Niinzi Nzituzi Atala Anzila Jehova Njazoobetekaayo Bantu Muchiindi Chilikunembo?

1. Nkamboonzi nitukonzya kwaamba kuti tulikupona muchiindi chikataazya loko?

TULI KUPONA muchiindi chikataazya loko. Buzuba abuzuba, tulikubona bupolofita bwamuBbayibbili kabuli kuzuzikizigwa. Muchikozyano, tulikubona “mwami wakumusanza” ‘amwami wakunyika’ kabali kulwanina bweendelezi. (Dan. 11:40) Makani mabotu aaBwaami bwaLeza alikukambawukwa munyika yoonse alubo mamiliyoni aabantu alikusala kubelekela Jehova. (Is. 60:22; Mt. 24:14) Alubo tulikujana chakulya chamubukombi chiingi “aachiindi cheelede.”—Mt. 24:​45-47.

2. Tulakonzya kuba aachoonzyo chanzi alubo niinzi nzitweelede kuziba?

² Jehova ulikwiinkilila kunembo kutugwasya kuti tumvwisisisye zintu ziyandikana zizoochitika lino-lino. (Tus. 4:18; Dan. 2:28) Tulakonzya kuba aachoonzyo chakuti mapenzi mapati naatazoosaangune, tunoozizi zintu zyoonse nzitweelede kuziba kuchitila kuti tukakkale katusyomeka akuti tukakkale katujisini muchiindi eechi chitanooli chiyumu. Nikuba oobo, tweelede kuziba kuti zimwi zintu zitazoochitike kunembo tatuzizi pe. Muchiiyo eechi, tulasaanguna kulanga-langa kuti nkamboonzi nitwakabambulula zintu nzitwakaamba atala azimwi zintu zitazoochitike kunembo. Mpawo tulabona zimwi zintu nzituzi zizoochitika kunembo alubo ambazootugwasya Taateesu uuli kujulu.

ZINTU NZITUTAZI PE

3. Ngaali maboneno ngitwakali aawo atala abantu batakombi Jehova alubo nkamboonzi nitwakali kuyeeya oobo?

³ Chiindi twakali kuyeeya kuti, kuti mapenzi mapati asaanguna, taakwe muntu wakali kukonzya kuzoojana mweenya wakusyoma muli Jehova akuti afutuke munkondo ya-Amagedoni. Twakali kuyeeya oobo akaambo kakuti twakali kuyeeya kuti zintu zyakachitika muchiindi chaZambangulwe nzizyo zizoochitika muchiindi chilikunembo. Muchikozyano, mbukunga taakwe muntu pe wakali kukonzya kunjila mubwaato Jehova kali wajala mulyango wabwaato, nkinkaako, twakali kuyeeya kuti mapenzi mapati natazoosaangune, taakwe muntu pe uzoosyoma muli Jehova akufutulwa.—Mt. 24:​37-39.

4. Nkamboonzi nitutakonzyi kwaamba kuti zintu zyoonse zyakachitika muchiindi chaNowa zyakali kwiiminina zintu zilikuzuzikizigwa mazubaano?

⁴ Kulikabotu na kwaamba kuti chintu chimwi achimwi chakachitika muchiindi chaZambangulwe chiiminina zintu zitazoochitike kunembo? Nsandulo njakuti, peepe. Nkamboonzi? Nkaambo Bbayibbili taakwe nilyaamba oobo pe.a Nichoonzyo kuti Jesu wakakozyanisya ‘mazuba aaNowa’ amazuba ngitulikupona. Pesi takaamba kuti zintu zyoonse zyakachitika mumazuba aaNowa zyakali kwiiminina zintu zitazoochitike kunembo mbuli chiindi Jehova naakajala mulyango wabwaato. Pesi, kuli zintu nzitukonzya kwiiya kulwaano lwaNowa aZambangulwe.

5. (a) Nowa wakatondeezya biyeni kuti ulaalusyomo muli Leza Zambangulwe kalitanasika? (Mahebberu 11:7; 1 Petro 3:20) (b) Kukambawuka kwakachitwa aaNowa kukozyenie biyeni akukambawuka nkutuchita mazubaano?

⁵ Chiindi Nowa naakamvwa mulumbe wanchenjezyo wakazwa kuli Jehova, wakatondeezya kuti ulaalusyomo muli Jehova kwiinda mukuyaka bwaato. (Bala Mahebberu 11:7; 1 Petro 3:20.) Munzila iikozyenie, bantu banga bamvwa makani mabotu aali atala aBwaami bwaLeza batondeezya kuti bali aalusyomo kwiinda mukubelesya zintu nzibayiya. (Mil. 3:​17-20) Petro wakaamba kuti Nowa “mukambawusi wabululami.” (2 Pet. 2:5) Nikuba oobo, mbuli mbutwakabona muchiiyo chakayinda, tatuzi pe kuti Nowa wakachita bbelekelaamwi na lyakuti akambawukile bantu boonse Zambangulwe kalitanasika. Mazubaano, tulikuchita mulimu wakukambawuka munyika yoonse alubo tuli basungu mumulimu ooyu. Nikuba kuti tweezya biyeni amanguzu eesu woonse kuti tukambawuke, tatukonzyi pe kukambawukila muntu woonse mamanino katanasika. Nkamboonzi?

6-7. Nkamboonzi nitukonzya kwaamba kuti tatukonzyi pe kukambawukila bantu boonse makani mabotu mamanino katanasika? Pandulula.

⁶ Atubone zintu Jesu nzyakaamba atala amulimu wakukambawuka. Wakaamba kuti makani mabotu aazookambawukwa “munyika yoonse kuti bube bukamboni kuzisi zyoonse.” (Mt. 24:14) Bupolofita oobu bulikuzuzikizigwa mazubaano kwiinda chiindi. Mulumbe waBwaami ulikupupululwa mumilaka yiinda ku1 000. Alubo akaambo kawebbusayiti yesu yajw.org, bantu biingi mazubaano balikwiiya makani mabotu aali atala aBwaami bwaLeza.

⁷ Nikuba oobo, Jesu wakabuzya basikwiiya bakwe kuti tabazookonzyi ‘kumaninsya kuzyunguluka myuunzi,’ naakuti kukambawukila muntu woonse we katanasika. (Mt. 10:23; 25:​31-33) Majwi aaJesu ngachoonzyo nikuba mazubaano. Mamiliyoni aabantu bakkala mundawu mulimu wesu wakukambawuka muutazumizigwi pe. Mukuyungizya, kuli bana biingi balikuzyalwa. Tubeleka changuzu kuti tukambawuke makani mabotu kubantu bakkala “kuzisi zyoonse akumisyobo yoonse akumilaka yoonse.” (Chi. 14:6) Pesi simpe ndyakuti, tatukonzyi pe kukambawukila bantu boonse makani mabotu mamanino katanasika.

8. Nguuli mubuzyo ngutukonzya kulibuzya atala anzila Jehova njatazoobabetekaayo bantu muchiindi chilikunembo? (Langa zifanikisyo.)

⁸ Kweendelana azintu nzitwayiya, tulakonzya kulibuzya kuti: Ani kutegwani atala abaabo bakatajana mweenya wakuti bamvwe makani mabotu mapenzi mapati katanasika? Jehova aMwanaakwe, ooyo ngwakapa mulimu wakubeteka, bazoobabeteka biyeni bantu aaba? (Joh. 5:​19, 22, 27; Mil. 17:31) Majwi aalugwalo luzulwida chiiyo eechi aamba kuti Jehova “taakwe ngwayanda kuti anyonyoonwe.” Pesi, uyanda kuti bantu “boonse basanduke.” (2 Pet. 3:9; 1 Tim. 2:4) Nkinkaako, tweelede kuziba kuti Jehova tanatuyubunwida pe nsandulo yamubuzyo ooyu. Alubo teezyoonse pe nzyayelede kutubuzya.

9. Jehova wakatubuzya atalaanzi muBbayibbili?

⁹ MuJwi lyakwe, Jehova wakatubuzya zimwi zintu nzyazoochita. Muchikozyano, Bbayibbili litubuzya kuti Jehova uzoobusya bantu ‘bataluleme’ bakatajana mweenya wakuti bamvwe makani mabotu akuti bachinche maponeno aabo. (Mil. 24:15; Lk. 23:​42, 43) Nkani eeyi ipa kuti tube aamibuzyo iiyandikana.

10. Njiili imwi mibuzyo njitukonzya kubaayo?

¹⁰ Bantu boonse batazoofwe muchiindi chamapenzi mapati banooli aabulangilizi bwakuzoobusigwa na? Magwalo atubikkila aantanganana kuti bantu bakazya Jehova kuswaanizya abaabo mbatazoonyonyoone kalaamwi amasooja aakwe munkondo ya-Amagedoni tabazoobusigwi pe. (2 Tes. 1:​6-10) Pesi kutegwani abamwi bantu, mbuli aabo bazoofwa muchiindi chamapenzi mapati akaambo kakuchiswa naakuti kuchembaala, kubbewuka naakuti kujeegwa aabamwi bantu? (Muk. 9:11; Zek. 14:13) Bantu bali boobu banooli aakati kabantu ‘bataluleme’ na bazoobusigwa munyika mpya? Simpe ndyakuti tatuzi pe.

ZINTU NZITUZI

11. Muchiindi cha-Amagedoni, bantu bazoobetekwa kweendelana aanzi?

¹¹ Tuzi zintu zyiingi zizoochitika muchiindi chilikunembo. Muchikozyano, munkondo ya-Amagedoni tulizi kuti bantu bazoobetekwa kweendelana anzila njibakali kubajataayo maKkristu bananikidwe. (Mt. 25:40) Aabo batazoobetekwe kabali mbelele nga bakatondeezya kuti bakagwasilizya maKkristu bananikidwe alubo aKkristu. Alubo tulizi kuti bamwi maKkristu bananikidwe banoochiliwo aanyika chiindi mapenzi mapati natazoosaangune alubo bazooyinka kujulu chiindi nkondo ya-Amagedoni kayili yaamba kusaanguna. Kufumbwa bamwi maKkristu bananikidwe kabachiliwo aanyika, bantu bali aamyoyo iibombede bazoojana mweenya wakuti babagwasilizye mumilimu njibachita. (Mt. 25:​31, 32; Chi. 12:17) Nkamboonzi makani aaya naayandikana?

12-13. Bamwi bazoochitaanzi nibazoobona “Bbabbiloni Mupati” kali kunyonyoonwa? (Langa zifanikisyo.)

¹² Mapenzi mapati kali asaanguna, kulakonzeka kuti bamwi bantu nibatazoobone “Bbabbiloni Mupati” kali kunyonyoonwa, bazoowamba kuti Bakamboni baJehova bakali kuzyaamba eezi kuti zizoochitika. Bamwi bazoochincha myoyo yabo na akaambo kazintu eezi zizoochitika?—Chi. 17:5; Ezk. 33:33.

¹³ Kuti bantu bazoochincha, kuzooba mbuli mbubakachita na bantu ku-Ijipita muchiindi chaMozesi? Amwi kunookozyenie. Chiindi ma-Israyeli nibakali kulonga, “nkamu mpati yabantu basiyene-siyene” yakabatobela. Kulakonzeka kuti bamwi babo bakaba aalusyomo muli Jehova chiindi nibakabona nchenjezyo Mozesi nzyaakali kwaambilizya zili atala aZipenzyo Zili 10 kazili kuzuzikizigwa. (Kul. 12:38) Munzila iikozyenie, kuti bantu bazoochincha nibazoobona Bbabbiloni Mupati kali kunyonyoonwa, tuzoonyema na katuyeeya kuti eezi tazili kabotu nkaambo bantu aaba bakali aamweenya wakuti bachinche mamanino katanasika? Peepe! Tuyanda kutobelezya buntu mbwalaabo Taateesu wakujulu, “silweetelelo asiluzyalo, uutafwambaani kunyema, uuzwide luyando lutamani akasimpe.”b—Kul. 34:6.

14-15. Nkani yakupona kukabe kutamani iyeeme aakuti muntu wakafwa lili na naakuti wakali kukkala kuli? Pandulula. (Intembauzyo 33:​4, 5)

¹⁴ Chimwi chiindi, mukwesu naakuti muchizi uuli aabbululu wakwe uutakombi Jehova, ulakonzya kwaamba kuti: “Kaansinga bbululu wangu wafwa mapenzi mapati katanasika kuchitila abe aabulangilizi bwakuzoobusigwa.” Amwi nga waamba majwi aaya akaambo kakuti ulamuyanda bbululu wakwe. Pesi, nkani yakupona kukabe kutamani tayiyeeme aakuti ndiilili muntu ooyo naafwa. Jehova Mubetesi uumaninide alubo ubeteka bantu munzila iiluleme. (Bala Intembauzyo 33:​4, 5.) Tulakonzya kuba aachoonzyo chakuti “Mubetesi wanyika yoonse” uzoochita zintu zilikabotu.—Matl. 18:25.

¹⁵ Nkani yakuti muntu akapone kukabe kutamani tayiyeeme aakuti muntu ooyo ukkala kuli. Tazikwe mutwe pe kuti Jehova akabeteke mamiliyoni aabantu kuti ‘nimpongo’ akaambo kakuti bakkala kunyika ooko bantu nkubakatajana mweenya pe wakumvwa mulumbe waBwaami. (Mt. 25:46) Mubetesi wanyika yoonse uululeme ulaandaba abantu aaba. Tatuzi pe kuti Jehova uzoozyeendelezya biyeni zintu muchiindi chamapenzi mapati. Zintu nzibazoobona kazili kuchitika muchiindi chamapenzi mapati zizoopa kuti bantu aabo bakabe aalusyomo muli Jehova chiindi nazoopa kuti zina lyakwe lizibikane kumuntu woonse uutanooli aanyika.—Ezk. 38:16.

16. Niinzi nzitwakaziba atala aJehova? (Langa chifanikisyo.)

¹⁶ Kwiinda mukubala Bbayibbili akuyanduulisisya nkutwakachita, twakaziba kuti bantu bayandikana loko kuli Jehova. Wakapa buumi bwaMwanaakwe kuchitila kuti toonse tube aabulangilizi bwakupona kukabe kutamani. (Joh. 3:16) Toonse twakabona mbatuyanda Jehova. (Is. 49:15) Ulimuzi umwi awumwi wesu azina lyakwe. Jehova ulituzi nikuba kuti twafwa, uzootubusya mbuli mbutwakabede akaambo kakuti talubi pe. (Mt. 10:​29-31) Tuli aatwaambo tubotu loko tutupa kuba achoonzyo chakuti Taateesu wakujulu siluyando uzoobeteka umwi awumwi munzila iilikabotu akaambo kakuti uli aabusongo, mululami alubo ulaaluzyalo.—Jak. 2:13.

17. Tuzoolanga-langaanzi muchiiyo chitobela?

¹⁷ Kumvwisisisya kupya ooku kupa kuti tubone kuti mulimu wesu wakukambawuka uyanda kuchitwa chakufwambaana. Nkamboonzi nitukonzya kwaamba oobo? Alubo niinzi zikonzya kupa kuti tube basungu mumulimu wakukambawuka? Mibuzyo eeyi izoosandulwa muchiiyo chitobela.