Luka
5 Aciindi cimwi makamu aabantu naakali kumubumba akuswiilila majwi aa Leza, wakaimvwi kumbali aazyiba lya Genesalete. 2 Mpoonya wakabona mato obilo kaaimvwi kumbali aazyiba, pele bazubi bakalizwide mulingawo alimwi bakali kusanzya tunsabwe twabo. 3 Naakatanta bwato bumwi, oobo bwakali bwa Simoni, wakamulomba kuti abukwasule aniini kuzwa kunkomwe. Mpoonya wakakkala mubwato akutalika kuyiisya makamu aabantu. 4 Naakamana kwaambaula, wakaambila Simoni kuti: “Katuya akati kazyiba, eelyo nywebo nobaalumi muwaale tunsabwe twanu kutegwa mujaye nswi zinji.” 5 Pele mukwiingula, Simoni wakaamba kuti: “Mufwundisi, masiku oonse twalikubeleka kakunyina ncotwajaya, pele akaambo kakuti nduwe waamba ndilatuwaala tunsabwe.” 6 Nobakacita boobu, bakajaya nswi zinji. Mane tunsabwe twabo twakatalika kudunsauka. 7 Aboobo bakaita beenzinyina bakali mubwato bumbi kuti baboole babagwasye, eelyo bakaboola alimwi bakazuzya mato obilo cakuti akatalika kubbila. 8 Abone boobu, Simoni Petulo wakamufwugamina Jesu akwaamba kuti: “Tantamuka kulindime O Mwami, nkaambo ndimuntu sizibi.” 9 Nkaambo nibakajaya nswi zinji wakakankamana kapati kubikkilizya abaabo boonse mbaakali limwi, 10 ncimwi buyo a Jakobo a Johane, bana ba Zebedayo, ibakali beenzinyina ba Simoni. Pele Jesu wakaambila Simoni kuti: “Utayoowi. Kuzwa lino unoozuba bantu baumi.” 11 Aboobo bakatola mato aabo kucito akusiya zyoonse akumutobela.
12 Aciindi cimwi naakali mumunzi umbi, mwaalumi umwi wakazwide cinsenda mubili woonse naakabona Jesu, wakavwundama akumulomba kuti: “Mwami, ikuti koyanda, ulakonzya kundisalazya.” 13 Aboobo wakatandabika janza lyakwe, wamujata akumwaambila kuti: “Ndilayanda. Kosalazyigwa.” Mpoonya aawo cinsenda cakamana. 14 Lino wakalailila mwaalumi ooyo kutaambila muntu uuli woonse, akuti: “Pele koya ukalitondezye kumupaizi alimwi ukatuule cituuzyo kujatikizya kusalazyigwa kwako, mbubonya Musa mbwaakalailila, kutegwa cikabe bumboni kuli mbabo.” 15 Pele mpuwo yakwe yakamwaika kapati, aboobo makamu aabantu akali kubungana kuti baswiilile alimwi akuponesyegwa kumalwazi aakabajisi. 16 Pele wakaunka waakukkala alikke mucimpayuma kapaila.
17 Buzuba bumwi naakali kuyiisya, ba Falisi abamayi ba Mulawo ibakaboola kuzwa muminzi yoonse ya Galilaya, Judaya alimwi a Jelusalemu bakalikkede ooko abalo, alimwi wakalijisi nguzu zya Jehova zyakuponya bantu. 18 Lino kwakaboola baalumi bakatembede muntu uulebukide mubili amacila, eelyo bakali kuyandaula nzila mbobanga bamunjizya akumusisya kuli Jesu. 19 Aboobo mbobatakajana aakumunjizyizya akaambo kankamu yabantu, bakatanta aciluli, mpoonya kwiinda acipulo ncobakadonkola bakamulengelezya amacila akati kabaabo bakali kumbele lya Jesu. 20 Naakabona lusyomo lwabo, wakati: “Omwaalumi, walekelelwa zibi zyako.” 21 Mpoonya balembi aba Falisi bakatalika kubandika mulicabo kabati: “Nguni ooyu waamba majwi aakusampula Leza? Nguni uukonzya kulekelela zibi kunze lya Leza alikke?” 22 Pele Jesu mbwaakazyiba nzyobakali kuyeeya, mukubaingula wakababuzya kuti: “Ino muyeeya nzi mumyoyo yanu? 23 Ncili cuuba-uba, ikwaamba kuti, ‘Walekelelwa zibi zyako,’ naa kwaamba kuti, ‘Nyamuka weende’? 24 Pele kutegwa muzyibe kuti Mwana wamuntu ulijisi nguzu zyakulekelela bantu zibi anyika–” wakaambila wakalebukide mubili kuti: “Ndati: Nyamuka, bweza macila aako, koya kuŋanda yako.” 25 Mpoonya aawo wakanyamuka kabalangilila, akubweza ceeco mpaakali kulala akuya kuŋanda yakwe kalemeka Leza. 26 Lino bantu boonse bakagambwa mpoonya bakalemeka Leza, alimwi bakayoowa kabati: “Sunu twabona zyintu nzyotutanabwene!”
27 Lino musyule lyazyintu eezyi, wakazwa anze, mpoonya wakabona simutelo uutegwa Levi kakkede kuŋanda iitelelwa, eelyo wakamwaambila kuti: “Koba sikunditobela.” 28 Mpoonya wakasiya zyintu zyoonse, kumane wakanyamuka akumutobela. 29 Eelyo Levi wakamucitila pobwe pati lyakumutambula muŋanda yakwe, alimwi kwakali basimutelo banji abantu bambi mbobakakkede limwi kucakulya. 30 Babone boobo ba Falisi abalembi babo bakatongaukila basikwiiya bakwe, kabati: “Ino nkaambo nzi ncomulya akunywa abasimutelo abasizibi?” 31 Jesu wakabaingula kuti: “Aabo bataciswi tabayandiki musilisi, pele aabo baciswa mbabayandika musilisi. 32 Ndakaboolela kwiita basizibi kuti beempwe ikutali bantu baluleme.”
33 Bakamwaambila kuti: “Basikwiiya ba Johane lyoonse balaliimya kulya alimwi balakomba, ncimwi buyo ababa Falisi, pele bako balalya akunywa.” 34 Jesu wakabaambila kuti: “Sena mulakonzya kupa kuti balongwe basibwiinga baliimye kulya ciindi nacili ambabo? 35 Pele ciyoosika ciindi ncobayoonyangwa sibwiinga; eelyo bayooliimya kumazuba aayo.”
36 Alimwi wakabaambila cikozyanyo kati: “Kunyina uutenda cigamba kucisani caatala cipya akucisuma kucisani caatala cakaindi. Ikuti wacita boobo, nkokuti cigamba cipya cilamonkola cisani cakaindi alimwi cigamba catendwa kucisani cipya taceendelani acakaindi. 37 Alimwi kunyina muntu uubikka waini mupya munkomo zyazipaya zyakaindi. Ikuti wacita boobo, nkokuti waini mupya ulabbosyola nkomo zyazipaya, eelyo ulatika azyalo nkomo zyazipaya zilanyonyooka. 38 Pele waini mupya weelede kubikkwa munkomo zyazipaya zipya. 39 Kunyina muntu iwanywa waini wakaindi uuyanda mupya, nkaambo waamba kuti, ‘Wakaindi mubotu.’”