Matayo

27 Nibwakaca, basilutwe babapaizi boonse abapati babantu bakamvwana kujatikizya Jesu kutegwa ajaigwe. 2 Eelyo nobakamwaanga, bakamutola akumusiya mumaanza aa Pilato mweendelezi.

3 Mpoonya Judasi, ooyo wakamwaaba naakabona kuti wapegwa mulandu walufwu, wakausa akwaapilusya mali aansiliva aali makumi otatwe kuli basilutwe babapaizi abapati 4 kati: “Ndakabisya nondakaaba muntu uululeme.” Lino bakati: “Ino tutyani swebo? Ooyo mulandu wako!” 5 Aboobo wakasowa mali aansiliva mutempele akuzwa, mpoonya wakaunka waakulisina. 6 Pele basilutwe babapaizi bakabweza mali aansiliva akwaamba kuti: “Tuuzumizyi mulawo ikuwaala mali aaya muciyobwedo calubono cisetekene, nkaambo mali aabulowa.” 7 Mpoonya nobakamvwana, bakaabelesya kuula muunda wamubumbi kutegwa kabazikkila beenzu. 8 Aboobo muunda ooyu wali kwiitwa kuti Muunda wa Bulowa kusikila sunu. 9 Mpoonya akazuzikizyigwa aayo aakaambwa kwiinda muli Jelemiya musinsimi kuti: “Alimwi bakabweza mali aansiliva aali makumi otatwe, muulo ooyo bana Isilayeli bamwi ngobakabikka alinguwe, 10 eelyo bakaabelesya kuula muunda wamubumbi kweelana ambwaakandilailila Jehova.”

11 Jesu wakaimikila kumbele lyamweendelezi, mpoonya mweendelezi wakamubuzya kuti: “Sena uli Mwami waba Juda?” Jesu wakaingula kuti: “Yebo omwini waamba.” 12 Pele nobakali kumutamikizya basilutwe babapaizi abapati, kunyina naakaingula pe. 13 Mpoonya Pilato wakati kulinguwe: “Sena tomvwide twaambo toonse ntobakutamikizya?” 14 Pele kunyina naakamwiingula noliba jwi lyomwe cakuti mweendelezi wakagambwa kapati.

15 Lino kufwumbwa kwaba Pobwe lya Kwiindilila, mweendelezi wakali acilengwa cakwaangununa mwaange omwe kunkamu yabantu, ooyo ngobakali kuyanda. 16 Lino kuciindi eeco bakajisi mwaange wakali ampuwo mbyaabi uutegwa Balaba. 17 Aboobo nobakabungana antoomwe, Pilato wakati kuli mbabo: “Ino nguni ngomuyanda kuti ndimwaangunwide, Balaba naa Jesu ooyo wiitwa kuti Kilisito?” 18 Nkaambo Pilato wakalizyi kuti bakamwaaba akaambo kamunyono. 19 Alimwi naakakkede acuuno calubeta, mukaintu wakwe wakatumya mulomo kulinguwe kati: “Kutabi ncomucita muntu ooyo mululami, nkaambo ndapenga kapati sunu muciloto akaambo kanguwe.” 20 Pele basilutwe babapaizi abapati bakoongelezya makamu aabantu kuti basale Balaba, akuti Jesu ajaigwe. 21 Lino mukwiingula mweendelezi wakati kuli mbabo: “Ino nguni akati kabaaba bobilo ngomuyanda kuti ndimwaangunwide?” Bakati: “Balaba.” 22 Pilato wakati kuli mbabo: “Ino lino ndityani a Jesu ooyo wiitwa kuti Kilisito?” Boonse bakati: “Aagagailwe acisamu!” 23 Wakati: “Nkaambo nzi? Ino ncibi nzi ncaakacita?” Pele bakazumanana koompololesya kabati: “Aagagailwe acisamu!”

24 Naakabona kuti tacigwasyi, pele kubuka buyo lupyopyongano, Pilato wakabweza maanzi akusamba kumaanza nkamu yabantu kailangilila akuti: “Mebo ndinyina mulandu kubulowa bwamuntu ooyu. Ooyo mulandu wanu.” 25 Bamvwe boobo, bantu boonse bakaingula kuti: “Bulowa bwakwe abube alindiswe aabana besu.” 26 Mpoonya wakabaangunwida Balaba, pele wakakwibbauzya Jesu akumupa kutegwa akagagailwe acisamu.

27 Mpoonya basikalumamba bamweendelezi bakatola Jesu muŋanda yamweendelezi akubunganya impi yoonse kulinguwe. 28 Eelyo bakamusamununa akumusamika cisani cilamfwu cisalala pyu, 29 alimwi bakaluka musini wamamvwa akumusamika kumutwe akumusyonka tete mujanza lyakwe lyalulyo. Lino kabafwugama kulinguwe, bakamufwubaazya kabati: “Wabonwa, yebo O Mwami waba Juda!” 30 Alimwi bakamuswida mate akubweza tete, eelyo bakatalika kumuuma amutwe. 31 Mpoonya, nobakamana kumufwubaazya, bakamusamununa cisani eeco cilamfwu akumusamika zisani zyakwe zyaatala, eelyo bakamutola kuyoogagailwa acisamu.

32 Nobakali kuyaabweenda bakajana muna Kulene uutegwa Simoni. Mwaalumi ooyu bakamusinikizya kunyamuna cisamu cakupenzyezya ca Jesu. 33 Mpoonya nobakasika kubusena butegwa Gologota, nkokwaamba kuti, Busena bwa Cipapa Camutwe, 34 bakamupa waini uuvwelene amululwe kuti anywe, pele naakalabila, wakakaka kunywa. 35 Eelyo nobakamugagaila acisamu, bakaabana zisani zyakwe zyaatala kwiinda mukuuma cisolo, 36 alimwi bakakkala ooko kabamulindilila. 37 Kunze lyaboobo, bakabikka cikwankwani atala aamutwe wakwe cilembedwe mulandu ngobakamupa wakuti: “Ooyu ngu Jesu Mwami waba Juda.”

38 Mpoonya zigwebenga zyobilo zyakali azisamu antoomwe anguwe, cimwi kululyo lwakwe acimwi kulumwensyi lwakwe. 39 Aboobo bantu ibakali kwiinda munzila bakatalika kumusampaula akugunya-gunya mitwe 40 kumwi kabati: “Yebo ookonzya kumwaya tempele akwiiyakulula mumazuba otatwe, kolifwutula we! Ikuti koli mwana wa Leza, koseluka acisamu cakupenzyezya!” 41 Mbubonya buyo, abalo basilutwe babapaizi abalembi abapati bakatalika kumufwubaazya kabati: 42 “Bamwi wakali kubafwutula; walo mwini takonzyi kulifwutula! Mwami wa Isilayeli; amumuleke lino aseluke acisamu cakupenzyezya, aboobo tulamusyoma. 43 Usyoma muli Leza; amumuleke lino amuvwune ikuti kamuyanda, nkaambo waamba kuti, ‘Ndili Mwana wa Leza.’” 44 Mbubonya oobo, noziba zigwebenga izyakali azisamu antoomwe anguwe azyalo zyakatalika kumusampaula.

45 Lino kutalikila kuwoola lyacisambomwi* kusikila kuwoola lyafwuka* kwakaba mudima munyika yoonse. 46 Ciindi kacilondelela kuwoola lyafwuka, Jesu wakoongolola kuti: “Eli, Eli, lama sabakitani?” Ooku nkokwaamba kuti, “Leza wangu, Leza wangu, ino wandilekelezyela nzi?” 47 Nobakamvwa boobo, bamwi babaabo bakaimvwi waawo bakatalika kwaamba kuti: “Ooyu muntu wiita Elija.” 48 Mpoonya aawo umwi wabo wakabalika akuleta nsinsa akwiinyika muwaini uulula, eelyo wakaibikka kulutete akumupa kuti anywe. 49 Pele bamwi bakati: “Komuleka! Atubone naa Elija ulaboola kumufwutula.” [[Mwaalumi umwi wakabweza sumo akumuyasa mumabambo, mpoonya kwakazwa bulowa amaanzi.]] 50 Alimwi Jesu wakoongolola ajwi pati, mpoonya wakafwa.

51 Mpoonya mulembo wamutempele wakayauka akati, kuzwa atala mane kusikila aansi, alimwi anyika yakazungaana, amyala yakaanduka. 52 Aboobo zyuumbwe zyakajaluka alimwi mibili minji yabasalali bakafwide yakavwukkuka 53 akulibonya kubantu banji. (Eelyo bantu bakali kuzwa kunamaumbwe naakabusyigwa bakanjila mumunzi uusalala.) 54 Pele silutwe wabasikalumamba alimwi abaabo mbaakali limwi nibakali kulindilila Jesu nobakabona kuzungaana kwanyika azyintu zyakali kucitika, bakayoowa kapati akwaamba kuti: “Ncobeni ooyu wali Mwana wa Leza.”

55 Alimwi kwakali bamakaintu banji ibakali kulangilila alaale, ibakamutobela Jesu kuzwa ku Galilaya kuti kabamukutaukila; 56 akati kabo kwakali Maliya Magadalene alimwi a Maliya banyina Jakobo a Jose, kubikkilizya abanyina babana ba Zebedayo.

57 Lino mbwaanga zuba lyakali afwaafwi kubbila, kwakaboola muntu umwi muvwubi waku Alemateya uutegwa Josefa, lino iwakali sikwiiya wa Jesu. 58 Muntu ooyu wakaya kuli Pilato akulomba mubili wa Jesu. Mpoonya Pilato wakalailila kuti upegwe kulinguwe. 59 Aboobo Josefa wakaubweza mubili, wauzambaila mumulembo mubotu uunyina tombe, 60 akuulazika mucuumbwe cakwe cipya, calo ncaakasyide mumwala. Eelyo wakakunkulisya bbwe lipati kumulyango wacuumbwe akuunka. 61 Pele Maliya Magadalene alimwi a Maliya umbi bakali mpeena aawo kabakkede kumbele lyacuumbwe.

62 Lino nibwakaca, mubuzuba butobela Buzuba bwa Kulibambila, basilutwe babapaizi aba Falisi bakabungana antoomwe kuli Pilato, 63 bakati: “Mwami, twayeeya kuti silweeno ulya kacili muumi wakaamba kuti, ‘Kwainda mazuba otatwe ndiyoobusyigwa.’ 64 Aboobo kolailila kuti cuumbwe cilindililwe kusikila mubuzuba bwatatu kutegwa basikwiiya bakwe bataunki kuyoomubba akwaambila bantu kuti, ‘Wabusyigwa kubafwu!’ Eelyo lweeno lwamamanino oolu luyoobija kwiinda lwakusaanguna.” 65 Pilato wakati kuli mbabo: “Mulijisi balindizi. Aboobo kamuya mucilindilile kweelana ambomuzyi.” 66 Mpoonya bakaunka kuyoocilindilila cuumbwe kwiinda mukusinka bbwe akubikka balindizi.