Luka
6 Lino mu Sabata wakali kwiinda mumyuunda yamaila, eelyo basikwiiya bakwe bakali kupulula myaangala yamaila, kwiipuka-puka mumaanza akulya maila. 2 Babone boobu, ba Falisi bamwi bakati: “Nkaambo nzi ncomucita cintu citazumizyidwe mu Sabata?” 3 Pele Jesu mukwiingula wakabaambila kuti: “Sena taakwe buzuba nomwakabala ncaakacita Davida ciindi walo abaalumi mbaakali limwi nobakafwa nzala? 4 Sena tanaakanjila muŋanda ya Leza akutambula zinkwa zyazituuzyo akuzilya akupa zimwi kubaalumi mbaakali limwi, zyalo ziteelede kuligwa amuntu uuli woonse ccita buyo bapaizi balikke?” 5 Alimwi wakabaambila kuti: “Mwana wamuntu ngo Mwami wa Sabata.”
6 Mubuzuba bumwi bwa Sabata wakanjila mucikombelo akutalika kuyiisya. Alimwi oomo mwakali mwaalumi umwi wakapuutide janza lyalulyo. 7 Lino balembi aba Falisi bakali kumulangisisya ikuti babone naa ulaponya mu Sabata ikutegwa bajane nzila yakuti bamupe mulandu. 8 Nokuba boobo, wakalizyi nzyobakali kuyeeya, aboobo wakaambila mwaalumi ooyo uupuutide janza kuti: “Nyamuka uzyikwiimine akati.” Eelyo wakanyamuka akwiima mpaakaambilwa. 9 Mpoonya Jesu wakabaambila kuti: “Andimubuzye boobu nywebo nobaalumi, Sena cilizumizyidwe mu Sabata kucita cibotu naa kucita cibi, kufwutula naa kujaya?” 10 Amane kubalanga boonse, wakaambila mwaalumi ooyo kuti: “Kovwungulula janza lyako.” Wakacita oobo, eelyo janza lyakwe lyakaba kabotu. 11 Pele bakakalala kapati, eelyo bakatalika kulyaambauzya ncobakeelede kumucita Jesu.
12 Mukuya kwamazuba aaya ngoonya, wakaunka kucilundu kuyoopaila, alimwi wakapaila kuli Leza masiku oonse. 13 Pele nobwakaca, wakaita basikwiiya bakwe akusala akati kabo bali kkumi ababili, aabo alimwi mbaakaita kuti batumwa: 14 Simoni ooyo alimwi ngwaakaulika kuti Petulo; Anduleya imunyina; Jakobo; Johane; Filipo; Batolomayo; 15 Matayo; Tomasi; Jakobo mwana wa Alifayo; Simoni walo uutegwa musungu; 16 Judasi mwana wa Jakobo; alimwi a Judasi Isikaliyote, ooyo iwakamwaaba.
17 Mpoonya wakaselemuka ambabo akwiima abusena bubambasede, eelyo kwakali nkamu mpati yabasikwiiya bakwe, amakamu-makamu aabantu bazwa mu Judaya a Jelusalemu akucooko cili kumbali aalwizi ca Tulo a Sidoni, ibakaboola kukumuswiilila alimwi akuponesyegwa malwazi aakabajisi. 18 Nobaba baabo bakali kupenzyegwa amyuuya iisofweede bakaponesyegwa. 19 Alimwi bantu boonse munkamu bakali kuyanda kumuguma, nkaambo nobakali kucita boobo nguzu zyakali kuzwa mulinguwe akubaponya boonse munzila yamaleele.
20 Eelyo wakalanga basikwiiya bakwe akutalika kwaamba kuti:
“Mulikkomene nywebo nobacete, nkaambo Bwami bwa Leza mbubwanu.
21 “Mulikkomene nywebo nomufwa nzala lino, nkaambo muyookkuta.
“Mulikkomene nywebo nomulila lino, nkaambo muyooseka.
22 “Mulikkomene nywebo kufwumbwa leelyo bantu nobamusula, nobamutanda akati kabo, nobamusampaula akumwaamba kuti muli babi akaambo ka Mwana wamuntu. 23 Amukakondwe akusekelela mubuzuba oobo, nkaambo amubone! Bulumbu bwanu kujulu mbupati, nkaambo eezyo nzyezyintu bamausyi nzibakali kucita kubasinsimi.
24 “Pele maawe kulindinywe nobavwubi, nkaambo mubutambwida limwi bulumbu bwanu.
25 “Maawe kulindinywe nomukkutide lino, nkaambo muyoofwa nzala.
“Maawe, nywebo nomusekelela lino, nkaambo muyoolila akoomoka.
26 “Maawe kufwumbwa leelyo bantu boonse nobamulumbaizya, nkaambo zyintu zili boobu nzyobakacita bamausyi kubasinsimi bakubeja.
27 “Pele nywebo nomuswiilila ndimwaambila kuti: Amuzumanane kuyanda basinkondonyoko, kucita zibotu kuli baabo bamusulide, 28 kubaleleka aabo bamusinganya akubapailila aabo bamutukila. 29 Ooyo uukuuma lubayi kusaya limwi, komupa alimbi, ayooyo uukunyanga cisani caatala, utamukasyi acisani camukati. 30 Komupa kufwumbwa uukulomba, ayooyo uubweza zyintu zyako utamusesi.
31 “Alimwi mbubonya mbomuyanda kuti bantu bamucitile, andinywe amubacitile mbubonya.
32 “Eelyo ikuti kamuyanda baabo ibamuyanda, ino mbubotu nzi mbomujana? Nkaambo abalo basizibi balabayanda aabo babayanda. 33 Alimwi ikuti mwacita zibotu kuli baabo bamucitila zibotu, ino mbubotu nzi mbomujana? Abalo basizibi balacita mbubonya oobo. 34 Ikuti kamukweletesya baabo mbomusyoma kuti bayoomujolela, ino mbubotu nzi mbomujana? Nobaba basizibi balakweletesya basizibi kutegwa bakatambule mbubonya. 35 Muciindi caboobo, amuzumanane kubayanda basinkondonyoko akucita zibotu akukweletesya kakunyina kulangila kujolelwa cili coonse, eelyo bulumbu bwanu buyooba bupati alimwi muyooba bana ba Mupatikampatila, nkaambo ngusiluzyalo kubantu batalumbi ababi. 36 Amube aluse lyoonse mbubonya Uso mbwali aluse.
37 “Alimwi amuleke kubeteka, eelyo tamukabetekwi, amuleke kupa bamwi mulandu, eelyo tamukapegwi mulandu. Amuzumanane kulekelela bamwi zibi zyabo eelyo andinywe muyoolekelelwa zibi zyanu. 38 Amube baabi, abalo bantu bayoomwaabila. Bayoomutilila munkomwe zyanu zyaacamba ceelelo cibotu cisindaidwe, citikimwidwe alimwi cizwide pamu. Nkaambo cipimyo ncomubelesya kupimina bamwi, ncobayoobelesya kumupimina andinywe.”
39 Mpoonya wakabaambila cikozyanyo kati: “Sena moofwu ulakonzya kusololela moofwunyina? Sena boonse bobilo tabakoowida mumulindi? 40 Sikwiiya taindi mwiiyi wakwe, pele kufwumbwa uyiisyigwa kabotu uyooba mbuli mwiiyi wakwe. 41 Aboobo, ino nkaambo nzi ncolanga kakwa kali muliso lyamunyoko pele toboni itanda lili muliso lyako? 42 Ino mbuti mbonga waambila munyoko kuti, ‘Mukwesu, atubone ndikugusye kakwa kali muliso lyako,’ kakuli yebo omwini tolangi itanda lili muliso lyako? Osikuupaupa ameso! Kosaanguna kugusya tanda muliso lyako, mpoonya ulabona kabotu mbonga wagusya kakwa kali muliso lyamunyoko.
43 “Nkaambo kunyina cisamu cibotu cizyala micelo iibolede, alimwi kunyina cisamu cibolede cizyala micelo mibotu. 44 Nkaambo cisamu cili coonse cilazyibwa kumicelo yancico. Mucikozyanyo, bantu tabaceli nkuyu kucisamu camamvwa pe, naa kutema masaansa kucitewo camamvwa. 45 Muntu mubotu ulagusya zyintu zibotu ziyobwedwe mumoyo wakwe, pele muntu mubi ulagusya zyintu zibi ziyobwedwe mumoyo wakwe, nkaambo mulomo waamba zyintu zizwide mumoyo.
46 “Ino mundiitila nzi kuti Mwami! Mwami! pele tamuciti zyintu nzyondaamba? 47 Umwi aumwi uuboola kulindime akuswiilila majwi aangu akwaacita, ndamutondezya mbwabede: 48 Uli mbuli muntu ooyo naakali kuyaka ŋanda iwakasya mulindi mulamfwu akuyaka ntalisyo amwala. Lino mulonga nowakazula, maanzi akapaya akuuma kuŋanda eeyo, pele tanaakakonzya kwiizungaanya nkaambo yakayakidwe kabotu. 49 Lino ooyo uuswiilila pele kataciti cili coonse, uli mbuli muntu wakayaka ŋanda kakunyina ntalisyo. Maanzi akauma kuŋanda eeyo, mpoonya yakawa, alimwi yakanyonyooka kapati.”