Milimo
9 Pele Saulo kacifwundilide kuyanda kupenzya akujaya basikwiiya ba Mwami, wakaunka kumupaizi mupati 2 akuyoomulomba magwalo aakutola kuzikombelo zyaku Damasiko ikutegwa aakujana bantu bali boonse, ibaalumi abamakaintu batobela Nzila Eeyi* akabajate akubaleta ku Jelusalemu kabaangidwe.
3 Lino naakali kweenda wakasika afwaafwi aku Damasiko, eelyo ndilyonya mumuni uuzwa kujulu wakamumwekela, 4 mpoonya wakawida ansi alimwi wakamvwa jwi liti kulinguwe: “Saulo, Saulo, ino undipenzyezya nzi?” 5 Saulo wakati: “Ino nduwe ni, Mwami?” Wakati: “Ndime Jesu ooyo ngopenzya. 6 Nokuba boobo, nyamuka unjile mumunzi ooyu, eelyo uyooambilwa ncoelede kucita.” 7 Lino baalumi mbaakali kweenda limwi bakabbwelemana buyo kabatakonzyi kwaambaula, nokuba kuti ijwi ncobeni bakalimvwa, pele kunyina muntu ngobakabona. 8 Pele Saulo wakanyamuka ansi, alimwi nokuba kuti meso aakwe akalibbanukide kunyina ncaakali kubona. Aboobo bakamujatilila kujanza akumunjizya mumunzi wa Damasiko. 9 Eelyo kwamazuba otatwe kunyina naakabona cintu cili coonse, alimwi tanaakali kulya nokuba kunywa.
10 Mu Damasiko mwakali kukkala sikwiiya umwi uutegwa Hananiya, eelyo mucilengaano Mwami wakamwiita wati: “Hananiya!” Wakaingula wati: “Mpondili, Mwami.” 11 Mwami wakati kulinguwe: “Nyamuka uunke kunzila iitegwa Iimvwi Nci, alimwi waakusika kuŋanda ya Judasi ukalombe kubonana amuntu uutegwa Saulo uuzwa ku Taso. Nkaambo bona ulapaila, 12 alimwi mucilengaano wabona mwaalumi uutegwa Hananiya wanjila akumwaampa kutegwa atalike kubona.” 13 Pele Hananiya wakaingula kuti: “O Mwami, mbanji mbondamvwa kabaamba zyamwaalumi ooyu kuti wakacitila bantu bako basalali mu Jelusalemu zyintu zinji zibyaabi. 14 Alimwi akokuno basilutwe babapaizi bakamupa nguzu zyakwaanga boonse aabo baita zyina lyako.” 15 Pele Mwami wakati kulinguwe: “Koya buyo, nkaambo mwaalumi ooyu ncibelesyo ncindasala kuti akaambilizye zyina lyangu kuli bamasi akubami alimwi akubana ba Isilayeli. 16 Nkaambo ndiyoomutondezya cakusalazya mbozili zinji zyintu nzyayelede kupenga akaambo kazyina lyangu.”
17 Aboobo Hananiya wakaunka akuyoonjila muŋanda eeyo, alimwi wakabikka maanza aakwe alinguwe akwaamba kuti: “Saulo mukwesu, Mwami Jesu, uulya wakalibonya kulinduwe munzila nowakali kuboola okuno wandituma kutegwa ukonzye kubona akuti uzuzyigwe muuya uusalala.” 18 Ndilyonya eelyo mumeso aakwe mwakaloka izilibonya mbuli maamba aanswi, mpoonya wakatalika kubona; eelyo wakanyamuka alimwi wakabbapatizyigwa, 19 kumane wakalya cakulya akuba anguzu.
Wakakkala kwamazuba aali mbwaabede abasikwiiya ku Damasiko, 20 alimwi ndilyonya eelyo wakatalika kukambauka muzikombelo kujatikizya Jesu kuti Ooyu Mwana wa Leza. 21 Pele aabo boonse bakali kumuswiilila bakagambwa kapati alimwi bakali kwaamba kuti: “Sena ooyu tali mwaalumi uulya wakabapenzya kapati aabo bali mu Jelusalemu ibaita zyina eeli, alimwi iwakaboola okuno kajisi makanze aakuti abaange akubatola kuli basilutwe babapaizi?” 22 Pele Saulo wakazumanana kuyaabuba anguzu zinji alimwi wakali kubalamya ba Juda bakali kukkala mu Damasiko naakali kupa bumboni busalede bwakuti ooyu ngo Kilisito.
23 Lino nokwakainda mazuba manji, ba Juda bakalivwiya akupangana kuti bamujaye. 24 Nokuba boobo, Saulo wakaazyiba makanze aabo. Bakali kulindilila akumilyango yamunzi isyikati amasiku kutegwa bamubona bamujaye. 25 Aboobo masiku basikwiiya bakwe bakamubikka mucisuwo cipati akumwiinzya acipulo cabwaanda bamuselusizya kunze.
26 Naakasika mu Jelusalemu wakasoleka kulisanganya kuli basikwiiya; pele boonse bakali kumuyoowa nkaambo tiibakasyoma kuti wakali sikwiiya awalo. 27 Aboobo Banaba wakamubweza akumutola kubatumwa, alimwi ooko wakabalungulwida Saulo mbwaakabona Mwami munzila akuti wakaambaula anguwe, alimwi ambwaakakambauka cabusicamba muzyina lya Jesu ku Damasiko. 28 Eelyo wakazumanana kukkala ambabo, kaangulukide kweendeenda mu Jelusalemu akwaambaula cabusicamba muzyina lya Mwami; 29 alimwi wakali kubandika akukazyanya aba Juda baambaula Chigiliki. Pele aaba bakali kusoleka kumujaya. 30 Lino bakwesu nobakazyiba makani aaya, bakamuleta ku Kaisaleya akumutumina ku Taso.
31 Mpoonya mbungano mu Judaya, mu Galilaya amu Samaliya moonse yakaba muluumuno alimwi yakali kuyumizyigwa; mpoonya akaambo kakuti yakali kweenda cakuyoowa Jehova amuluumbulizyo lwamuuya uusalala, yakazumanana kuyungizyigwa.
32 Lino Petulo naakali kuyaabweenda muzilawo zyoonse wakasika akubasalali ibakali kukkala ku Luda. 33 Ooko wakajana mwaalumi umwi uutegwa Eneya, ooyo watakali kukonzya kubuka abulo kwamyaka iili lusele nkaambo wakalebukide mubili. 34 Eelyo Petulo wakati kulinguwe: “Eneya, Jesu Kilisito wakuponya. Kobuka uyale bulo bwako.” Eelyo wakabuka mpoonya aawo. 35 Alimwi boonse ibakali kukkala mu Luda amucibanda ca Saloni bakamubona, eelyo aaba bakatalika kusyoma Mwami.
36 Pele mu Jopa kwakali sikwiiya umwi uutegwa Tabita, izyina lisandulwidwe kuti Dolika.* Wakali kucitila bamwi milimo mibotu minji alimwi akupa zipego zyaluse. 37 Pele kumazuba aayo wakaciswa akufwa. Aboobo bakausanzya mubili wakwe akuulazika muŋanda yamujulu. 38 Lino mbwaanga munzi wa Luda wakali afwaafwi aku Jopa, basikwiiya nobakamvwa kuti Petulo wakali mumunzi ooyu bakatuma baalumi bobilo kuyoomulomba kuti: “Twakomba kaka ufwambaane kuboola kulindiswe.” 39 Naakamvwa boobo Petulo wakanyamuka akuunka ambabo. Eelyo naakaakusika ooko, bakamutola muŋanda yamujulu; alimwi bamukabafwu boonse bakaboola kulinguwe kabalila akumutondezya zisani zyamukati azyaatala zinji Dolika nzyaakali kubasumina naakacili ambabo. 40 Pele Petulo wakabaambila kuti bazwe anze boonse, eelyo naakafwugama wakapaila. Mpoonya wakacengulukila kwakali mubili akwaamba kuti: “Tabita, buka!” Wakabbanuna meso aakwe alimwi mbwaakamubonena buyo Petulo, wakabuka akukkala. 41 Petulo wakamujata ajanza lyakwe akumwiimikizya, alimwi wakaita basalali abamukabafwu akubatondezya kuti Tabita muumi. 42 Aboobo makani aaya akazyibwa mu Jopa moonse, alimwi banji bakatalika kusyoma mu Mwami. 43 Kwamazuba manji Petulo wakakkala mu Jopa amusuki wazipaya umwi uutegwa Simoni.