1 Bakorinto
12 Lino kujatikizya zipego zyamuuya bakwesu, tandiyandi kuti nywebo kamutaazyi makani aaya. 2 Mulizyi kuti nomwakacili bantu bakunyika, mwakali kweenwa akusololelwa munzila ziindene-indene kumituni eeyo iitaambauli. 3 Aboobo ndiyanda kuti nywebo muzyibe kuti kunyina muntu ooyo waambaula kwiinda mumuuya wa Leza waamba kuti: “Jesu ulisinganizyidwe!” alimwi kunyina uunga waamba kuti: “Jesu Mwami!” ccita buyo kwiinda mumuuya uusalala.
4 Lino kuli zipego ziindene-indene, pele kuli buyo muuya omwe; 5 alimwi kuli milimo yiindene-indene, pele kuli buyo Mwami omwe; 6 alimwi kuli nzila zyakubeleka ziindene-indene, pele Leza ngumwi buyo ooyo uucita zyintu eezyi zyoonse mubantu boonse. 7 Pele zipego zyamuuya zilapegwa kumuntu umwi aumwi kutegwa zibeleke mulimo uugwasya. 8 Mucikozyanyo, kwiinda mumuuya muntu umwi upegwa busongo mukwaambaula, umbi upegwa luzyibo mukwaambaula kuzwa kumuuya omwe nguwenya, 9 umbi upegwa lusyomo kuzwa kumuuya omwe nguwenya, umbi upegwa zipego zyakuponya kuzwa kumuuya ooyo omwe, 10 umbi upegwa nguzu zyakucita milimo mipati, umbi upegwa nguzu zyakusinsima, umbi upegwa nguzu zyakumvwisya majwi aakasololelwa amuuya, umbi upegwa nguzu zyakwaambaula myaambo yiindene-indene, alimwi umbi upegwa nguzu zyakupandulula myaambo yiindene-indene. 11 Pele milimo yoonse eeyi ilacitwa amuuya omwe nguwenya ooyu, uupa zipego eezyi kuli umwi aumwi kumugama kweelana ambuuyanda.
12 Nkaambo mbubonya mubili mbouli omwe pele ujisi zizyo zinji, alimwi zizyo zyoonse zyamubili ooyo nokuba kuti nzinji, mubili omwe, awalo Kilisito mbwabede oobo. 13 Nkaambo ncobeni kwiinda mumuuya omwe toonse twakabbapatizyigwa mumubili omwe, kufwumbwa naa tuli ba Juda naa ba Giliki, bazike naa baangulukide, alimwi toonse twakanywisyigwa muuya omwe.
14 Nkaambo mubili ncobeni tauli cizyo comwe pe, pele nzinji. 15 Ikuti kuulu kwaamba kuti: “Akaambo kakuti tandili janza, mebo tandili cibeela camubili pe,” aaka kaambo takakonzyi kupa kuti kuulu kutabi cibeela camubili pe. 16 Alimwi ikuti kutwi kwaamba kuti: “Akaambo kakuti tandili liso, mebo tandili cibeela camubili pe,” aaka kaambo takakonzyi kupa kuti kutwi kutabi cibeela camubili pe. 17 Ikuti mubili woonse nowali liso, ino notwali kuswiilila buti? Ikuti mubili woonse nowali kutwi, ino notwali kununkizya buti? 18 Pele lino Leza wakabikka cizyo cimwi acimwi mumubili, kweelana ambwaakayanda.
19 Ikuti zyoonse nozyali cizyo comwe, ino mubili nowali kuli? 20 Pele lino zizyo nzinji, nokuba boobo mubili ngumwi. 21 Iliso talikonzyi kwaambila janza kuti: “Tokwe mulimo kulindime”; alimwi mutwe tuukonzyi kwaambila maulu kuti: “Tamukwe mulimo kulindime.” 22 Muciindi caboobo, izizyo zyamubili izilibonya mbuli kuti tazijisi nguzu zilayandika, 23 alimwi izibeela zyamubili nzyotuyeeyela kuti tazilemekwi kapati, eezyi tulazilemeka kapati, aboobo izizyo zyesu izitalibonyi kabotu zilalemekwa kapati, 24 kakuli zizyo zyesu izyeebeka taziyandiki cintu cili coonse. Nokuba boobo, Leza wakabamba mubili akupa bulemu bunji kucibeela cakabulide, 25 kutegwa kutabi kwaandaana mumubili, pele kuti zizyo zyanguwo kazibikkilana maano. 26 Ikuti naa cizyo cimwi capenga, zizyonyina zyoonse zipengela antoomwe ancico; naa ikuti cizyo cimwi calemekwa, zizyonyina zyoonse zilakkomana ancico.
27 Lino nywebo muli mubili wa Kilisito azizyo zyanguwo ziindene-indene. 28 Alimwi Leza wabikka bantu baindene-indene mumbungano, bakusaanguna mbatumwa; babili mbasinsimi; batatu mbaamayi; mpoonya bacita milimo mipati; ibajisi zipego zyakuponya; ibacita milimo iigwasya, ibajisi luzyibo lwakweendelezya, abaambaula mumyaambo yiindene-indene. 29 Sena boonse mbatumwa? Sena boonse mbasinsimi? Sena boonse mbaamayi? Sena boonse balacita milimo mipati? 30 Sena boonse balijisi zipego zyakuponya? Sena boonse balaambaula mumyaambo yiindene-indene? Sena boonse mbasanduluzi? 31 Pele amuzumanane kuyandaula zipego zipati cabusungu. Nokuba boobo, ndilamutondezya nzila yiinda zyoonse.