“Mizeezo Yanu Ayikkale Kayibeleka Kabotu, Amulindile!”

1. Niinzi Jesu nzyaakabuzya basikwiiya bakwe atala amamanino alubo wakabachenjezyaanzi?

KAKUCHISYEEDE mazuba mache biyo kuti Jesu afwe, basikwiiya bakwe bali 4 bakamubuzya kuti: “Niinzi chitazoobe chitondeezyo . . . chamamanino aabwiime bwazintu?” (Mt. 24:3) Kweelede kuti basikwiiya aabo bakali kulibuzya kuti bakali kuzooziba biyeni kuti muunzi waJerusalemu wakali waba aafwiifwi kunyonyoonwa. Kali kubasandula, Jesu wakaambuula atala azintu zyakali kuzoobagwasya kuziba kuti muunzi waJerusalemu wakali waba aafwiifwi kunyonyoonwa kuswaanizya “aabwiime bwazintu” mbutuli kupona mazubaano. Naakali kwaambuula atala akumana kwabwiime bwazintu oobuno, Jesu wakati: “Taakwe muntu uubuzi pe buzuba naakuti awa nizitazoochitike zintu eezi, niziba ngilozi zili kujulu, naaba Mwana, pesi Taata.” Nkinkaako, wakachenjezya basikwiiya bakwe boonse kuti, ‘bakkale kabalangide’ akuti ‘bakkale kabalindide.’​—Mk. 13:32-37.

2. Nkamboonzi maKkristu bamumwaanda wamunyaka wakusaanguna nibakeelede kukkala kabalindide?

² MaKkristu bachiJuda bamumwaanda wamunyaka wakusaanguna bakeelede kukkala kabalangide. Kuchita oobo kwakali kuzoobagwasya kuti bafutuke. Jesu wakabuzya batobeli bakwe zintu zyakali kuzoobagwasya kuti bazibe chiindi muunzi waJerusalemu nwaakali kuzoonyonyoonwa. Wakaamba kuti: “mwaakubona muunzi waJerusalema kawuzyungulukidwe aamasoja, amuzibe kuti waba aafwiifwi kunyonyoonwa.” Aachiindi eecho, batobeli baJesu bakeelede kuswiilila nchenjezyo eeyo ‘akuchijila kuzilundu.’ (Lk. 21:20, 21) Aabo bakaswiilila nchenjezyo eeyo bakafutuka chiindi maRoma nibakanyonyoona muunzi waJerusalema.

3. Tulalanga-langaanzi muchiiyo eechi?

³ Tulikupona kumamanino abwiime bwazintu bwanyika eeyi mbi. Nkinkaako, mizeezo yesu yeelede kukkala kayibeleka kabotu alubo tweelede kukkala katulindide. Muchiiyo eechi, tulabona mbutukonzya kuba aamaboneno aalikabotu kazitakwe ndaba pe azintu zibi zilikuchitika munyika, mbutukonzya kuzibikkila maanu zintu zilikuchitika ambutukonzya kuchibelesya kabotu chiindi chesu chisyeede.

BAAMABONENO AALIKABOTU CHIINDI NUUBONA ZINTU ZILIKUCHITIKA MUNYIKA

4. Nkamboonzi nitweelede kuba aachiyandisyo chakuziba zintu zilikuchitika munyika?

⁴ Zintu zilikuchitika munyika zitugwasya kubona mbubuli kuzuzikizigwa bupolofita bwamuBbayibbili. Muchikozyano, Jesu wakaamba zintu zyakali kuzootugwasya kubona kuti nyika yaSaatani yaba aafwiifwi kuyoonyonyoonwa. (Mt. 24:3-14) Mwaapostoli Petro wakaamba kuti tubikkile maanu kukuzuzikizigwa kwabupolofita kuchitila kuti lusyomo lwesu lukkale kalusimide. (2 Pet. 1:19-21) Bbuku lyamamanino lyamuBbayibbili lisaanguna aamajwi aakuti: “Chiyubunuzyo chaJesu Kkristu, nchaakapegwa aaLeza kuti atondeezye bazike bakwe zintu zyeelede kuchitika muchiindi chifwiifwi.” (Chi. 1:1) Nkinkaako, tuli aachiyandisyo chakuyanda kuziba zintu zilikuchitika munyika akubona kuti zibuzuzikizya biyeni bupolofita buli muBbayibbili. Chiindi nizichitika zintu eezi, nga twaba aachiyandisyo chakubuzya bamwi.

5. Niinzi nzitweelede kutantamuka alubo niinzi nzitweelede kuchita? (Langa zifanikisyo)

⁵ Chiindi nitwaambuula atala abupolofita bwamuBbayibbili, tatweelede kwaamba zintu nzitutaakwe choonzyo pe atala zitazoochitike. Nkamboonzi? Nkaambo tatuyandi pe kwaamba zintu zikonzya kupa kuti mumbungano kutabi kujatana. Muchikozyano, tulakonzya kumvwa beendelezi banyika kabali kwaambuula atala ambubakonzya kubambulula kumwi kutamvwanana akupa kuti kube luumuno akulyiiba. Kwiinda kuti tuyeeyele kuti makani aayo azuzikizya bupolofita buli muli 1 Batesalonikka 5:3, tweelede kweendela aamwi akumvwisisisya kupya. Kuti nzitwaambuula zyazwa mumabbuku aapupululwa aambunga yaJehova, tulapa kuti mbungano ijatane akuti ibe “aamuzeezo uumwi.”​—1 Kor. 1:10; 4:6.

6. Twiiyaanzi kuzwa kulugwalo lwa 2 Petro 3:11-13?

⁶ Bala 2 Petro 3:11-13. Nzyaakalemba mwaapostoli Petro zilatugwasya kuti tube aamaboneno aalikabotu chiindi nitulanga-langa bupolofita bwamuBbayibbili. Wakalemba kuti tweelede kuyeeyesesya “kubawo kwabuzuba bwaJehova.” Kuyeeyesesya buzuba bwaJehova teekweezya kuyanduula “buzuba a-awa” Jehova natazooyete Amagedoni, pesi nkuchibelesya kabotu chiindi chesu chisyeede kuti tuchite milimu “iisalala yakulijata amumichito yakulipeda kuli Leza.” (Mt. 24:36; Lk. 12:40) Mulaamwi majwi, tuyanda kuba bantu balijata munzila iilikabotu alubo bachita zintu zitondeezya kuti tulamuyanda Jehova. Kuti tukonzye kuchita zintu eezi, tweelede kuchenjelela zintu zikonzya kutupambanisya.

ZYAAMBAANZI KULICHENJELELA?

7. Muntu uulichenjelela uchita biyeni? (Lukka 21:34)

⁷ Jesu wakabuzya basikwiiya bakwe kuti bachenjelele zintu zilikuchitika munyika akuti balichenjelele lwabo. Zintu eezi wakazyaamba mulugwalo lwa Lukka 21:34. (Bala.) Jesu wakati: “Amulichenjelele.” Muntu uulichenjelela ulafwambaana kubona zintu zikonzya kupambanisya bweenzinyina mbwalaabo aJehova alubo ulabweza ntaamu kuti azitantamuke. Kuchita oobo, kupa kuti muntu ooyo akkale kali muluyando lwaLeza.​—Tus. 22:3; Jud. 20, 21.

8. Njiili nchenjezyo mwaapostoli Pawulu njaakapa maKkristu?

⁸ Mwaapostoli Pawulu wakabuzya maKkristu kuti balichenjelele. Muchikozyano, wakabuzya maKkristu baku-Efeso kuti: “Amuchenjelele kuti nzila njimweendaayo itabi mbuli yabafuba-fuba pe, pesi ibe mbuli yabasongo.” (Ef. 5:15, 16) Saatani ulikweezya kumana bweenzuma mbutulaabo aJehova. Nkinkaako, Bbayibbili litusungwaazya kuti, twiinkilile “kunembo kumvwisisisya kuti kuyanda kwaJehova niinzi,” kuchitila kuti tukonzye kulikwabilila kutukole twaSaatani.​—Ef. 5:17.

9. Niinzi zitatugwasye kuti tumvwisisisye kuyanda kwaJehova?

⁹ Bbayibbili talizyaambi pe zintu zyoonse nzitweelede kuchenjelela, zikonzya kupambanisya bweenzuma mbutulaabo aJehova. Chiindi chiingi nituyanda kusala zimwi zintu nga twaswaana zyiimo zitakwe milawu ilaantanganana yamuMagwalo. Kuti tukonzye kusala munzila yabusongo, tweelede kumvwisisisya “kuyanda kwaJehova.” Tulakonzya kuchita oobo kwiinda mukubala Jwi lyaLeza akuyeeyesesya atala anzitubala. Kuti twamvwisisisya kuyanda kwaJehova alubo twaba “aamizeezo yaKkristu” kuyootuubila kweenda mbuli “basongo,” nikuba kuti chimwi chiindi nga taakwe milawu ilaantanganana iitubuzya nzitweelede kuchita. (1 Kor. 2:14-16) Zimwi nzitweelede kuchenjelela nga zili aantanganana pesi zimwi nga tazili aantanganana pe.

10. Nziizili zimwi zintu nzitweelede kuchenjelela?

¹⁰ Zimwi zintu nzitweelede kuchenjelela ziswaanizya makani akusaana aaluyando lwamuntu, kukolwa, kulisya, kwaambuula zintu zichisa bamwi, kulikondelezya aamisobano yabantu balwana, ponogilafu azimwi zintu zili boobu. (Int. 101:3) Sinkondoma Dyabbulosi, uliswini kuyanduula myeenya yakuti apambanisye bweenzuma mbutulaabo aaJehova. (1 Pet. 5:8) Kuti twaguna mubukombi, Saatani ulakonzya kubyala zintu zibi loko mumizeezo yesu zili mbuli munyono, kutasyomeka, kutangala, kuzondana, kulisumpula abukali. (Gal. 5:19-21) Kumasaangunino, zintu eezi zilakonzya kusaanguna kazili ziniini. Pesi kuti twanonoka kubweza ntaamu zilakomena akupa kuti tube bantu batali kabotu.—Jak. 1:14, 15.

11. Ndiilili limwi penzi litali aantanganana nditweelede kutantamuka alubo nkamboonzi?

¹¹ Limwi penzi litali aantanganana nditweelede kutantamuka nkumvwanana aabantu batali kabotu. Atuteedi ubeleka aamuntu uutali Kamboni, alubo uyanda kuti muntu ooyo abone kuti baKamboni baJehova mbantu balikabotu. Kumasaangunino, ulakonzya kuzumina kulyaawe chakulya aano aalya. Mpawo mukuya kwachiindi, ulasaanguna kulyaawe chiindi choonse. Chimwi chiindi muntu ooyo ulakonzya kwaambuula zintu zitasalali alubo ulakonzya kusala kutazibikkila maanu. Pesi mukuya kwachiindi ulakonzya kuzibila. Bumwi buzuba muntu ooyo ulakonzya kukutamba kuti mukalye kulesichuwalenti kamuli kufulwa moya. Mpawo kumamanino, ulakonzya kusaanguna kuyeeya mbuli nguwe. Ubonaanga zilatola chiindi chilamfu biyeni kuti usaangune kuchita zintu zitali kabotu nzyachita? Nikuba kuti tweelede kubafwida luzyalo bantu akubalemeka, pesi tatweelede kuluba pe kuti bantu mbitulibbizyaabo, balakonzya kutuchincha. (1 Kor. 15:33) Tweelede kulichenjelela mbuli mbaakaamba Jesu, tutamvwanani aabantu bataponi kweendelana azyeelelo zyaJehova. (2 Kor. 6:15) Tweelede kufwambaana kubona penzi mpawo tuleye.

CHIBELESYE KABOTU CHIINDI CHAKO

12. Niinzi nzibakali kuchita basikwiiya baJesu chiindi nibakali kulindila mamanino abwiime bwazintu?

¹² Basikwiiya baJesu teebakeelede kupeta maboko pe chiindi nibakali kulindila mamanino aabwime bwazintu. Jesu wakabapede mulimu wakuchita. Wakabalayilila kuti bakambawuke makani mabotu “muJerusalema, muJudiya yoonse amuSamariya, kusikila kundawu zili kule loko zyanyika.” (Mil. 1:6-8) Ooyu wakali mulimu mupati loko ngubakapedwe batobeli baJesu. Kukkala kabajisikini mumulimu ooyu, kwakabagwasya kuti bachibelesye kabotu chiindi chabo.

13. Nkamboonzi nitweelede kuchibelesya kabotu chiindi chesu? (Bakkolose 4:5)

¹³ Bala Bakkolose 4:5. Kuti tulichenjelele, tweelede kulanga-langa mbutuchibelesya chiindi chesu. Toonse tulakonzya kuchitikilwa “zintu zitalangililwi.” (Muk. 9:11) Tulakonzya kubuka katufwide.

14-15. Niinzi nzitweelede kuchita kuti tuchibelesye kabotu chiindi chesu? (Mahebberu 6:11, 12) (Langa chifanikisyo.)

¹⁴ Tulakonzya kuchibelesya kabotu chiindi chesu kwiinda mukuchita kuyanda kwaJehova akusimya bweenzuma mbutulaabo anguwe. (Joh. 14:21) Bbayibbili litubuzya kuti: “Amwiime nji, mutasunzuki pe alubo chiindi choonse kamuli aazyiingi zyakuchita mumulimu waMwaami.” (1 Kor. 15:58) Alubo kuti mamanino asika, kufumbwa kuti mamanino aayo ngabuumi bwesu naakuti ngabwiime bwazintu oobu bubi, tatukalisoli pe.​—Mt. 24:13; Rom. 14:8.

¹⁵ Mazubaano, Jesu ulikuzulwida basikwiiya bakwe chiindi nibakambawuka atala aBwaami bwaLeza munyika yoonse. Kabelesya mbunga yaJehova, Jesu ulikutuyiisya mbutweelede kukambawuka alubo ulikutupa zibelesyo zitugwasya kuti twaambilizye makani mabotu. (Mt. 28:18-20) Tweelede kuchita bbazu lyesu kwiinda mukuba basungu mumulimu wakukambawuka akuyiisya, akukkala katulangide chiindi nitulindila Jehova kuti anyonyoone bwiime bwazintu oobu bubi. Kubelesya malayilile aali muli Mahebberu 6: 11, 12, kutugwasya kuti tujatisisye kubulangilizi bwesu “kusikila kumamanino.”—Bala.

16. Ukanzide kuchitaanzi?

¹⁶ Jehova ubuzi kale buzuba a-awa natazoonyonyoone nyika eeyi yeendelezegwa aaSaatani. Buzuba oobu nibwazoosika, Jehova uzoozuzikizya bupolofita boonse bulembedwe muJwi lyakwe. Kwalino, tulakonzya kubonaanga mamanino anonoka. Pesi buzuba bwaJehova ‘tabukamuki pe.’ (Hab. 2:3) Nkinkaako, atukanze ‘kulangila kuli Jehova,’ kwiinda mukukkazika “moyo akulindila Leza walufwutuko” lwesu.​—Mik. 7:7.