Luka
13 Kuciindi eeco nciconya, kwakali bamwi bakaliko aawo ibakamwaambila zyabana Galilaya aabo bulowa bwabo Pilato mbwaakasanganya azipaizyo zyabo. 2 Aboobo mukubaingula wakabaambila kuti: “Sena muyeeya kuti bana Galilaya aaba bakali basizibi kwiinda bana Galilaya bamwi boonse akaambo kakuti bakajaigwa boobo? 3 Peepe! Pele ndimwaambila kuti, ikuti muteempwi anywebo nyoonse muyoonyonyoonwa mbuli mbabo. 4 Naa aabo bali kkumi alusele ibakalimbwa akujaigwa angazi ku Siloamu, sena muyeeya kuti bakali basizibi kwiinda bantu boonse bakkala mu Jelusalemu? 5 Peepe! Pele ndimwaambila kuti, ikuti muteempwi anywebo nyoonse muyoonyonyoonwa mbuli mbabo.”
6 Mpoonya wakaamba cikozyanyo eeci: “Umwi muntu wakajisi mukuyu wakasyangidwe mumuunda wakwe wamisaansa, eelyo wakaboola kuti alangaule nkuyu kulinguwo, pele tanaakajana niiba yomwe. 7 Mpoonya wakaambila mubelesi wamumuunda wamisaansa kuti, ‘Lino yaba myaka yotatwe kandiboola kulangaula nkuyu kumukuyu ooyu, pele kunyina niiba yomwe njondijana. Kocigonka cisamu eeci! Mubwini ino nkaambo nzi ncoceelede kunyonyoona nyika?’ 8 Mukumwiingula wakati kulinguwe, ‘Simalelo wangu, amucileke amwaka uuno, ndicilimine mumbali akucibikkila mbolezi, 9 eelyo ikuti cikazyale micelo kumbele, inga cabota, pele ikuti citakazyali, muyoocitema.’”
10 Lino wakali kuyiisya mucikombelo cimwi mu Sabata. 11 Lino amubone! Kwakali mukaintu wakanjidwe daimona lyakali kumupa kuciswa kwamyaka iili kkumi alusele, alimwi wakaloongomene katakonzyi koololoka naaceya. 12 Naakamubona, Jesu wakamwiita akumwaambila kuti: “Omukaintu, waangululwa kubulwazi bwako.” 13 Mpoonya Jesu wakamujata, eelyo ndilyonya wakoololoka akutalika kutembaula Leza. 14 Pele mweendelezi wacikombelo kanyemede akaambo kakuti Jesu wakaponya mu Sabata, wakatalika kwaambila makamu aabantu kuti: “Kuli mazuba aali cisambomwi nokweelede kubelekwa milimo; aboobo mumazuba aayo amuboole kuzyooponesyegwa, ikutali mubuzuba bwa Sabata.” 15 Pele Mwami wakamwiingula akumwaambila kuti: “Nobasikuupaupa ameso, sena umwi aumwi wanu taangululi ŋombe naa mbongolo yakwe mucimpati mu Sabata akwiitola kuyoonywa maanzi? 16 Aboobo sena tiicaleelede kumukaintu ooyu walo uuli mwana wa Abulahamu alimwi ooyo Saatani ngwaangide kwamyaka iili kkumi alusele kuti aangununwe kucilwazi eeci mubuzuba bwa Sabata?” 17 Naakaamba zyeezyi, basikumukazya boonse bakafwa nsoni, pele makamu aabantu oonse akakondwa kuzyintu zitaliboteli zyoonse nzyaakacita.
18 Aboobo wakazumanana kwaamba kuti: “Ino Bwami bwa Leza buli mbuli nzi, alimwi ino inga ndabukozyanisya anzi? 19 Buli mbuli kaseke kamusitada muntu umwi nkaakabweza akusyanga mumuunda wakwe, eelyo kakamena akukomena akuba cisamu, abayuni bauluka mujulu bakali kuyaka ziteente mumitabi yancico.”
20 Alimwi wakati: “Ino Bwami bwa Leza inga ndabukozyanisya anzi? 21 Buli mbuli bumena, mukaintu umwi mbwaakabweza akubusanganya afulaulu iwakali muzisuwo zyotatwe zipati mane kusikila mulwi woonse wakafwufwumuka.”
22 Mpoonya wakeenda kuzwa kumunzi amunzi akukanzi akanzi, kayaabuyiisya akuzumanana lweendo lwakwe lwakuya ku Jelusalemu. 23 Lino muntu umwi wakamubuzya kuti: “Mwami, sena bafwutulwa mbasyoonto buyo?” Wakabaambila kuti: 24 “Amubeleke canguzu kuti munjile mumulyango uusyanikide, nkaambo ndimwaambila kuti banji bayooyanda kunjila, pele bayookakilwa. 25 Nkaambo mwiniŋanda anyamuka kale akujala cijazyo, eelyo mwaima anze akutalika kukonkomona acijazyo akwaamba kuti, ‘Mwami, kotujalwida,’ uyoomwaambila kuti: ‘Tandizyi naa muzwida kuli.’ 26 Mpoonya muyootalika kwaamba kuti, ‘Twakali kulya akunywa kumbele lyako, alimwi wakali kuyiisya mumigwagwa yesu.’ 27 Pele uyoomwaambila kuti, ‘Tandizyi naa muzwida kuli. Amuzwe kulindime, nywebo nyoonse nobasikucita zitaluleme!’ 28 Eelyo ooko nkomuyoolilila akulumina ntwino mwaakubona Abulahamu, Izaka, Jakobo alimwi abasinsimi boonse mu Bwami bwa Leza, pele nywebo kamutandilidwe anze. 29 Kunze lyaboobo, bantu bayooboola kuzwa kujwe akumbo, akuzwa kunyika akumusanza alimwi bayookkala akulya mu Bwami bwa Leza. 30 Alimwi amubone! Kuli baabo basyaalizi ibayooba bataanzi, alimwi kuli baabo bataanzi ibayooba basyaalizi.”
31 Aciindi nciconya eeco, kwakasika ba Falisi bamwi ibakamwaambila kuti: “Kozwa okuno nkaambo Heloda uyanda kukujaya.” 32 Pele wakabaambila kuti: “Kamuya mukamwaambile mwaaba* ooyo kuti, ‘Bona! Sunu ajuunza ndinootanda madaimona akuponya balwazi, pele mubuzuba bwatatu ndinoomanizyide.’ 33 Nokuba boobo, ndeelede kuzumanana lweendo lwangu sunu, juunza azona, nkaambo tacizumizyidwe kuti musinsimi ajailwe kunze kwa Jelusalemu. 34 Aakaka Jelusalemu, Jelusalemu, yebo oojaya basinsimi akubapwaya mabwe aabo batumwa kulinduwe,—lyoonse ndakali kuyanda kufwukatila bana bako, mbuli nkuku ntumbu mboifwukatila twana twanjiyo mumababa aayo, pele nywebo nobantu mwakakaka! 35 Amubone! Ŋanda* yanu lyaba tongo alimwi yasiigwa kulindinywe. Ndimwaambila kuti tamukandiboni limbi kusikila mukaambe kuti: ‘Ulilelekedwe ooyo uuboola muzyina lya Jehova!’”