1 Bakorinto
11 Amwiiye ndime mbubonya andime mbondiiya Kilisito.
2 Lino ndilamulumbaizya nkaambo mulandiyeeya muzyintu zyoonse alimwi mulazitobelesya zilengwa mbubonya mbondakamwaambila nzizyo. 3 Pele ndiyanda kuti muzyibe kuti mutwe wamwaalumi uuli woonse ngu Kilisito; awalo mutwe wamukaintu mwaalumi; mpoonya mutwe wa Kilisito ngu Leza. 4 Kufwumbwa mwaalumi uupaila naa uusinsima kalivwumbide kumutwe uusya mutwe wakwe nsoni; 5 pele kufwumbwa mukaintu uupaila naa uusinsima kalivwumbwide kumutwe uusya mutwe wakwe nsoni, nkaambo ncimwi buyo amukaintu uugeledwe munkulu. 6 Nkaambo ikuti mukaintu katalivwumbi kumutwe, nkokuti agelwe; pele ikuti kacuusya nsoni kumukaintu kugelwa naa kukululwa, alivwumbe.
7 Mwaalumi teelede kulivwumba kumutwe, nkaambo walo ncikozyanyo alimwi mbulemu bwa Leza; pele mukaintu mbulemu bwamwaalumi. 8 Nkaambo mwaalumi tanaakazwa kumukaintu pe, pele mukaintu nguwakazwa kumwaalumi; 9 alimwi kunze lyaboobo, mwaalumi tanaakalengelwa mukaintu pe, pele mukaintu nguwakalengelwa mwaalumi. 10 Nkakaambo kaako mukaintu weelede kuba acitondezyo cakulibombya kumutwe wakwe akaambo kabangelo.
11 Kunze lyaboobo, mu Mwami, mukaintu taandeene kumwaalumi alimwi mwaalumi taandeene kumukaintu. 12 Nkaambo mbubonya mukaintu mbwaakazwa kumwaalumi, awalo mwaalumi nkwali kwiinda mumukaintu; pele zyintu zyoonse zizwa kuli Leza. 13 Amulikoswede nobeni: Sena cileelela kuti mukaintu apaile kuli Leza kalivwumbwide kumutwe? 14 Sena bukkale bwini tabumuyiisyi kuti ncansoni kumwaalumi kuba amasusu malamfwu; 15 pele ikuti mukaintu kajisi masusu malamfwu, mbulemu kulinguwe? Nkaambo upedwe masusu muciindi cacitambala. 16 Pele nokuba kuti muntu umwi kayanda kukazya kwiinda mukutobela ciyanza cimbi, swebo tunyina ciyanza cimbi pe noziba mbungano zya Leza.
17 Pele kumakani aaya ngondimulailila, tandimulumbaizyi pe nkaambo mwaswaangana antoomwe tamuswaanganini kucita zibotu pe, pele muswaanganina kucita zibi. 18 Nkaambo amubone, nomuswaangana antoomwe mumbungano, ndimvwa kuti kuli kwaandaana akati kanu; alimwi munzila imwi ndilasyoma kuti makani aaya ngamasimpe. 19 Nkaambo kuleelede kuba atukamu twabantu bazandukide akati kanu, kutegwa aabo mbakkomanina Leza abalo balibonye.
20 Aboobo, nomuswaangana mubusena bomwe, tamukonzyi kulya mulalilo wa Mwami kabotu-kabotu. 21 Nkaambo nomucita oobo, aumwi usaanguna kulya cilalilo cakwe mwini, cakuti kujanika kuti umwi ufwide nzala alimwi umbi ulikoledwe. 22 Sena ncobeni tamujisi maanda momukonzya kulida akunywida? Naa sena musampaula mbungano ya Leza akubausya nsoni aabo banyina ncobajisi? Ino ndimwaambile nzi? Sena ndimulumbaizye? Kumakani aaya nsikoomulumbaizya pe.
23 Nkaambo ndakatambula kuzwa ku Mwami eeco andime ncindakamuyiisya, kuti Mwami Jesu busiku mbwaakali kuyooabwa wakabweza mukamu, 24 eelyo naakamana kulumba wakuukomoona akwaamba kuti: “Eeci ciiminina mubili wangu uupegwa akaambo kandinywe. Kamucita oobu lyoonse kundiibaluka.” 25 Wakacita mbubonya oobo kujatikizya nkomeki, naakamana kulya cilalilo, ulaamba: “Inkomeki eeyi yiiminina cizuminano cipya ciyeeme abulowa bwangu. Amuzumanane kucita oobu, kufwumbwa leelyo nomunywa nkomeki eeyi, ikundiibaluka.” 26 Nkaambo kufwumbwa nomulya mukamu ooyu akunywa nkomeki eeyi, mulazumanana kwaambilizya lufwu lwa Mwami, kusikila akasike.
27 Aboobo kufwumbwa uulya mukamu naa kunywa nkomeki ya Mwami munzila iteelede unooli amulandu kujatikizya mubili alimwi abulowa bwa Mwami. 28 Muntu asaangune kulilingula abone naa uleelela, mpoonya natiilye mukamu alimwi akunywa nkomeki. 29 Nkaambo ooyo uulya akunywa uliletela lubeta ikuti kalya akunywa katauzyi mubili. 30 Nkakaambo kaako ibanji akati kanu tabajisi nguzu alimwi balicisidwe, alimwi ibamwi baloona mulufwu. 31 Pele ikuti twalilingula akubona naa tuleelela, tatukonzyi kubetekwa pe. 32 Nokuba boobo, notubetekwa, tulalulamikwa a Jehova, kutegwa tutapegwi mulandu antoomwe anyika eeyi. 33 Aboobo, nobakwesu, nomuswaangana antoomwe kutegwa mulye, amulindilane. 34 Ikuti umwi kafwide nzala, alye kuŋanda yakwe, kutegwa nomuswaangana antoomwe mutabetekwi. Pele makani aasyaala ndiyakwaalanganya ndaakusika ooko.