Matayo

22 Jesu wakabaingula alimwi muzikozyanyo kuti: 2 “Bwami bwakujulu buli mbuli muntu imwami, iwakabamba pobwe lyalukwatano lwamwanaakwe musankwa. 3 Mpoonya wakatuma bazike bakwe kuyooita aabo bakatambidwe kupobwe lyalukwatano, pele tiibakali kuyanda kuboola. 4 Alimwi wakatuma bazike abambi akubaambila kuti, ‘Amubaambile aabo batambidwe kuti: “Amubone! Ndabamba cakulya camasyikati, kwajaigwa basune abanyama bangu baneneede, alimwi azyintu zyoonse zyabambwa kale. Amuboole kupobwe lyalukwatano.”’ 5 Pele kakunyina kubikkila maano bakaunka kumbi, umwi kumuunda wakwe, umwi kumakwebo aakwe; 6 aabo bakacaala, bakajata bazike bakwe akubasampaula bamane babajaya.

7 “Pele mwami wakakalala akutuma basikalumamba bakwe, eelyo bakabanyonyoona bajayi aabo akuumpa munzi wabo. 8 Mpoonya wakaambila bazike bakwe kuti, ‘Ncobeni pobwe lyalukwatano lyabambwa, pele aabo batambidwe tiibali kweelela pe. 9 Aboobo kamuya kunzila zizwa mumunzi, mutambe kufwumbwa ngomuyoojana kuti aboole kupobwe lyalukwatano.’ 10 Aboobo bazike aabo bakaunka kunzila akubunganya antoomwe boonse mbobakajana, babi ababotu; eelyo ŋanda yabwiinga yakazula abantu aabo bakakkede kutebulu.

11 “Ciindi mwami naakanjila kulingula beenzu, wakabona mwaalumi umwi watakasamide cisani cabwiinga. 12 Aboobo wakamwaambila kuti, ‘Musa, ino wanjila buti omuno kotasamide cisani cabwiinga?’ Eelyo wakabula cakwaamba. 13 Lino mwami wakaambila babelesi bakwe kuti, ‘Amumwaange kumaanza akumaulu akumusowela anze mumudima. Ooko nkwayoolilila akulumina ntwino.’

14 “Mwami wakaita banji pele wakasala buyo basyoonto.”

15 Mpoonya ba Falisi bakaunka baakumvwana kuti bamujanine kaambo kumajwi aakwe. 16 Aboobo bakatuma basikwiiya babo, antoomwe abankamu ya Heloda kulinguwe, kabati: “O Mwiiyi, tulizyi kuti lyoonse waamba masimpe alimwi uyiisya nzila ya Leza mukasimpe, alimwi tolibotezyi kumuntu uuli woonse nkaambo tolangi ciimo camuntu. 17 Lino kotwaambila, Ino uyeeya buti? Sena cilizumizyidwe kutela mutelo kuli Kaisala naa pe?” 18 Kazyi Jesu mbobali babi myoyo, wakababuzya kuti: “Nkaambo nzi ncomundisunka nobasikuupaupa ameso? 19 Amunditondezye kkobili litelwa.” Eelyo bakamuletela dinali. 20 Wakabaambila kuti: “Ino eeci ncikozyanyo cani alimwi eeli ndizyina lyani?” 21 Bakati: “Nzizya Kaisala.” Mpoonya wakabaambila kuti: “Aboobo amupe Kaisala zyintu zya Kaisala, pele zyintu zya Leza amupe Leza.” 22 Lino nobakamvwa boobu bakagambwa, mpoonya bakamusiya, baunka.

23 Mubuzuba oobo ba Saduki, ibaamba kuti kunyina bubuke, bakaboola kulinguwe akumubuzya kuti: 24 “O Mwiiyi, Musa wakaamba kuti: ‘Ikuti mwaalumi wafwa katajisi bana, imwanookwabo weelede kukwata mukaintu wakwe akumuzyalila bana.’ 25 Lino kwakali babunyina bali ciloba mbotwakali limwi, eelyo wakusaanguna wakakwata, pele wakafwa katajisi mwana, mpoonya wakasiya mukaintu wakwe kumunyina. 26 Mbucakacitika oobu kuli wabili awatatu, kusikila boonse bali ciloba. 27 Mpoonya awalo mukaintu wakafwa. 28 Aboobo mububuke, ino uyooba mukaintu wani aali baaba bali ciloba? Nkaambo boonse bakalimukwete.”

29 Mukwiingula Jesu wakati kuli mbabo: “Mulisweekede nkaambo tamuzyi Magwalo naa nguzu zya Leza, 30 nkaambo mububuke baalumi tabakwati alimwi bamakaintu tabakwatwi, pele bali mbuli bangelo kujulu. 31 Kujatikizya bubuke bwabafwide, sena tiimwakabala nzyaakamwaambila Leza naakati: 32 ‘Ndime Leza wa Abulahamu a Leza wa Izaka a Leza wa Jakobo’? Tali Leza wabafwu, pele ngwabaumi.” 33 Naakamvwa boobo, makamu aabantu akagambwa ambwaakali kuyiisya.

34 Lino ba Falisi nobakamvwa kuti wabazula ba Saduki, bakalibunga antoomwe. 35 Lino umwi wabo uuzyi Mulawo, wakamusunka kwiinda mukumubuzya kuti: 36 “Mwiiyi, ino nguuli mulawo mupati mu Mulawo?” 37 Wakamwaambila kuti: “‘Weelede kuyanda Jehova Leza wako amoyo wako woonse abuumi bwako boonse amizeezo yako yoonse.’ 38 Ooyu ngomulawo mupati alimwi wakusaanguna. 39 Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’ 40 Milawo yobilo eeyi ngomusemo wa Mulawo woonse a Basinsimi.”

41 Lino ba Falisi nobakabungene antoomwe, Jesu wakababuzya kuti: 42 “Ino mbuti mbomuyeeya kujatikizya Kilisito? Mwana wani?” Bakamwaambila kuti: “Mwana wa Davida.” 43 Wakabaambila kuti: “Lino, ino nkaambo nzi Davida kwiinda mukusololelwa amuuya ncamwiita kuti Mwami naamba kuti, 44 ‘Jehova wakaambila Mwami wangu kuti: “Kkala kujanza lyangu lyalulyo kusikila ndikabikke basinkondonyoko kunsi aamaulu aako”’? 45 Lino ikuti Davida umwiita kuti Mwami, ino mwanaakwe buti?” 46 Eelyo kunyina wakakonzya kumwiingula noliba jwi lyomwe, alimwi taakwe wakasola kumubuzya naaceya kuzwa buzuba oobo.