Luka
12 Kuciindi eeco bantu babalilwa kuzyuulu zinji nobakabungana cakuti bakali kulyatana buya, Jesu wakasaanguna kwaambila basikwiiya bakwe kuti: “Amucenjele abumena bwaba Falisi, nkokuti kuupaupa ameso. 2 Pele kunyina cintu civwumbidwe kabotu-kabotu citakayubununwi alimwi acintu cisisidwe citakazyibwi. 3 Aboobo zyintu zyoonse nzyomwaamba mumudima ziyoomvwugwa mumumuni, alimwi nzyomuvwiya mumaanda aanu ziyookambaukilwa aziluli zyamaanda. 4 Alimwi nobeenzuma ndimwaambila kuti: Mutabayoowi aabo bajaya mubili pele kuzwa waawo taakwe cimbi ncobakonzya kucita. 5 Pele ndilamwaambila iweelede kuyoowegwa: Amuyoowe Ooyo uujisi nguzu zyakusowela mu Gehena* amana kujaya. Inzya ndimwaambila kuti amuyoowe Ooyu. 6 Sena tutiiti tosanwe tatusambalwi makkobili obilo aajisi mpindu nsyoonto? Nokuba boobo, kunyina nokaba komwe kalubidwe kuli Leza. 7 Pele naaba masusu aakumitwe yanu alibalidwe oonse. Mutayoowi pe; nywebo mulayandika kwiinda tutiiti tunji.
8 “Lino ndimwaambila kuti: Kufwumbwa uuzumina kubantu kuti ulikamantene andime, Mwana wamuntu awalo uyoozumina kuti ulikamantene anguwe kumbele lyabangelo ba Leza. 9 Pele ooyo uundikaka kumbele lyabantu uyookakwa kumbele lyabangelo ba Leza. 10 Alimwi kufwumbwa waamba majwi mabi ku Mwana wamuntu, uyoolekelelwa, pele ooyo uusampaula muuya uusalala takalekelelwi pe. 11 Nobamuleta kumbele lyabuleya, balupati-pati bamfwulumende abeendelezi, mutalibiliki kuti muyooliiminina buti nomwiingula naa kuti muyooamba nzi, 12 nkaambo muuya uusalala uyoomuyiisya aciindi nciconya eeco zyintu nzyomweelede kwaamba.”
13 Mpoonya umwi munkamu wakati kulinguwe: “O Mwiiyi, komwaambila mukwesu kuti andaabile cibeela calukono.” 14 Jesu wakati kulinguwe: “Yebo muntu, ino nguni wakandibikka kuba mubetesi naa sikukosola makani akati kanu mobilo?” 15 Mpoonya wakati kuli mbabo: “Amucenjele akulikasya kubulyato* buli boonse, nkaambo nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.” 16 Aboobo wakabaambila cikozyanyo kati: “Umwi muntu muvwubi wakatebula zilyo zinji kapati mumyuunda yakwe. 17 Eelyo wakatalika kulibuzya ulaamba, ‘Ino ndilacita buti, mbwaanga lino ndinyina kwakuyobweda zilyo zyangu?’ 18 Aboobo wakati, ‘Ndilacita boobu: Ndilamwaya matala aangu akuyaka mapati, eelyo oomo monditiiyobwede maila aangu oonse azyintu zyangu zyoonse zibotu, 19 mpoonya ndilalyaambila kuti: “Wayobola zyintu zinji zibotu zinooliko kwamyaka minji; koliiba, kolya, konywa, alimwi kosekelela.”’ 20 Pele Leza wakamwaambila kuti, ‘Yebo ootayeeyi kabotu, masiku ngoonya aaya balabuyanda buumi bwako. Aboobo ino zilaba zyani zyintu eezyi nzyoyobwede?’ 21 Mbocibede oobo kumuntu uuliyobweda lubono pele katali muvwubi kuli Leza.”
22 Mpoonya wakaambila basikwiiya bakwe kuti: “Akaambo kaceeci ndimwaambila kuti: Amuleke kulibilika kujatikizya buumi bwanu kuti mulalya nzi naa kujatikizya mibili yanu kuti mulasama nzi. 23 Nkaambo buumi bulayandika kwiinda cakulya, amubili kwiinda zyakusama. 24 Amuyeeye bacikwangala. Tabasyangi mbuto naa kutebula; banyina butala naa ciyobwedo. Nokuba boobo, Leza ulabasanina. Sena nywebo tamuyandiki kwiinda bayuni? 25 Ino nguni akati kanu ikwiinda mukulibilika uukonzya kulansya buumi bwakwe naaceya? 26 Aboobo ikuti kamutakonzyi kucita cintu ciniini boobu, mulibilikila nzi kujatikizya zyintu zyoonse eezyi zyasyaala? 27 Amulange maluba-luba mbwaakomena; taabeleki naa kuluka, pele ndimwaambila kuti: Naba Solomoni mubulemu bwakwe boonse kunyina naakasamide mbuli limwi lyayaaya. 28 Lino ikuti Leza kazisamika boobu zimena musyokwe zinga sunu nkozili pele juunza zyayuma akusowelwa mumulilo, sena takaindi kumusamika nywebo, nywebo nobasilusyomo luniini? 29 Aboobo, amuleke kuyandaulisya nzyomutiilye anzyomutiinywe alimwi amuleke kulibilika lyoonse, 30 nkaambo zyoonse eezyi nzyezyintu bantu bamunyika nzyobayandaula kapati, pele Uso ulizyi kuti mulaziyanda zyintu eezyi. 31 Pele amuzumanane kuyandaula Bwami bwakwe, eelyo zyintu eezyi ziyooyungizyigwa kulindinywe.
32 “Mutayoowi, nokatanga kaniini, nkaambo Uso wazumina kumupa Bwami bwakwe. 33 Amusambale zyintu nzyomujisi akupa zipego zyaluse. Amulipangile nkomo zyamali zitazakali, lubono lutamani kujulu, ooko mubbi nkwatasiki afwaafwi alimwi kutakwe zyuuka zilya. 34 Nkaambo ooko kunooli lubono lwanu, ayalo myoyo yanu nkwiinoobede.
35 “Amusame akulibambila* alimwi malambe aanu kaayaka lyoonse, 36 alimwi nywebo lwanu amube mbuli babelesi balindila simalelaabo uupiluka kulukwatano kutegwa mbwatiisikile buyo akukonkomona, bamujalwide. 37 Balikkomene babelesi aabo simalelo asika mbatiijane balalindila! Ncobeni ndimwaambila kuti: Uyoosama cisani cakukutaukila akubakkazyika kuti balye alimwi uyooboola akubakutaukila. 38 Alimwi ikuti wasika lyakulindila kwabili* naa lyakulindila kwatatu,* akubajana kabalindila, balikkomene kapati! 39 Pele kamuzyiba kuti, ikuti mwiniŋanda naakalizyi ciindi mubbi ncaakali kuboola, naakazumanana kulinda akutalekela mubbi kunjila muŋanda yakwe. 40 Kamulibambilide lyoonse andinywe, nkaambo aciindi ncomutayeeyeli, Mwana wamuntu ulaboola.”
41 Mpoonya Petulo wakabuzya kuti: “O Mwami, sena waambila buyo ndiswe cikozyanyo eeci naa boonse?” 42 Eelyo Mwami wakavwuwa kuti: “Ino mubwini nguni mubanzi musyomesi, uucenjede, ooyo Simalelo wakwe ngwayoobikka kulanganya babelesi bakwe ikuti lyoonse kabapa cakulya cikkwene aaciindi ceelede? 43 Ulikkomene muzike ooyo ikuti Simalelo wakwe aakusika akamujane kacita boobo! 44 Ndimwaambila camasimpe kuti: Uyoomusala kulanganya lubono lwakwe loonse. 45 Pele ikuti muzike ooyo mumoyo wakwe waamba kuti, ‘Simalelo wangu wamuka kuboola,’ kumane watalika kuuma bazikenyina baalumi abamakaintu, alimwi akulya, kunywa akukolwa, 46 Simalelo wamuzike ooyo uyooboola mubuzuba mbwatamulangili aciindi ncatazyi, eelyo uyoomusubula acisubulo cipati alimwi akumubikka antoomwe abantu batasyomeki. 47 Mpoonya ooyo muzike iwakamvwisya luyando lwasimalelo wakwe pele iwatakalibambila naa kucita kweelana aluyando lwakwe uyoumwa zimboko zinji. 48 Pele ooyo watakamvwisya aboobo wakacita zyintu zimupa kuumwa zimboko, uyoumwa zice. Masimpe, kufwumbwa wakapegwa zinji, kuyooyandwa zinji kulinguwe, alimwi ooyo bantu ngobakabikka kulanganya zinji, bayooyanda zinji kwiindilila kulinguwe.
49 “Ndakaboolela kukunka mulilo anyika, pele kuti mulilo ooyo wayasyigwa kale, ncinzi cimbi ncondinga ndayanda? 50 Ncobeni kuli lubbapatizyo ndondeelede kubbapatizyigwa andulo alimwi ndilakatazyigwa kapati mumoyo kusikila lukainde! 51 Sena muyeeya kuti ndakaboolela kuleta luumuno anyika? Peepe, pele ndimwaambila kuti ndakaboolela kuleta lwaandaano. 52 Nkaambo kuzwa sunu kunooli bantu bosanwe muŋanda yomwe ibaandeene, botatwe ibakazya bobilo abobilo bakazya botatwe. 53 Banooandeene, bausyi amwana wabo musankwa, mwana musankwa abausyi, banyina amwana wabo musimbi, mwana musimbi abanyina, banyinazyala amukamwana, amukamwana abanyinazyala.”
54 Mpoonya alimwi wakatalika kwaambila makamu aabantu kuti: “Mwabona kkumbi lisiya kumbo ndilyonya mwaamba kuti, ‘Kuboola mvwula yaguwo,’ eelyo ncobeni ilawa. 55 Alimwi muwo nowuunga kuzwa kumusanza, mwaamba kuti, ‘Kunoopya sunu,’ eelyo ncobeni kulapya. 56 Nywebo nobasikuupaupa ameso, mulizyi kupandulula mbokuboneka anyika akujulu, pele ino mbuti mbomutazyi kupandulula ncocaamba ciindi ecino? 57 Alimwi ino nkaambo nzi ncomutalisalili ciluleme nobeni? 58 Mucikozyanyo, noyenda asikukupa mulandu kuya kumuleli, kosoleka canguzu nomucili munzila kumanizya kaambo anguwe kutegwa ambweni atakutoli kumubetesi, kumane mubetesi akutole kuli kapaso awalo kapaso akuwaale muntolongo. 59 Ndikwaambila kuti: Kunyina noyakuzwa oomo kusikila ukalunge kakkobili kamamanino.”