Matayo
4 Lino Jesu wakatolwa amuuya munkanda kutegwa akasunkwe a Diabolosi. 2 Naakaliimya kulya kwamazuba aali makumi one isyikati amasiku, wakafwa nzala. 3 Aciindi eeco, Sikusunka wakaboola akumwaambila kuti: “Ikuti naa uli mwana wa Leza, ambila mabwe aaya kuti abe zinkwa.” 4 Pele wakaingula kuti: “Kulilembedwe kuti: ‘Muntu teelede kuponena acinkwa calo, pele weelede kuponena amajwi oonse aazwa kumulomo wa Jehova.’”
5 Mpoonya Diabolosi wakaunka anguwe kumunzi uusalala, waakumwiimika atala abwaanda bwakazingulukide tempele 6 akumwaambila kuti: “Ikuti naa uli mwana wa Leza, koliwaala ansi, nkaambo kulilembedwe kuti: ‘Uyoolailila bangelo bakwe kutegwa bakakukwabilile, alimwi bayookutemba amaanza aabo kutegwa utakabi nolinontola kubbwe.’” 7 Jesu wakamwiingula kuti: “Alimwi kulilembedwe kuti: ‘Utasunki Jehova Leza wako.’”
8 Alimwi Diabolosi wakamutola kucilundu cilamfwu kapati akumutondezya mami oonse aamunyika abulemu bwangawo 9 akumwaambila kuti: “Zyoonse eezyi ndilakupa ikuti wafwugama akundikomba.” 10 Mpoonya Jesu wakamwiingula kuti: “Kozwa aawa Saatani! Nkaambo kulilembedwe kuti: ‘Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.’” 11 Mpoonya Diabolosi wakamusiya, eelyo bangelo bakaboola akutalika kumukutaukila.
12 Lino naakamvwa kuti Johane waangwa, wakazwa waunka ku Galilaya. 13 Alimwi naakazwa ku Nazaleta, wakaboola akukkala ku Kapenauma kumbali aalwizi muzyooko zya Zebuloni a Nafutali 14 ikutegwa azuzikizyigwe aayo aakaambwa kwiinda mumusinsimi Izaya kuti: 15 “O nyika ya Zebuloni aya Nafutali, ooli mumbali aanzila iiya kulwizi, mutala lya Jodano mu Galilaya wabamasi! 16 Bantu bakkede mumudima bakabona mumuni uumwekesya, abaabo bakkede munyika yacimvwule calufwu bakamunikilwa.” 17 Kuzwa kuciindi eeco, Jesu wakatalika kukambauka akwaamba kuti: “Amweempwe, nkaambo Bwami bwakujulu bwaswena afwaafwi.”
18 Naakali kweenda mumbali aa Lwizi lwa Galilaya, wakabona babunyina bobilo, Simoni uutegwa Petulo, a Anduleya munyina kabawaala kansabwe mulwizi, nkaambo bakali bazubi. 19 Aboobo wakabaambila kuti: “Amunditobele, eelyo ndilamupa kuba bazubi babantu.” 20 Mpoonya aawo bakasiya tunsabwe akumutobela. 21 Kuzwa waawo kayaabweenda, wakabona abamwi bobilo ibakali babunyina, Jakobo mwana wa Zebedayo a Johane imunyina kabali mubwato a Zebedayo bausyi kabasuma tunsabwe twabo, eelyo wakabaita. 22 Mpoonya aawo bakasiya bwato bwabo abausyi akumutobela.
23 Lino wakeenda mu Galilaya yoonse, kayaabuyiisya muzikombelo zyabo akukambauka makani mabotu aa Bwami, akuponya bantu kumalwazi aamisyobo yoonse. 24 Lino mpuwo yakwe yakasika mu Siliya yoonse, alimwi bakamuletela bantu baciswa kapati, bakatazyidwe amalwazi amapenzi aaindene-indene, banjidwe madaimona abasikasuntu abalebukide mibili, eelyo wakabaponya. 25 Aboobo makamu-makamu aabantu akamutobela kuzwa ku Galilaya, aku Dekapole, aku Jelusalemu, aku Judaya amutala lya Jodano.