1 Bakorinto
3 Aboobo bakwesu, tiindakacikonzya kukanana andinywe mbubonya mbobaambilwa aabo basololelwa amuuya wa Leza, pele mbuli baabo basololelwa azisusi zyanyama, mbuli bavwanda muli Kilisito. 2 Ndakamupa mukupa, ikutali cakulya ciyumu, nkaambo tiimwakaningasima. Alimwi noliba lino, tamunasima pe, 3 nkaambo mucisololelwa azisusi zyanyama. Mbwaanga kucili bbivwe alimwi akutamvwana akati kanu, sena tamusololelwi azisusi zyanyama alimwi akweenda mbuli mbobeenda bantu munyika? 4 Nkaambo ikuti umwi kaamba kuti: “Mebo ndili wa Paulo,” pele umbi kati: “Mebo ndili wa Apolo,” sena tamuceendi mbuli mbobeenda bantu buyo?
5 Aboobo ino Apolo nguni? Inzya, ino Paulo nguni? Mbabelesi buyo ibakamugwasya kuba basyomi, mbubonya Mwami mbwaakapa umwi aumwi mulimo. 6 Mebo ndakasyanga, Apolo wakatilila, pele Leza nguwakali kukomezya; 7 aboobo ooyo uusyanga naba ooyo uutilila kunyina mbwabede pe, pele Leza uukomezya. 8 Lino ooyo uusyanga ayooyo uutilila mbamwi, pele muntu aumwi uyootambula bulumbu bwakwe kweelana amulimo wakwe. 9 Nkaambo tuli basimilimonyina a Leza. Nywebo nobantu muli muunda wa Leza uulimwa, iŋanda ya Leza.
10 Kweelana aluzyalo lwa Leza ndundakapegwa, ndakabamba ntalisyo mbuli muyaki mupati imusongo, pele umwi muntu ulayaka alinjiyo. Pele umwi aumwi abikkile maano mbwayaka alinjiyo. 11 Nkaambo kunyina muntu uukonzya kubamba ntalisyo iimbi iili yoonse kunze lyayeeyo iibambidwe kale, nkokuti Jesu Kilisito. 12 Lino ikuti antalisyo eeyo umwi wayasya ngolida naa nsiliva naa mabwe mayandisi alimwi umwi wayasya zisamu naa bwizu naa makuba, 13 imulimo waumwi aumwi uyoolibonya, nkaambo buzuba bwamasunko buyooutondezya antangalala, nkaambo uyooyubununwa amulilo; alimwi mulilo wini uyootondezya mbuubede mulimo waumwi aumwi. 14 Ikuti mulimo wakuyaka ngwaacita umwi antalisyo eeyo wasyaala, muntu ooyo uyootambula bulumbu; 15 ikuti mulimo waumwi wapya, muntu ooyo uyoosweekelwa, pele walo kumugama uyoofwutulwa; pele, ikuti naa wafwutulwa, uyooba mbuli muntu wakwempwa mumulilo.
16 Sena tamuzyi kuti nywebo nobantu muli tempele lya Leza, akuti muuya wa Leza ukkala mulindinywe? 17 Ikuti muntu wanyonyoona tempele lya Leza, Leza uyoomunyonyoona muntu ooyo; nkaambo tempele lya Leza lilasalala, alimwi nywebo ndendinywe tempele eelyo.
18 Kutabi muntu uulyeena pe: Ikuti umwi akati kanu uyeeya kuti musongo mubweende bwazyintu oobuno, aabe mufwubafwuba, ikutegwa abe musongo. 19 Nkaambo busongo bwanyika eeyi mbufwubafwuba kuli Leza; nkaambo kulembedwe kuti: “Ulabajata basongo mubucenjezu bwabo beni.” 20 Alimwi kulembedwe kuti: “Jehova ulizyi kuti mizeezo yabantu basongo njabuyo.” 21 Aboobo kutabi muntu uulilumbaizya mubantu; nkaambo zyintu zyoonse nzizyanu, 22 abe Paulo naa Apolo naa Kefa naa nyika naa buumi naa lufwu noziba zyintu ziliko lino naa iziciboola, zyintu zyoonse nzizyanu; 23 pele nywebo muli ba Kilisito; awalo Kilisito nguwa Leza.