Baachoonzyo Chakuti Jehova Ulakuyanda

1. Niinzi chakapa kuti ulipede kuli Jehova? (Langa chifanikisyo.)

UCHIBUYEEYEDE na buzuba mbuwakalipeda kuli Jehova? Wakasala kuchita oobo akaambo kakuti wakali wamuziba akuti ulamuyanda. Wakamusyomezya kuti unoobikka nguwe mubusena bwakusaanguna mubuumi bwako akuti unooyinkilila kunembo kumuyanda amoyo wako woonse, abuumi bwako boonse, amizeezo yako yoonse amanguzu aako woonse. (Mk. 12:30) Kuzwa kuchiindi eecho, wakayungizya kumuyanda Jehova. Kujana wamusandula biyeni umwi muntu kuti wakubuzya kuti, “Ulaachoonzyo na chakuti ulamuyanda Jehova?” Ulafwambaana kumusandula muntu ooyo kuti, “Iiyi, ndilamuyanda kwiinda zintu zyoonse!”

2-3. Niinzi Jehova nzyayanda kuti tuzibe alubo tulalanga-langaanzi muchiiyo eechi? (Jeremiya 31:3)

² Kujana wasandula biyeni kuti umwi muntu wakubuzya kuti, “Ulaachoonzyo na kuti Jehova ulakuyanda?” Chimwi chiindi, tulakonzya kubonaanga tatweeleli pe kuti Jehova atuyande. Umwi muchizi wakakomezegwa munzila iitali kabotu, wakati: “Ndilizizi kuti ime ndilamuyanda Jehova, tandizumbuuzyi pe. Pesi chintu nchindizumbuuzya nchakuti, Jehova ulandiyanda na?” Niinzi chikonzya kutugwasya kuti tuzibe kuti Jehova ulaandaba andiswe?

³ Jehova uyanda kuti ube aachoonzyo chakuti ulakuyanda. (Bala Jeremiya 31:3.) Kasimpe kaliwo nkakuti, Jehova nguwe wakakukwelela kulinguwe. Chiindi nwakalipeda kulinguwe akubbabbatizigwa, Jehova wakakupa chipo chiyandikana loko, luyando lutamani. Eezi zyaamba kuti taakwe natazookulekelezye pe akaambo kakuti ukuyandisya loko. Luyando lwakwe lutamani, ndulo lupa kuti abone bakombi bakwe, kuswaanizya anduwe mbuli “lubono luyandisi.” (Malk. 3:17) Jehova uyanda kuti ube aachoonzyo chakuti ulakuyanda mbuli mbaakali aachoonzyo mwaapostoli Pawulu. Pawulu wakaamba kuti: “Ndili aachoonzyo chakuti lufu, naakuti buumi, naakuti ngilozi, naakuti mfulumende, naakuti zintu ziliwo lino, naakuti zintu zichiza, naakuti manguzu, naakuti bulamfu bwakuya mujulu, naakuti kubbila, naakuti chimwi chilenge, tazikonzyi pe kutwaanzaania kuluyando lwaLeza.” (Rom. 8:​38, 39) Muchiiyo eechi, tulalanga-langa kuti nkamboonzi nikuyandikana kuti tube aachoonzyo chakuti Jehova ulatuyanda akubona zikonzya kutugwasya kuti tube aachoonzyo chakuti Jehova ulatuyanda.

NKAMBOONZI NITWEELEDE KUBAACHOONZYO CHAKUTI JEHOVA ULATUYANDA?

4. Niinzi chikonzya kutugwasya kuti tulwane meeneno aaSaatani?

⁴ Kuti twasyoma kuti Jehova ulatuyanda, tulakonzya kuzunda imwi nzila ‘yameeneno’ aaSaatani. (Ef. 6:11) Makanze aaSaatani ngakuti tuleke kukomba Jehova. Imwi nzila Saatani njabelesya njakuti, Jehova tatuyandi pe. Saatani ubelesya myeenya yoonse kuti atweene. Chiindi chiingi natulwana, nchiindi nabona kuti tulikukataazikana akaambo kazintu zibi nzitwakachita chiindi, buyumu-yumu mbutuli kuswaana naakuti kukataazikana atala abuumi bwakunembo. (Tus. 24:10) Saatani uli mbuli mulavu uuluma munyama ngwaabona kuti takonzyi pe kulikwabilila. Nkinkaako, uleezya kutulwana chiindi nabona kuti tumanide manguzu kuchitila kuti tuleke kukomba Jehova. Pesi kuti twakkala katuli aachoonzyo chakuti Jehova ulatuyanda, kulatuubila kuti ‘tumulwane’ Saatani ameeneno aakwe.—1 Pet. 5:​8, 9; Jak. 4:7.

5. Nkamboonzi nikuyandikana kuti tuzibe kuti Jehova ulatuyanda alubo zitugwasya biyeni?

⁵ Kuti twasyoma kuti Jehova ulatuyanda, tulaswena aafwiifwi anguwe. Nkamboonzi nitukonzya kwaamba oobo? Jehova wakatulenga munzila yakuti tuyande bamwi akuti ambabo batuyande. Kuti umwi watutondeezya luyando, andiswe nga twamutondeezya luyando. Kuti twaziba kuti Jehova ulatuyanda akuti ulaandaba andiswe, zipa kuti tumuyande. (1 Joh. 4:19) Kuti twayungizya kumuyanda Jehova, anguwe ulayungizya kutuyanda. Bbayibbili lyaamba kuti: “Amuswene aafwiifwi aLeza, anguwe ulaswena aafwiifwi andinywe.” (Jak. 4:8) Niinzi chikonzya kutugwasya kuti tube aachoonzyo chakuti Jehova ulatuyanda?

NIINZI CHIKONZYA KUPA KUTI TUBE AACHOONZYO CHAKUTI JEHOVA ULATUYANDA?

6. Niinzi nzweelede kuchita kuti kuzumbuuzya kuti Jehova ulakuyanda?

⁶ Kkala kukomba kuli Jehova kuti akugwasye kuti ubone kuti nkamboonzi nakuyanda. (Lk. 18:1; Rom. 12:12) Ulakonzya kukomba kuli Jehova kwaziindi zyiingi mubuzuba kuti akugwasye kuti ulibone mbuli mbakubona. Chimwi chiindi, ulakonzya kulilangilaansi zyakuti ulabonaanga Jehova takuyandi pe. Pesi utalubi kuti Jehova mupati kwiinda moyo wako. (1 Joh. 3:​19, 20) Jehova ukuzi kabotu loko kwiinda mbulizi alubo ubona zintu nzutakonzyi kubona pe. (1 Sam. 16:7; 2 Mak. 6:30) Nkinkaako, ‘mwaambile zyoonse’ alubo umukumbile kuti akugwasye kuti usyome kuti ulakuyanda. (Int. 62:8) Chita kweendelana ankombyo zyako kwiinda mukuchita zintu zitobela.

7-8. Bbuku lya Intembauzyo litugwasya biyeni kuti tubone kuti Jehova ulatuyanda?

⁷ Syoma nzyaamba Jehova. Wakazulwida balembi baBbayibbili kuti bamupandulule mbuli mbabede chachoonzyo. Sintembawuzyo wakazulwidwa kuti alembe kuti: “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.” (Int. 34:18) Chiindi numanide manguzu, ulakonzya kubonaanga ulaawulikke. Pesi muziindi zili oobo, Jehova usyomezya kuti nga ulaafwiifwi abantu bamanide manguzu. Muliimwi ntembawuzyo, Davida wakalemba kuti: “Kobikka misozi yangu munkomo yako yacikutu.” (Int. 56:8) Jehova ulazibona chiindi nulikukataazikana. Ulaandaba anduwe alubo ulazibona zintu nzuswaana. Nga kuli mbuli kuti ulikwiibikka aaliimwi ndawu misozi yako mbuli mbubakali kuchita basilweendo chiindi nibakali kubikka maanzi munkomo yachikumba. Intembauzyo 139:3 niyakali kwaambuula atala aJehova yaamba kuti: “Ulizizyi kabotu nzila zyangu zyoonse.” Jehova ulazibona nzila zyesu zyoonse, pesi ubikkila maanu kuzintu zibotu nzituchita. (Heb. 6:10) Nkamboonzi? Akaambo kakuti ukubona kakuyandikana kubeleka changuzu nkutuchita kuti tuchite zintu zimubotezya.a

⁸ Jehova ubelesya Magwalo kuti atuumbulizye. Nga kuli mbuli kuti ulikwaamba kuti: “Ndiyanda kuti muzibe kuti ndilamuyanda akuti ndilaandaba andinywe.” Pesi mbuli mbutwayiya kumasaangunino, Saatani waamba manwa aakuti Jehova tatuyandi pe. Kuti wabonaanga Jehova takuyandi pe, ulakonzya kulibuzya kuti, ‘Ngwani ngundeelede kusyoma, ‘wisi wababeji’ na naakuti “Leza wakasimpe”?’—Joh. 8:44; Int. 31:5.

9. Jehova ubasyomezyaanzi aabo bamuyanda? (Kulonga 20:​5, 6)

⁹ Yeeyesesya atala ambababona Jehova aabo bamuyanda. Atubone nzyaakaamba Jehova kuli Mozesi akuma-Israyeli. (Bala Kulonga 20:​5, 6.) Jehova wakabasyomezya kuti unooyinkilila kunembo kabatondeezya luyando lutamani aabo bamuyanda. Majwi aaya atondeezya kuti akaambo kakuti Leza ulasyomeka, kuti twamuyanda anguwe ulatuyanda. (Neh. 1:5) Kuti wabonaanga Jehova takuyandi pe, libuzye kuti, ‘Ndilamuyanda na Jehova?’ Kuti kumuyanda alubo kweezya amanguzu aako woonse kuti uchite zintu zimubotezya, weelede kuba aachoonzyo chakuti ukuyanda loko. (Dan. 9:4; 1 Kor. 8:3) Mulaamwi majwi, kuti kutazumbuuzyi kuti ulamuyanda Jehova, nkamboonzi nuzumbuuzya kuti we ulakuyanda? Kuziba kuti Jehova nduyando akuti ulasyomeka, kupa kuti tutazumbuuzyi pe.

10-11. Jehova uyanda kuti tuchibone biyeni chinunuzyo? (Bagalatiya 2:20)

¹⁰ Yeeyesesya atala achinunuzyo. Jehova wakapa bantu chipo chiyandikana loko, chinunuzyo chaJesu Kkristu. (Joh. 3:16) Chipo eechi, chilakonzya na kugwasya umwi awumwi wesu kumugama? Iiyi. Atubone zyakachitikila mwaapostoli Pawulu. Wakali wachita zibi zipati katanaba muKkristu alubo wakeelede kwiinkilila kunembo kalwana kutamaninina kwakwe. (Rom. 7:​24, 25; 1 Tim. 1:​12-14) Pawulu wakabona kuti chinunuzyo nchipo chimugeme nchaakapegwa aaJehova. (Bala Bagalatiya 2:20.) Utalubi kuti Jehova nguwe wakazulwida Pawulu kuti alembe majwi aaya. Alubo zyoonse zilembedwe muBbayibbili, zyakalembelwa kuti zitugwasye. (Rom. 15:4) Majwi aaPawulu atondeezya kuti Jehova uyanda kuti ubone chinunuzyo kachili chipo chako kukugama. Kuti wachibona munzila eeyi chinunuzyo, ulaba aachoonzyo chakuti Jehova ulakuyanda lwako kukugama.

¹¹ Tulamulumba Jehova akaambo kakuti wakatuma Jesu kuti aze aanyika kuti azootufwide. Pesi kamwi kaambo kakapa kuti Jesu aze aanyika, nkakuti azoobuzye bamwi kasimpe atala aLeza. (Joh. 18:37) Kasimpe aaka kaswaanizya kuti Jehova ubayanda loko bana bakwe.

JESU WAKAYIISYA KUTI JEHOVA ULATUYANDA

12. Nkamboonzi nitukonzya kuzisyoma nzyaakaamba Jesu atala aJehova?

¹² Naakali aanyika, Jesu wakabuzya bantu mbabede Jehova. (Lk. 10:22) Tulakonzya kuzisyoma zintu nzyaakaamba Jesu atala aJehova. Jesu wakali waba aachiindi chilamfu kakkala aaJehova kujulu katanaza aanyika. (Kol. 1:15) Akaambo kakuti Jehova wakali kumuyanda Jesu, Jesu wakalizi kuti Jehova ubayanda loko bana bakwe basyomeka. Jesu wakabagwasya biyeni bamwi kuti babone kuti Leza ulabayanda?

13. Jesu uyanda kuti tumubone biyeni Jehova?

¹³ Jesu uyanda kuti tubone Jehova mbuli mbamubona. MuMabbuku Aamakani Mabotu, Jesu wakayita Jehova kuti “Taata” kwaziindi zyiinda ku 160. Naakali kwaambuula aabatobeli bakwe, wakabelesya mabala aakuti “Wuso” naakuti “Wuso wakujulu.” (Mt. 5:16; 6:26) Katanaza aanyika Jesu, bakombi baJehova bachiindi bakali kwiita Jehova amazina aakuti “Singuzuzyoonse,” “Mupatikampatila” akuti “Mulengi Mupati” aamwi mazina aakumulemeka. Pesi Jesu wakali kuvuzya kwiita Jehova kuti “Taateesu.” Bbala eeli litondeezya kuti Jehova uyanda kuti bakombi bakwe baswene aafwiifwi anguwe mbuli mbubachita bana kumawisi. Atubone zikozyano zibili Jesu mpaakabelesya bbala lyakuti “Taata.”

14. Jesu wakazitondeezya biyeni kuti umwi awumwi wesu ulayandikana kuli Taateesu wakujulu? (Mateyo 10:​29-31) (Langa chifanikisyo.)

¹⁴ Chakusaanguna, atubone nzyaakaamba Jesu muli Mateyo 10:​29-31. (Bala.) Tutiiti ntuyuni tuniini loko alubo taakwe nitutazoomukombe pe Jehova nikuba kumuyanda. Nikuba oobo, Taateesu ulakabikkila maanu nikaba katiiti kamwi kuti kawa. Zilaantanganana kuti Jehova ubabikkila maanu loko bakombi bakwe bamubelekela akaambo kakuti balamuyanda. Alubo Jesu wakaamba kuti Taateesu ulaazi kuti ngangane masusu aali mumitwe yesu. Kuti Jehova kabikkila maanu kutuntu tuniini tuli oobu, tulakonzya kuba aachoonzyo chakuti ulaandaba andiswe. Jesu uyanda kuti tube aachoonzyo chakuti umwi awumwi wesu ulayandikana kuli Taateesu wakujulu.

15. Majwi aali muli Johane 6:44 atubuzyaanzi atala aTaateesu wakujulu?

¹⁵ Atubone chikozyano chachibili Jesu mpaakabelesya bbala lyakuti “Taata.” (Bala Johane 6:44.) Taateesu wakujulu nguwe wakakugwasya kuti umuzibe akuti umuyande. Wakazichitilaanzi? Akaambo kakuti wakabona buntu bubotu buli mulinduwe. (Mil. 13:48) Chiindi Jesu naakaamba majwi aali muli Johane 6:44 kulakonzeka kuti wakali kwaamba majwi aaJehova aajanika muli Jeremiya 31:3. Mulugwalo oolu, Jehova wakali kubuzya bakombi bakwe kuti: “Ndakukwelela kulindime aluyando lutamani [naakuti ndazumanana kukutondezya luyando lutamani].” (Jer. 31:3; amakani aamunsi; yezyanisya a Hosea 11:4.) Zyaambaanzi eezi? Taateesu wakujulu, ukkala kabona zintu zibotu mulindiswe, nzitutakonzyi pe kubona swebo.

16. (a) Jesu wakatuyiisyaanzi alubo nkamboonzi nitweelede kumusyoma? (b) Niinzi chikonzya kutugwasya kuti tube aachoonzyo chakuti Jehova nguNdeende uulikabotu? (Langa kabbokesi katii, “Ngu Taata Uukonzya Kutugwasya Toonse.”)

¹⁶ Kwiinda mukwiita Jehova kuti Taateesu, mulaamwi majwi Jesu wakali kwaamba kuti: “Nikuba kuti Jehova nguTaata, nguWuso andinywe. Jehova ulamuyanda alubo ulaandaba amuntu umwi awumwi.” Kuti katuzumbuuzya kuti Jehova ulatuyanda, tweelede kulibuzya kuti, ‘Tandeelede kwaasyoma na majwi aaJesu uumuzi kabotu Taateesu alubo uukkala kaamba choonzyo?’—1 Pet. 2:22.

KKALA KULI AACHOONZYO CHAKUTI JEHOVA ULAKUYANDA

17. Nkamboonzi nitweelede kukkala katuli aachoonzyo chakuti Jehova ulatuyanda?

¹⁷ Tweelede kukkala katuli aachoonzyo chakuti Jehova ulatuyanda. Mbuli mbutwayiya, sinkondoma Saatani ulikweezya amanguzu aakwe woonse kuti tuleke kukomba Jehova. Kuti azwidilile kuchita eezi, unookkala kapa kuti tubonaanga Jehova tatuyandi pe. Tatweelede kwaaswiilila pe manwa ngaamba Saatani.—Job. 27:5.

18. Niinzi nzweelede kuchita kuti ukkale kulaachoonzyo chakuti Jehova ulakuyanda?

¹⁸ Kuti tube aachoonzyo chakuti Jehova ulatuyanda, tweelede kukkala katukumbila kuti atugwasye kuti tulibone mbuli mbatubona. Tweelede kukkala katuyeeyesesya Magwalo aatondeezya mbatuyanda Jehova. Tutalubi kuti Jehova ulabayanda aabo bamuyanda. Umwi awumwi wesu, weelede kubona chinunuzyo kachili chipo chakwe kumugama. Tweelede kuzisyoma nzyaakaamba Jesu atala aJehova kuti nguTaateesu wakujulu. Kuti umwi muntu wakubuzya kuti: “Ulaachoonzyo na chakuti Jehova ulakuyanda?” Ulamusandula kuti: “Iiyi, ndilaachoonzyo. Nzizyo zipa kuti kanditondeezya mbundimuyanda buzuba abuzuba.”