Milimo
10 Lino mu Kaisaleya kwakali mwaalumi umwi uutegwa Koneliyo, silutwe wabasikalumamba bankamu ya Italiya, kweelana amboyakali kwiitwa. 2 Wakali mwaalumi uuyandisya kukomba alimwi uuyoowa Leza antoomwe abamuŋanda yakwe boonse, alimwi wakali kupa zipego zyaluse zinji kubantu akupaila mipailo yakukombelezya Leza cakutaleka. 3 Iciindi kacili afwaafwi awoola lyafwuka* lyabuzuba wakabona kabotu-kabotu mucilengaano mungelo wa Leza kaboola kulinguwe akumwaambila kuti: “Koneliyo!” 4 Koneliyo wakamulangisya kayoowede, mpoonya wakamubuzya kuti: “Ninzi Mwami?” Wakati kulinguwe: “Mipailo yako azipego zyako zyaluse zyasika kuli Leza kazili ciibalusyo. 5 Aboobo lino kotuma baalumi ku Jopa kuti bakaite Simoni ooyo uutegwa Petulo. 6 Ooyu muntu mweenzu wamuntu umwi uutegwa Simoni, imusuki wazipaya uujisi ŋanda kumbali aalwizi.” 7 Mbwaakaunkila buyo mungelo iwakaambaula anguwe, wakaita bobilo akati kababelesi bakwe bamuŋanda alimwi asikalumamba mukombi akati kabaabo bakali kumubelekela lyoonse, 8 eelyo wakabalwiida makani oonse akubatuma ku Jopa.
9 Ibuzuba bwakatobela nobakacili mulweendo lwabo pele kabali afwaafwi amunzi ooyo, Petulo wakatanta aciluli caŋanda* kuyoopaila. Iciindi cakali kutandila kuwoola lyacisambomwi.* 10 Pele wakafwide nzala kapati alimwi wakali kuyanda kulya. Nobakacili kubamba cakulya wakabona cilengaano 11 eelyo wakabona julu lijalukide alimwi acintu cili mbuli ciyumwido kaciboola ansi mbuli cisani cipati caangidwe muziswi zyone icilengelezyegwa; 12 alimwi mulincico mwakali banyama bamisyobo yoonse, bamaulu one, bakalaba anyika alimwi abayuni bamujulu. 13 Mpoonya wakamvwa jwi limwaambila kuti: “Nyamuka Petulo, jaya ulye!” 14 Pele Petulo wakati: “Peepe, Mwami, nkaambo tandina buzuba ndalya cintu cili coonse cisofweede alimwi citasalali.” 15 Alimwi ijwi lyakaambaula anguwe ciindi cabili kaliti: “Koleka kwaamba zyintu Leza nzyaasalazya kuti zilisofweede.” 16 Eeci cakacitika ciindi catatu, eelyo mpoonya aawo ciyumwido eeco cakatolwa kujulu.
17 Lino Petulo naakacizingidwe kujatikizya ncocakali kwaamba cilengaano ncaakabona, amubone ibaalumi bakatumwa a Koneliyo bakalibuzyide kwakali ŋanda ya Simoni, eelyo bakaliimvwi amulyango walukwakwa lwanjiyo. 18 Mpoonya bakaita akubuzya naa Simoni uutegwa Petulo mpaakaswailide aawo. 19 Petulo naakacili kuyeeya zyacilengaano eeco, imuuya wakamwaambila kuti: “Bona! Baalumi botatwe balakuyandaula. 20 Aboobo nyamuka, seluka uunke ambabo, utadonaiki naaceya, nkaambo ndime ndabatuma.” 21 Aboobo Petulo wakaseluka kuunka kubaalumi aabo akubaambila kuti: “Amubone! Ndime ngomuyandaula. Ino mwalonda nzi?” 22 Bakati: “Koneliyo silutwe wabasikalumamba, mwaalumi mululami, uuyoowa Leza alimwi uulumbaizyigwa acisi coonse caba Juda, wakapegwa malailile aa Leza amungelo uusalala kuti atume bantu kukwaambila kuti uunke kuŋanda yakwe kutegwa amvwe eezyo nzyotiimwaambile.” 23 Aboobo wakabanjizya muŋanda akubasamausya.
Nobwakaca wakanyamuka akuunka ambabo, alimwi bakwesu bamwi ibamu Jopa bakaunka anguwe. 24 Mubuzuba bwakatobela wakanjila mu Kaisaleya. Lino Koneliyo wakali kubalangila alimwi wakatambide basazinyina abeenzinyina mbocakali kumvwana kapati. 25 Mbwaakanjilila buyo Petulo, Koneliyo wakamucinga, wakawida kumaulu aakwe akumufwugamina. 26 Pele Petulo wakamwiimikizya ulaamba: “Nyamuka; andime ndili muntu buyo.” 27 Eelyo kacibandika anguwe wakanjila mukati akujana bantu banji balibungene, 28 mpoonya wakabaambila kuti: “Mulizyi kabotu mbokutondwa kumu Juda kuyanzana naa kuswaya muntu wamusyobo umbi; pele lino Leza wanditondezya kuti tandeelede kwaamba muntu uuli woonse kuti ulisofweede naa kuti tasalali. 29 Nkakaambo kaako ndakanyamuka kakunyina kukaka mbondakaitilwa buyo. Aboobo ndiyanda kuzyiba kaambo nkomwandiitila.”
30 Mpoonya Koneliyo wakati: “Mazuba one aainda kubala kuzwa awoola elino, ndakali kupaila muŋanda yangu awoola lyafwuka.* Mpoonya ndakabona mwaalumi umwi wakasamide cisani cinyengema kaimvwi kumbele lyangu. 31 Wakati: ‘Koneliyo, mupailo wako wamvwugwa alimwi azipego zyako zyaluse zyaibalukwa a Leza. 32 Aboobo kotuma bantu ku Jopa bakaite Simoni, ooyo uutegwa Petulo. Ooyu muntu mweenzu muŋanda ya Simoni, musuki wazipaya, uukkala kumbali aalwizi.’ 33 Aboobo ndilyonya ndakakutumina bantu kukwiita, alimwi wacita kabotu kuboola okuno. Aboobo lino toonse tuli waano kumbele lya Leza kutegwa tumvwe zyintu zyoonse nzyowalaililwa a Jehova kuti waambe.”
34 Naakamvwa boobo, Petulo wakabbamuna mulomo akwaamba kuti: “Lino ndazyiba ncobeni kuti Leza tasalululi, 35 pele muzisi zyoonse kufwumbwa muntu uumuyoowa akucita ziluleme ulatambulwa kulinguwe. 36 Wakatuma jwi kubana ba Isilayeli ikwaambilizya makani mabotu aaluumuno kuli mbabo kwiinda muli Jesu Kilisito kuti: Ooyu ngo Mwami waboonse. 37 Mulaazyi makani aakabandikwa mu Judaya moonse, kutalikila mu Galilaya nolwakainda lubbapatizyo ndwaakakambauka Johane, 38 kujatikizya Jesu ooyo wakazwa ku Nazaleta. Leza wakamunanika amuuya uusalala anguzu, alimwi wakeenda koonse-koonse munyika kacita zyintu zibotu akuponya boonse bakali kudyaamininwa a Diabolosi; nkaambo Leza wakali anguwe. 39 Lino tuli bakamboni bazyintu zyoonse nzyaakacita mucisi caba Juda amu Jelusalemu; pele alimwi bakamujaya kwiinda mukumugagaila acisamu. 40 Leza wakamubusya ooyu Muntu mubuzuba bwatatu akumupa kuti aboneke, 41 ikutali kubantu boonse pe, pele kuli bakamboni bakasalilwa limwi a Leza, kulindiswe, nitwakalya akunywa anguwe naakabuka kuzwa kubafwu. 42 Alimwi wakatulailila kukambaukila bantu akupa bumboni cakulomya bwakuti muntu ooyu Ngonguwe wakasalwa a Leza kuti abe mubetesi wabaumi abafwide. 43 Basinsimi boonse bamucitila bumboni bwakuti, muntu uuli woonse uumusyoma ulalekelelwa zibi zyakwe kwiinda muzyina lyakwe.”
44 Petulo naakacili kwaamba makani aaya, imuuya uusalala wakabasikila boonse aabo bakali kuswiilila majwi aa Leza. 45 Alimwi basyomi bapaludwe ibakaboolede a Petulo bakagambwa, nkaambo cipego camuuya uusalala cakali kupegwa akubantu bamasi. 46 Nkaambo bakabamvwa kabaambaula myaambo imbi akutembaula Leza. Mpoonya Petulo wakati: 47 “Sena kuli muntu uukonzya kubakasya kubbapatizyigwa amaanzi bantu aaba ibatambula muuya uusalala mbubonya mbuli ndiswe?” 48 Eelyo wakabalailila kuti babbapatizyigwe muzyina lya Jesu Kilisito. Mpoonya bakamulomba kuti kacikkede ambabo kwamazuba aali mbwaabede.