Mibuzyo Yabasikubala
Davida naakaamba majwi aali muli Intembauzyo 61:8 aakuti wakali kuzootembawula zina lyaLeza “kukabe kutamani” wakali kubonaanga tazoofwi na?
Inee. Nzyaakalemba Davida zyakali zyachoonzyo.
Atubone nzyaakalemba muvesi eeyi amulaamwi mavesi aakozyenie. Wakati: “Ndinakwiimba nyimbo zyakutembaula zina lyako lyoonse mane kukabe kutamani.” Ndilakutembaula amoyo wangu woonse, O Jehova Leza wangu, alimwi ndinoolemeka zina lyako lyoonse mane kukabe kutamani.” “Ndinootembaula zina lyako lyoonse alyoonse mane kukabe kutamani.”—Int. 61:8; 86:12; 145:1, 2.
Davida taakali kwaamba kuti tazoofwi pe. Wakalizi kuti Jehova wakali waamba kuti chibi nchibakalaacho bantu chakali kuzoopa kuti bafwe. Alubo Davida wakazumina kuti wakali aachibi. (Matl. 3:3, 17-19; Int. 51:4, 5) Alubo wakalizi kuti bakombi baLeza basyomeka bali mbuli Abrahamu, Izaka aJakkobo bakafwa. Alubo Davida wakalizi kuti wakali kuzoofwa. (Int. 37:25; 39:4) Pesi majwi ngaakaamba muli Intembauzyo 61:8 atondeezya kuti wakali aachiyandisyo chakutembawula Leza kufumbwa kachipona.—2 Sam. 7:12.
Chimwi chiindi Davida wakali kulemba zintu zyakalikumuchitikila mubuumi bwakwe. Tulazibona eezi, kwiinda mumutwe wamakani wa Intembauzyo 18, 51 a52. Muli Intembauzyo 23, Davida wakaamba Jehova kuti mweembeli uuzulwida, uulemutuzya alubo uukwabilila. Anguwe Davida wakali mweembeli. Alubo wakali aachiyandisyo chakubelekela Leza ‘mazuba oonse aabuumi bwakwe.’—Int. 23:6.
Tutalubi kuti Jehova nguwe wakazulwida Davida kuti alembe zintu zyoonse nzyaakalemba. Zintu nzyaakalemba zyakali kuswaanizya bupolofita bwakali kuzoozuzikizigwa kunembo. Muchikozyano, muli Intembauzyo 110 Davida wakaamba atala achiindi Mwaami wakwe, ‘naakali kuyookkala kujanza lyalulyo lyaLeza’ kujulu akutambula manguzu mapati. Kuti achiteenzi? Kuti azunde basinkondonyina baLeza alubo Bbayibbili lyaamba kuti Mwaami ooyo “uyoobeteka akwaapa mulandu masi” aanyika. Davida wakali syaanyinakulu waMesiya, ooyo wakali kuzooyendelezya kali kujulu alubo wakali kuzooba “mupaizi lyoonse mane kukabe kutamani.” (Int. 110:1-6) Jesu wakaamba kuti bupolofita buli muli Intembauzyo 110 bwakali kwaambuula atala anguwe akuti bwakali kuzoozuzikizigwa muchiindi chili kunembo.—Mt. 22:41-45.
Davida wakazulwidwa kulemba zintu zyakazuzikizigwa muchiindi nchaakapona aziyoozuzikizigwa muchiindi chili kunembo kuchiindi natakabusigwe akutembawula Jehova kukabe kutamani. Eezi zitondeezya kuti lugwalo lwa Intembauzyo 37:10, 11, 29 lwakali kwaamba zintu zyakali kuchitika muchiindi chama-Israyeli azintu zizoozuzikizigwa munyika yoonse muchiindi chili kunembo, aachiindi Leza natazoozuzikizye zisyomezyo zyakwe.—Langa fuka 8 muchiiyo chitii, “Uzooba Aandime Muparadayizi” mumagazini eeyi.
Intembauzyo 61:8, aamwi mavesi aakozyenie atondeezya kuti Davida wakali kuyanda kulemeka Jehova kuzwa chiindi nchaakapona kusikila chiindi naakali kuzoofwa. Alubo atondeezya kuti Davida uzookonzya kuchita oobo muchiindi chili kunembo, chiindi Jehova naazoomubusya.