, waambidwe muchiiyo chayinda, wakati, “Baalu bali mukabunga kesu kakukambawuka bakali kuzwaamwi andime mumulimu wakukambawuka alubo bakali kujana chiindi chakubaamwi andime katulikulikondelezya.”b Nzibakachita baalu zyakapa kuti kubawubile kugwasya muchizi Desi chiindi nikwakabbuka bulwazi bwakkorona anaakasweekelwa babbululu bakwe akaambo kabulwazi oobu.

4. Niinzi chakapa kuti baalu bakonzye kugwasya Desi, alubo twiiyaanzi?

⁴ Muchizi Desi wiinkilila kunembo kwaamba kuti, “Akaambo kakuti baalu ndakali kubabona mbuli beenzuma, kwakanduubila kuti ndibabuzye mbundakali kulimvwa azyakali kundikataazya.” Baalu kujana bayiyaanzi kumakani aaya? Amweembele baabo bali munsi lyanu mapenzi kaatanasika. Ba mweenzinyina wabaabo bali munsi lyako. Kuti malwazi aabbuka kalikukukachizya kuti ubaswaye, belesya zimwi nzila zyakuti waambuuzyanie aabo. Muchizi Desi wakaamba kuti, “Baalu bakali kundifoonena akundilembela magwalo. Mavesi ngibakali kundaabila akali kundisika aamoyo nikuba kuti ndakalaazi kale.”

5. Niinzi nzibeelede kuchita baalu kuti bazibe zintu zilikukataazya bakombinyina alubo kujana babagwasya biyeni?

⁵ Imwi nzila iikonzya kutugwasya kuti tuzibe zilikukataazya bakwesu abachizi, nkubabuzya mibuzyo munzila yabupampu. (Tus. 20:5) Balaachakulya na, minsamu azimwi zintu ziyandikana? Tabali mupenzi lyakusweekelwa aamulimu naakuti busena bwakukkala? Bayanda kugwasigwa kuyoolembesya kumitabi yamfulumende iigwasya bantu na? Desi wakagwasigwa abakombinyina. Nikuba oobo, lugwasyo ndubakamupa baalu kuti atakaatazikani loko akuti asime mubukombi lwakamugwasya kuti alisimye mumapenzi. Muchizi Desi waamba kuti: “Baalu bakakomba aamwi andime. Tandichiyeede kuti bakatyeni pesi nzindichiyeede nzyakuti ndakamvwa mbuli kuti Jehova wakali kundibuzya kuti, ‘Tawuli aawulikke pe.’”—Is. 41:10, 13.

6. Niinzi nzibakonzya kuchita bamwi mumbungano kuti tugwasyanie? (Langa chifanikisyo.)

⁶ Nzibakonzya kuchita bamwi. Nisimpe kuti tulangilila kuti baalu batunge kunembo. Pesi Jehova uyanda kuti toonse tusungwaazyanie akuti tugwasyanie. (Gal. 6:10) Naaba majwi mache biyo aatondeezya luyando alakonzya kubasimya bamwi batamvwide kabotu. Mwana ulakonzya kutumina kkaadi naakuti kudilowa pikicha akuyitumizya kumukwesu uutamvwide kabotu. Uuchikula ulakonzya kuchijaana-chijaana kuti agwasye muchizi wakomena. Bamwi balakonzya kujika chakulya mpo bachitolele umwi uutamvwide kabotu. Kwaamba choonzyo, kuti kwabbuka bulwazi, muntu woonse mumbungano nga wayanda kusungwaazigwa. Nkinkaako, tulakonzya kunonoka mbichaani kweenda niyamana miswaangano kuchitila kuti twaambuuzyanie abakombima mulomo mpande naakuti katubelesya vidiyo kkoolu. Baalu ambabo bayanda kusungwaazigwa. Bamwi bakwesu nga batumina tukkaadi twakulumba kubaalu babeleka changuzu chiindi nikwabuka bulwazi. Nchintu chibotu loko kuti toonse twiinkilile “kunembo kusungwaazyania akuyakana”!—1 Tes. 5:11.

GWASYA BASIKILWA AAMAPENZI ALICHITIKILA

7. Mbuubuli buyumu-yumu bweetwa akaambo kamapenzi aalichitikila?

⁷ Mapenzi aalichitikila alakonzya kuchincha buumi bwamuntu mukulaba kwaliso. Bantu basikilwa aamapenzi aalichitikila balakonzya kusweekelwa aazintu zyabo, myuunzi yabo naakuti babbululu babo. Mapenzi aalichitikila taasali pe alakonzya kubasikila bakombima. Niinzi nzitukonzya kuchita kuti tubagwasye?

8. Baalu amitwe yampuli beelede kuchitaanzi mapenzi kaatanasika?

⁸ Nzibakonzya kuchita baalu. Nibaalu amugwasye bakombinyokwe kuti balibambile, mapenzi kaatanasika. Basikupupulula balizizi na nzibeelede kuchita kuti bakkale kabakwabililidwe? Balaawo na manamba aakufoonena baalu kuti zintu zyabija? Muchizi Margaret waambwa muchiiyo chayinda, wakaamba kuti: “Baalu bakapa ziyandikana zyambungano akutuchenjezya kuti chiindi chakutentezya masaka teechakali nayinda pe. Bakaamba kuti, kuti twabona kuti zintu zyabija naakuti twamvwa balupati-pati kabati tulonge, tweelede kufwambaana kubweza ntaamu tuchije.” Makani aayo akasika aachiindi cheelede, nkaambo mumviki zili 5 zyakazootobela kwakaganduuka mulilo mupati. Aachiindi chakukomba kwampuli, mitwe yampuli ilakonzya kulanga-langa zyeelede kuchitwa awumwi mumpuli. Kuti mwalibambila kamuli mpuli, muyoobatama mapenzi naasika.

9. Baalu beelede kuchitaanzi kuti bakonzye kubelekelaamwi chiindi nikwaba mapenzi aalichitikila?

⁹ Kuti kuli mulangizi wakabunga, toyelede kulindila kusikila mapenzi asike. Weelede kuba aamakani aakkwene aachoonzyo aabantu boonse bali mukabunga kako. Ulakonzya kwaalemba aansi mpawo uwabambulule kuti kakuyandikana kuchita oobo. Kuti wachita oobo, ziyookuubila loko kujata sikupupulula umwi awumwi kuchitila kuti umvwe mbayanda kugwasigwa chiindi nikwabuka mapenzi. Nzutabuzigwe abasikupupulula ulakonzya kuzibuzya mulangizi wakabunga kabaalu, ooyo uutazibisye mulangizi wabbazu. Kubelekelaamwi koonse ooku kuyoogwasya loko. Nikwakaba mulilo mupati, mulangizi wabbazu wamuchizi Margaret taakoona pe kwama-awa aali 36. Wakali kugwasyania abaalu kuti balanganie bakombinyina bali 450 bakali bachija myuunzi yabo. (2 Kor. 11:27) Nkinkaako, boonse bakali kuyanda ndawu zyakukkala bakazijana.

10. Nkamboonzi baalu nibabona mulimu wakweembela kawuyandikana? (Johane 21:15)

¹⁰ Kugwasya bamwi kuti bakkalikane mumizeezo akuti basime mubukombi mulimu ngubeelede kuchita baalu. (1 Pet. 5:2) Nikwachitika mapenzi, baalu beelede kuba bakusaanguna kugwasya bakwesu abachizi kuti bajane chakulya, zyakuzwaata andawu yakukkala. Pesi mukuya kwachiindi, bakwesu nga bayanda kugwasigwa kuti batakataazikani loko akuti basime mubukombi. (Bala Johane 21:15.) Mukwesu Harold uubeleka muKkomiti yaMutabi wakaamba kuti: “Zitola chiindi kuti bakwesu abachizi bakasikilwa aamapenzi baleke kukataazikana. Chimwi chiindi balakonzya kuyeeya zintu zyabo ziyandikana nzibakasweekelwa, babbululu babo bakafwa ambubakasifwe kuti bafutuke. Mizeezo iili boobu ilakonzya kupa kuti bawuse chiindi achiindi. Kuti eezi zyachitika tazyaambi kuti tabakwe lusyomo pe.”

11. Mpuli kujana zyagwasigwa biyeni?

¹¹ Baalu beelede kulila “abaabo balila.” (Rom. 12:15) Bakwesu bafutuka mumapenzi beelede kugwasigwa kuti babe aachoonzyo chakuti Jehova abakombinyina balabayanda. Baalu beelede kugwasya mpuli kuti zitaleki kuchita milimu yabukombi, iiswaanizya kukomba, kubala Bbayibbili, kunjila miswaangano akutola lubazu mumulimu wakukambawuka. Baalu balakonzya kusungwaazya bazyali kuti bagwasye bana babo kuti babikkile maanu kuzintu zitanyonyooki. Nibazyali amuyeezye bana banu kuti Jehova unooliwo chiindi choonse kuti abagwasye mbuli Mweenzinyina. Alubo mweelede kubabuzya kuti bakombinyina nyika yoonse mbiizulwa banooliwo kuti babagwasye.

12. Niinzi nzibakonzya kuchita bamwi kuti bakagwasilizye kundawu kwachitika mapenzi? (Langa chifanikisyo.)

¹² Nzibakonzya kuchita bamwi. Kuti mapenzi aalichitikila achitika aafwiifwi ankukkala, buzya baalu atala achiyandisyo chako chakugwasilizya. Ulakonzya kugwasya bachitikilwa mapenzi naakuti basikulipeda kuyaka andawu yakukkala. Ulakonzya kubapa chakulya naakuti zimwi zyakugwasilizya. Kuti mapenzi achitika kundawu iili kule, ulakonzya kugwasilizya lubo. Biyeni? Kwiinda mukukombela bali mumapenzi. (2 Kor. 1:8-11) Ulakonzya kugwasilizya kumulimu wakugwasya bali mumapenzi kwiinda mukusanga kumulimu wamunyika yoonse. (2 Kor. 8:2-5) Kuti kukonzya kusika kundawu yachitikila penzi, buzya baalu atala achiyandisyo chako chakuyoogwasilizya. Kuti wakumbilwa kuti ukagwasilizye, ulakonzya kuyiisigwa mbukonzya kugwasilizya naakuti kubuzigwa nkuyelede kuyoogwasilizya.

GWASYA BAKOMBIMA KUTI BALISIMYE NIBAPENZEGWA

13. Mbuubuli buyumu-yumu mbubaswaana bakwesu bakkala kumanyika mulimu wesu nkutazumizigwi?

¹³ Mumanyika mulimu wesu mwaakayimikizigwa, kupenzegwa kupa kuti buumi buyume. Bakwesu bakkala kumanyika aayo baswaana mapenzi aamali, kuchiswa akufwidwa babbululu babo. Akaambo kakuti mulimu wesu wakakasigwa, kulakonzya kubayumina baalu kuswaya bayanda kusungwaazigwa. Eezi nzizyo zyakachitika kumukwesu Andrei waambwa muchiiyo chayinda. Umwi muchizi wamukabunga kakwe kakukambawuka wakalaapenzi lyamali. Muchizi ooyo wakazoobbewuka aamota alubo taakachili kubeleka. Nikuba kuti mulimu wesu wakali kasidwe akuti kwakali kkorona, bakwesu bakachita zyoonse nzibakonzya kuti kabamutola kuchibbadela kuyoosilikwa alubo Jehova wakalilangide.

14. Baalu kujana babagwasya biyeni bamwi kuti basyome Jehova?

¹⁴ Nzibakonzya kuchita baalu. Mukwesu Andrei wakakomba akuchita zyoonse nzyakonzya. Jehova wakanjilila biyeni? Wakapa kuti bakombinyina balaalwaangunuko lwakweendeenda banjilile. Bamwi bakabelesya moota zyabo kuti batole muchizi ooyu kuchibbadela. Bamwi bakagwasilizya amali. Jehova wakapa kuti bachite nzibakonzya kuti bagwasilizye alubo wakalongezya zintu zyoonse nzibakachita. (Heb. 13:16) Nibaalu kuti mulimu wesu wakasigwa, amupe bamwi zyakuchita kuti bamugwasye. (Jer. 36:5, 6) Kwiinda zyoonse, amusyome Jehova. Ulakonzya kumugwasya kuti mulanganie bakombima.

15. Niinzi nzitweelede kuchita kuti tubambe luumuno lwesu chiindi nikwaba kupenzegwa?

¹⁵ Nzibakonzya kuchita bamwi. Kuti mulimu wesu wakasigwa, tweelede kuchesya kweendeenda kwiinda mukubungana mutubunga tuniini. Kulayandikana kapati kuti tubambe luumuno. Tweelede kulwana Saatani, kutali kulwana chesu-chesu. Tutabikkili maanu kuzintu nzibapambanisya bamwi, pesi atufwambaane kubambulula kutamvwanana kunga kwaba. (Tus. 19:11; Ef. 4:26) Ba wakusaanguna kugwasya bamwi. (Tit. 3:14) Kubelekelaamwi nkubakachita bamukabunga kamukwesu Andrei kuti bagwasye muchizi wakali kuchiswa kwakapa kuti kabunga kajatane mbuli mpuli iimwi.—Int. 133:1.

16. Kweendelana aBakkolose 4:3, 18, kujana twabagwasya biyeni bakwesu balikupenzegwa?

¹⁶ Bakwesu abachizi biingi balikwiinkilila kunembo kukomba Jehova kazitakwe ndaba pe kuti mfulumende zilikukasya mulimu wesu. Bamwi balikusungwa akaambo kalusyomo lwabo. Tulakonzya kubakombela aamwi ampuli zyabo kuswaanizya abaabo balikubikka buumi bwabo mungoozi kuti babagwasye mubukombi, kumubili, akunkuta.c (Bala Bakkolose 4:3, 18.) Utabonaanga nkombyo zyako tazikonzyi kugwasya!—2 Tes. 3:1, 2; 1 Tim. 2:1, 2.

17. Kujana walibambila biyeni kakutanasika kupenzegwa?

¹⁷ Ulakonzya kulibambila lino aamwi ampuli yako kupenzegwa kakutanasika. (Mil. 14:22) Utayeeyeli zintu zibi zyoonse zikonzya kuchitika. Pesi simya bweenzinyokwe mbulaabo aJehova alubo ugwasye bana bako kuchita zikozyenie. Kuti wamvwa kukataazikene, komba kuli Jehova. (Int. 62:7, 8) Amwaambuzyaanie moonse mbuli mpuli twaambo tumupa kusyoma Jehova.d Kuti walibambila alubo wasyoma Jehova, bana bako bayooba aachibindi aluumuno chiindi mwaakupenzegwa.

18. Tulangililaanzi mumazuba aali kunembo?

¹⁸ Luumuno lwaLeza lupa kuti tukkalikane. (Flp. 4:6, 7) Jehova utupa luumuno lwakwe kuti atontozye myoyo yesu nikuba kuti kwabbuka bulwazi, kwaba mapenzi aalichitikila naakuti kupenzegwa. Jehova ubelesya baalu babeleka changuzu kuti batweembele. Alubo, toonse utupede chilongezyo chakuti tugwasyanie. Luumuno ndutulaalo lino luzootugwasya kunembo twaakuswaana amwi mapenzi mayumu naaba “mapenzi mapati.” (Mt. 24:21) Kuchiindi eecho, kuyooyandikana kuti tube aaluumuno akuti tugwasye bamwi kuti babaalo. Pesi chaakwiinda chiindi eecho, tatukaswaani lubo zyiimo zipa kuti tukataazikane. Tuyoopona mbuli mbaakali kuyanda Jehova. Tuyooba aaluumuno mane kukabe kutamani.—Is. 26:3, 4.