Matayo

21 Lino nobakaswena afwaafwi a Jelusalemu, bakasika ku Betefage aa Cilundu ca Maolifa, mpoonya Jesu wakatuma basikwiiya bobilo, 2 wabaambila kuti: “Kamuya mumunzi uulya uulibonya, eelyo muyoojana mbongolo yaangidwe amwana wanjiyo; mpoonya mukazyaangulule akuzileta kulindime. 3 Alimwi ikuti umwi amubuzye, mumwaambile kuti, ‘Mwami ulaziyanda.’ Ndilyonya uyoomupa.”

4 Eeci cakacitika kutegwa azuzikizyigwe aayo aakaambwa kwiinda mumusinsimi kuti: 5 “Amumwaambile mwana musimbi wa Ziyoni: ‘Bona! Mwami wako uboola kulinduwe, mubombe moyo alimwi utantide aambongolo, inzya utantide aamwana wambongolo, mwana wamunyama uunyamuna ntundu.’”

6 Aboobo basikwiiya bakaunka akucita mbubonya Jesu mbwaakabalailila. 7 Bakaileta mbongolo amwana wanjiyo, eelyo bakabikka zisani zyabo zyaatala alinzizyo, mpoonya wakakkala mpawo. 8 Bunji bwabantu bakayala zisani zyabo zyaatala munzila, kakuli bamwi bakatalika kutema matewu kuzwa kumasamu akwaayala munzila. 9 Pele makamu aabantu aakali kumbele lyakwe ayaayo aakali kumutobela akazumanana koongolola kuti: “Amumufwutule Mwana wa Davida! Ulilelekedwe ooyo uuboola muzyina lya Jehova! Amumufwutule nywebo nomuli kujulu lyamajulu!”

10 Lino naakanjila mu Jelusalemu, bantu boonse mumunzi bakanyongana akwaamba kuti: “Ino nguni ooyu?” 11 Makamu aabantu akali kubaambila kuti: “Ooyu ngomusinsimi Jesu, uuzwa ku Nazaleta mu Galilaya!”

12 Mpoonya Jesu wakanjila mutempele akubatanda boonse aabo bakali kusambala akuula mutempele alimwi akutingamuna matebulu aabasikucinca mali azyuuno zyabaabo bakali kusambala nkwilimba. 13 Alimwi wakabaambila kuti: “Kulilembedwe kuti: ‘Ŋanda yangu iyooitwa kuti niŋanda yakukombela,’ pele nywebo mwiicita kuba ciyubilo cababbi.” 14 Alimwi boofwu abalema bakaboola kulinguwe mutempele, eelyo wakabaponya.

15 Basilutwe babapaizi abalembi nobakabona zyintu zigambya nzyaakacita, alimwi abalombe bakali koongolola mutempele kuti: “Amumufwutule Mwana wa Davida!” bakanyema 16 akumwaambila kuti: “Sena ulimvwide ncobaamba aaba?” Jesu wakabaambila kuti: “Inzya. Sena taakwe nomwakabala kuti: ‘Wacitya milomo yabana baniini abavwanda kuti bakutembaule’?” 17 Amane wakabasiya wakazwa mumunzi akuya ku Betaniya, eelyo wakaakoona ooko.

18 Naakali kujokela kumunzi mafwumofwumo, wakafwa nzala. 19 Mpoonya wakabona mukuyu mumbali aanzila, eelyo wakaunka kulinguwo, pele kunyina ncaakajana kunze lyamatuvwu, aboobo wakawaambila kuti: “Kutabi mucelo uuyoozyalwa kulinduwe mane kukabe kutamani.” Aboobo mukuyu wakayuma ndilyonya. 20 Pele basikwiiya nobakabona boobo, bakagambwa akwaamba kuti: “Ino wayuma buti mukuyu ndilyonya?” 21 Mukwiingula Jesu wakati kuli mbabo: “Ncobeni ndimwaambila kuti: Ikuti kamujisi lusyomo alimwi kamutadooneki, tamukaciti buyo ncondacita kumukuyu, pele kuti mwaambila cilundu eeci kuti, ‘Zyuka aawa uliwaale mulwizi,’ ciyoocitika. 22 Alimwi zyintu zyoonse nzyomulomba mumupailo kamujisi lusyomo, muyoozitambula.”

23 Lino naakanjila mutempele, basilutwe babapaizi abapati babantu bakaboola kulinguwe ciindi naakali kuyiisya, mpoonya bakaamba kuti: “Ino nkuli nkookajana nguzu zyakucita zyintu eezyi? Alimwi nguni wakakupa nguzu eezyi?” 24 Mukwiingula Jesu wakabaambila kuti: “Ambebo ndilamubuzya cintu comwe. Ikuti mundaambile, ndilamwaambila wakandipa nguzu zyakucita zyintu eezyi: 25 Ino nkuukuli nkulwakazwa lubbapatizyo lwa Johane? Nkuujulu naa nkuubantu?” Pele bakatalika kulyaambauzya kabati: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’ 26 Pele kuti twaambe kuti, ‘Lwakazwa kubantu,’ kuli nkamu yabantu njotuyoowa, nkaambo boonse Johane bamubona kuti musinsimi.” 27 Aboobo mukumwiingula Jesu bakati: “Tatuzyi pe.” Awalo wakabaambila kuti: “Andime tandikoomwaambila nkundakajana nguzu zyakucita zyintu eezyi.

28 “Ino muyeeya buti? Muntu umwi wakajisi bana bobilo. Mpoonya wakaunka kuli wakusaanguna akumwaambila kuti, ‘Mwanaangu, koya ukabeleke sunu mumuunda wamisaansa.’ 29 Mukwiingula ooyu wakati, ‘Ndilaunka Taata,’ pele tanaakaunka. 30 Mpoonya wakaunka kuli wabili akumwaambila mbubonya. Mukwiingula ooyu wakati, ‘Tandikoounka pe.’ Amane musyule wakausa aboobo wakaunka. 31 Ino nguuli akati kabaabo bobilo wakacita luyando lwabausyi?” Bakati: “Wabili.” Aboobo Jesu wakabaambila kuti: “Ncobeni ndimwaambila kuti, basimutelo abavwuule bamwiindila kunjila mu Bwami bwa Leza. 32 Nkaambo Johane wakaboola kulindinywe munzila yabululami, pele tiimwakamusyoma. Nokuba boobo, basimutelo abavwuule bakamusyoma, pele nywebo nokuba kuti mwakacibona eeci taakwe nimwakausa musyule kutegwa mumusyome.

33 “Amuswiilile cikozyanyo acimbi: Kwakali muntu umwi, mwiniŋanda, iwakalima muunda wamisaansa akuuyakila lubaya alimwi akusya mwakukandila misaansa mumuunda. Amane wakayaka ngazi mumuunda akuusiya mumaanza aabalimi, mpoonya wakaya kucisi cimbi. 34 Nocakasika ciindi micelo niibizwa, wakatuma bazike bakwe kubalimi kuti bakabweze micelo yakwe. 35 Pele balimi bakajata bazike bakwe, eelyo omwe bakamuuma, umwi bakamujaya aumwi bakamupwaya mabwe. 36 Alimwi wakatuma bazike bamwi banji kwiinda bakusaanguna, pele bakacita mbubonya akuli baaba. 37 Mpoonya kumamanino wakabatumina mwanaakwe, kayeeya kuti, ‘Bayoomulemeka mwanaangu.’ 38 Nobakamubona mwana, balimi bakalyaambauzya kuti, ‘Ooyu ngosikukona; amuboole tumujaye akubweza lukono lwakwe!’ 39 Aboobo bakamujata akumusowela kunze aamuunda wamisaansa akumujaya. 40 Lino mukamwini muunda wamisaansa aakuboola, ncinzi ncayoobacita balimi aabo?” 41 Bakati kulinguwe: “Akaambo kakuti mbabi, uyooleta lunyonyooko lutaambiki* kuli mbabo amane muunda wamisaansa uyooupa kubalimi bambi balo ibayoomupa micelo ciindi yabizwa.”

42 Jesu wakati kuli mbabo: “Sena taakwe nomwakabala mu Magwalo kuti: ‘Ibbwe bayaki ndyobakakaka lyaba bbwe liyandika kapati lyakukaswi. Ngu Jehova wapa kuti cibe boobu alimwi ncibotu mumeso eesu’? 43 Nkakaambo kaako ndimwaambila kuti: Bwami bwa Leza buyoonyangwa kulindinywe akupegwa kumusyobo uuzyala micelo. 44 Alimwi muntu uuwida abbwe eeli uyootyolooka. Alimwi kufwumbwa ngoliwida, liyoomupwayaula.”

45 Lino basilutwe babapaizi aba Falisi nobakamvwa zikozyanyo zyakwe, bakazyiba kuti wakali kwaamba mbabo. 46 Nokuba kuti bakali kuyanda kumujata, bakayoowa makamu aabantu, nkaambo aaba bakali kumubona kuti musinsimi.