Bagalatiya
4 Lino ndaamba kuti kufwumbwa kuti sikukona kali mwana musyoonto kunyina mpobaindene amuzike, nokuba kuti mwami wazyintu zyoonse, 2 pele uli mumaanza aabantu bamulela ababanzi mane kusikila mubuzuba mbobakabikkila limwi bausyi. 3 Mbubonya buyo, notwakali bana basyoonto, aswebo twakali mubuzike kuzyintu zyabwana zyamunyika ino. 4 Pele ciindi cakabikkidwe nocakazyulila, Leza wakatuma Mwanaakwe, ooyo wakazyalwa kumukaintu alimwi iwakali kweendelezyegwa amulawo, 5 kutegwa abanunune aabo bakali kweendelezyegwa amulawo kwiinda mukubaula, kucita kuti Leza atutambule katuli bana bakwe.
6 Lino mbwaanga muli bana, Leza watuma muuya wa Mwanaakwe mumyoyo yesu ooyo woongolola kuti: “Abba, Taata!” 7 Aboobo tocili muzike pe, pele uli mwana muzyale; eelyo kuti koli mwana muzyale, nkokuti alimwi Leza wakucita kuti ube sikukona.
8 Nokuba boobo, eelyo nomwatakalina kumuzyiba Leza, eeco nceciindi nomwakali bazike bazyeezyo mubwini izitali baleza. 9 Pele lino mbwaanga mulimuzyi Leza, naa andaambe kuti lino mbwaanga mulizyibidwe a Leza, ino kayi mupilukila buti kuzyintu zyabwana izitagwasyi alimwi zinyina mpindu akuyanda kuzibelekela alimwi? 10 Mulabikkila maano kapati kukubamba mazuba, myezi, ziindi zibikkidwe alimwi amyaka. 11 Ndililibilikide akaambo kandinywe, kuti ambweni ndali kwiile kulisowela ciindi kulitakata kumubelekela.
12 Bakwesu, ndimulomba ku-ti, Amube mbuli ndime, nka-ambo andime ndakali mbubonya mbomubede nywebo. Kunyina cibi ncomwakandicitila pe. 13 Pele mulizyi kuti kuciswa nkondakaciswa nkokwakandipa coolwe cakuti ndaambilizye makani mabotu kulindinywe ciindi cakusaanguna. 14 Alimwi nokuba kuti bulwazi mbondakajisi bwakamubeda musunko, tiimwakasululwa andime naa kuswida mate akaambo kakusesemwa pe; pele mwakanditambula mbuli mungelo wa Leza, mbuli Kilisito Jesu. 15 Aboobo, ino lino kuli kuli kukondwa ookuya nkomwakajisi? Nkaambo ndimucitila bumboni bwakuti, nocali kukonzyeka, nomwakagusya meso aanu akundipa ngawo. 16 Lino sena ndaba sinkondonyoko nkaambo ndamwaambila zyamasimpe? 17 Balayandisisya kuti mubatobele, ikutali amakanze mabotu, pele bayanda kumwaandaanya kulindime, kutegwa mubatobele caluyandisisyo. 18 Pele lyoonse ncibotu ikuti muntu umwi kamuyanda kapati amakanze mabotu, alimwi ikutali buyo leelyo nondili andinywe, 19 nywebo notwana twangu, ooto ntondimyongelwa alimwi mbuli bumyongwa mukaintu uuyanda kutumbuka, mane kusikila Kilisito abumbwe mulindinywe. 20 Nicabota ikuti nindali andinywe lino aawa nkaambo ambweni nindaambaula ajwi liindene, nkaambo mwandimana maano.
21 Amundaambile, nywebo nomuyanda kweendelezyegwa amulawo, Sena mulacimvwisya ncowaamba Mulawo ooyo? 22 Mucikozyanyo, kulembedwe kuti Abulahamu wakali abana basankwa bobilo, omwe kumusimbi mubelesi alimwi umbi kumukaintu waangulukide; 23 pele ooyo wakazyalwa kumusimbi mubelesi wakazyalwa mbobazyalwa bantu boonse, kakuli ooyo umbi wakazyalwa kumukaintu waangulukide wakazyalwa kweelana acisyomezyo. 24 Zyintu eezyi izyakacitika kuli ncoziiminina; nkaambo bamakaintu bobilo aaba baiminina zizuminano zyobilo, comwe nciceeco cakazuminanwa a Cilundu ca Sinai, icizyala bana babuzike, calo cili ngu Haga. 25 Lino Haga wiiminina Sinai, icilundu cili mucisi ca Alabiya, alimwi ulikozyenye a Jelusalemu wasunu, mbwaanga uli mubuzike antoomwe abana bakwe. 26 Pele Jelusalemu wakujulu ulaangulukide, alimwi mbabamaama.
27 Nkaambo kulilembedwe kuti: “Kosekelela, yebo omukaintu uutazyali; lizya nguluulu akoongolola, yebo omukaintu uutamyongwi; nkaambo bana bamukaintu wakasiigwa amulumi mbanji kwiinda bayooyo ujisi mulumi.” 28 Lino swebo, bakwesu, tuli bana bacisyomezyo mbubonya mbwaakabede Izaka. 29 Pele mbubonya ooyo wakazyalwa mbobazyalwa bantu boonse mbwaakatalika kupenzya yooyo wakazyalwa kwiinda mumuuya, mbocibede oobo asunu. 30 Nokuba boobo, ino Lugwalo lwaamba nzi? “Mutande musimbi mubelesi amwanaakwe, nkaambo mwana wamusimbi mubelesi takabi sikukonanyina amwana wamukaintu waangulukide pe.” 31 Aboobo, bakwesu, swebo tatuli bana bamusimbi mubelesi pe, pele tuli bana bamukaintu waangulukide.