Matayo

28 Noyakainda Sabata, nokwakali kuumbuluka mubuzuba bwakusaanguna bwansondo eeyo, Maliya Magadalene a Maliya umbi bakaboola kuti babone cuumbwe.

2 Eelyo amubone! Kwakacitikide muzuzumo wanyika mupati, nkaambo mungelo wa Jehova wakaseluka kuzwa kujulu alimwi wakasika akukunkulisya bbwe, mpoonya wakalikkede aalindilyo. 3 Lino wakali kulibonya mbuli lulabo, alimwi zisani zyakwe zyakali kutuba bu mbuli caanda. 4 Inzya, akaambo kakumuyoowa balindizi bakakankama akuba mbuli bantu bafwide.

5 Pele mungelo wakaambila bamakaintu aaba kuti: “Mutayoowi pe, nkaambo ndilizyi kuti muyandaula Jesu wakagagailwa acisamu. 6 Tako pe muno, nkaambo wabusyigwa kweelana ambwaakaamba. Amuboole mubone busena mpaakalede. 7 Mpoonya cakufwambaana kamuya mukaambile basikwiiya bakwe kuti wabusyigwa kubafwu akuti, amubone! Wamusolweda kuya ku Galilaya; ookuya muyoomubona. Amubone! Ooyu ngomulumbe wangu kulindinywe.”

8 Aboobo cakufwambaana bakazwa kucuumbwe, kabayoowede alimwi akukkomana kapati, bakabalika kuyooambila basikwiiya bakwe. 9 Lino, amubone! Jesu wakabayaanya akwaamba kuti: “Mwapona!” Bakaboola kulinguwe akumujata kumatende akumufwugamina. 10 Mpoonya Jesu wakati kuli mbabo: “Mutayoowi! Kamuya, mukabaambile bakwesu kuti baye ku Galilaya, eelyo ooko bayoondibona.”

11 Lino nobakali munzila, amubone! Balindizi bamwi bakaya mumunzi akwaambila basilutwe babapaizi zyintu zyoonse zyakacitika. 12 Mpoonya aaba nobakamana kubungana antoomwe abapati akumvwana, bakapa basikalumamba mali aansiliva aali mbwaabede 13 akwaamba kuti: “Amukaambe kuti, ‘Basikwiiya bakwe bakaboola masiku akumubba notwakali koona.’ 14 Alimwi ikuti naa eeci cimvwugwe amweendelezi tulamukombelezya, alimwi kunyina ceelede kumupa kulibilika.” 15 Aboobo bakabweza mali aansiliva akucita mbuli mbobakalaililwa, alimwi makani aaya amwaigwa koonse-koonse akati kaba Juda kusikila sunu.

16 Pele basikwiiya bali kkumi aumwi bakaya ku Galilaya kucilundu ooko Jesu nkwaakabalailide. 17 Nobakamubona, bakamufwugamina, pele bamwi bakadooneka. 18 Mpoonya Jesu wakaboola akubaambila kuti: “Ndapegwa nguzu zyoonse kujulu alimwi aanyika. 19 Aboobo kamuya mukagwasye bantu bamisyobo yoonse kuba basikwiiya, akubabbapatizya muzyina lya Taata alya Mwana alya muuya uusalala, 20 kubayiisya kubamba zyintu zyoonse nzyondakamulailila. Alimwi amubone! Ndili andinywe mazuba oonse mane kusikila kumamanino aabweende bwazyintu oobu.”