Luka
3 Mumwaka wakkumi amusanu wabulelo bwa Tibeliyo Kaisala, Pontiyo Pilato naakali mweendelezi wa Judaya, Heloda wakali mweendelezi wacibeela cacooko ca Galilaya, pele Filipo imwanaakwabo wakali mweendelezi wacibeela cacooko camucisi ca Ituleya a Tilakoniti, mpoonya Lusaniyo wakali mweendelezi wacibeela cacooko ca Abilene, 2 kumazuba aa Mupaizi Mupati Anasi alimwi a Kayafa, ijwi lya Leza lyakasika kuli Johane mwana wa Zakaliya naakali munkanda.
3 Aboobo wakaunka muminzi yoonse yeengelede Jodano, kakambauka lubbapatizyo lwacitondezyo cakweempwa kutegwa zibi zilekelelwe, 4 mbubonya mbokulembedwe mubbuku lyamajwi aamusinsimi Izaya kuti: “Amuswiilile! Kuli woongolola munkanda kuti: ‘Amubambe inzila ya Jehova! Amululamike nzila zyakwe.5 Tulonga-longa toonse tweelede kuvwikkilwa, amalundu oonse atulundu zyeelede kumwaigwa, alimwi anzila zipilingene zyeelede kululamikwa amasena aamaguguunya aleelede kuba nzila zisumbwide, 6 alimwi bantu boonse bayoobona mbwafwutula Leza.’”
7 Aboobo makamu aabantu naakali kuboola kuli Johane kuti babbapatizyigwe, wakali kubaambila kuti: “Nywebo nobana babacisasa, nguni wamucenjezya kuti mutije bukali buboola? 8 Aboobo amuzyale micelo yeendelana akweempwa kwanu. Alimwi mumyoyo yanu mutani kwaambi kuti, ‘Abulahamu ngutaateesu.’ Nkaambo ndimwaambila kuti Leza ulijisi nguzu zyakupa Abulahamu bana kuzwa kumabwe aaya. 9 Masimpe, keembe keezyekwa kale kumiyanda yazisamu. Aboobo cisamu cili coonse citazyali micelo mibotu cilagonkwa akusowelwa mumulilo.”
10 Mpoonya makamu aabantu akali kumubuzya kuti: “Ino lino tucite buti?” 11 Mukwiingula wakali kubaambila kuti: “Ooyo uujisi zisani zyobilo ape cimwi kuli yooyo uutajisi, awalo ooyo uujisi zyakulya acite mbubonya.” 12 Nobaba basimutelo bakaboola kuti babbapatizyigwe, mpoonya bakati kulinguwe: “Mwiiyi, ino tucite buti?” 13 Wakati kuli mbabo: “Mutatezyi mali aayindilila amweelwe wamutelo uubikkidwe.” 14 Abalo basikalumamba bakali kumubuzya kuti: “Ino swebo tucite buti?” Wakabaingula kuti: “Mutapenzyi naa kubejelezya muntu uuli oonse, pele amukkutile azyintu nzyomupegwa.”
15 Lino bantu mbwaanga bakali kulangila alimwi boonse bakali kulibuzya mumyoyo yabo kujatikizya Johane kabati, “Sena ooyu inga kali ngo Kilisito?” 16 Johane wakabaingula boonse kuti: “Mebo ndamubbapatizya amaanzi, pele ooyo uundiinda nguzu ulaboola, ngonditeeleli kwaangununa ntambo zyampato zyakwe. Uyoomubbapatizya amuuya uusalala alimwi amulilo. 17 Cipupuluzyo cakwe cili mujanza lyakwe, ikutegwa alusalazye loonse lubuwa lwakwe lwakulyataulila maila akuyobola maila mubutala bwakwe, pele buungu uyoobuumpa mumulilo uutakonzyi kuzimwa.”
18 Aboobo Johane wakabakombelezya ziindi zinji akuzumanana kwaambilizya makani mabotu kubantu. 19 Pele Heloda mweendelezi wacibeela cacooko ooyo Johane ngwaakasinsa akaambo ka Helodiya mukaintu wamunyina alimwi akaambo kazyintu zibi zyoonse nzyaakacita, 20 wakacita cintu cibi acimbi eeci: wakaanga akubikka Johane muntolongo.
21 Lino bantu boonse nobakabbapatizyigwa, awalo Jesu wakabbapatizyigwa. Eelyo naakali kupaila, ijulu lyakajaluka, 22 mpoonya muuya uusalala uuli mbuli nziba wakaseluka alinguwe, eelyo ijwi kuzwa kujulu lyakati: “Yebo uli Mwanaangu ngweyandisya, ngwekkomanina.”
23 Kunze lyaboobo, Jesu naakatalika mulimo wakwe wakali amyaka iitandila kumakumi otatwe, alimwi wakazyibidwe kuti wakali mwana
wa Josefa,
Josefa wakali mwana wa Heli,
24 Heli wakali mwana wa Matati,
Matati wakali mwana wa Levi,
Levi wakali mwana wa Meleki,
Meleki wakali mwana wa Janayi,
Janayi wakali mwana wa Josefa,
25 Josefa wakali mwana wa Matatiyo,
Matatiyo wakali mwana wa Amosi,
Amosi wakali mwana wa Nahumu,
Nahumu wakali mwana wa Eseli,
Eseli wakali mwana wa Nagayi,
26 Nagayi wakali mwana wa Maati,
Maati wakali mwana wa Matatiyo,
Matatiyo wakali mwana wa Semeini,
Semeini wakali mwana wa Joseki,
Joseki wakali mwana wa Joda,
27 Joda wakali mwana wa Jowanani,
Jowanani wakali mwana wa Lesa,
Lesa wakali mwana wa Zelubabeli,
Zelubabeli wakali mwana wa Salatiyeli,
Salatiyeli wakali mwana wa Neli,
28 Neli wakali mwana wa Meleki,
Meleki wakali mwana wa Adi,
Adi wakali mwana wa Kosamu,
Kosamu wakali mwana wa Elimadama,
Elimadama wakali mwana wa Ela,
29 Ela wakali mwana wa Jesu,
Jesu wakali mwana wa Eliyeza,
Eliyeza wakali mwana wa Jolimu,
Jolimu wakali mwana wa Matati,
Matati wakali mwana wa Levi,
30 Levi wakali mwana wa Simoni,
Simoni wakali mwana wa Judasi,
Judasi wakali mwana wa Josefa,
Josefa wakali mwana wa Jonamu,
Jonamu wakali mwana wa Eliyakimu,
31 Eliyakimu wakali mwana wa Meleya,
Meleya wakali mwana wa Mena,
Mena wakali mwana wa Matata,
Matata wakali mwana wa Natani,
Natani wakali mwana wa Davida,
32 Davida wakali mwana wa Jese,
Jese wakali mwana wa Obedi,
Obedi wakali mwana wa Bowazi,
Bowazi wakali mwana wa Salamoni,
Salamoni wakali mwana wa Nasoni,
33 Nasoni wakali mwana wa Aminadabu,
Aminadabu wakali mwana wa Ani,
Ani wakali mwana wa Heziloni,
Heziloni wakali mwana wa Pelezi,
Pelezi wakali mwana wa Juda,
34 Juda wakali mwana wa Jakobo,
Jakobo wakali mwana wa Izaka,
Izaka wakali mwana wa Abulahamu,
Abulahamu wakali mwana wa Tela,
Tela wakali mwana wa Naholi,
35 Naholi wakali mwana wa Selugi,
Selugi wakali mwana wa Leu,
Leu wakali mwana wa Pelegi,
Pelegi wakali mwana wa Ebeli,
Ebeli wakali mwana wa Sela,
36 Sela wakali mwana wa Kainani,
Kainani wakali mwana wa Alifakisadi,
Alifakisadi wakali mwana wa Semu,
Semu wakali mwana wa Nowa,
Nowa wakali mwana wa Lameki,
37 Lameki wakali mwana wa Metusela,
Metusela wakali mwana wa Enoki,
Enoki wakali mwana wa Jaledi,
Jaledi wakali mwana wa Mahalaleeli,
Mahalaleeli wakali mwana wa Kainani,
38 Kainani wakali mwana wa Enosi,
Enosi wakali mwana wa Seti,
Seti wakali mwana wa Adamu,
Adamu wakali mwana wa Leza.