Bagalatiya
5 Kilisito wakatwaangulwida kuti tube alwaanguluko oolu. Aboobo amwiime nji, mutazumini kupopwa mujoko lyabuzike alimwi pe.
2 Amubone! Mebo, nde Paulo ndimwaambila kuti, ikuti naa mwapalulwa, Kilisito tacinooli ampindu kulindinywe pe. 3 Kunze lyaboobo, alimwi ndaambila muntu woonse uupalulwa kuti weelede kuutobela Mulawo woonse. 4 Mulaandaanizyidwe a Kilisito, kufwumbwa naa ndinywe bani nywebo nomusola kwaambwa kuti muli balulami kwiinda mukutobela mulawo; mwakawa kuluzyalo lwakwe. 5 Lino swebo kwiinda mumuuya tulabulindila cakuyandisisya bululami oobo mbotulangila akaambo kalusyomo. 6 Nkaambo kuli baabo bakamantene a Kilisito Jesu, ibupalule naa kutapalulwa zinyina mulimo uuli woonse, pele lusyomo ilubeleka antoomwe aluyando ndolujisi mulimo.
7 Mwakali kubalika kabotu. Ino nguni wakamulesya kuzumanana kuswiilila kasimpe? 8 Kukombelezya kwamusyobo ooyu takuzwi kuli Yooyo uumwiita. 9 Bumena busyoonto bupa kuti mulwi woonse wafulaulu uukandidwe ufwufwumuke. 10 Ndisyoma kuti nywebo nomukamantene a Mwami tamukayeeyi ziimpene andime pe; pele ooyo uumupenzya kufwumbwa na nguni, uyoosikilwa lubeta lumweelede. 11 Lino mebo bakwesu, ikuti naa ndicikambauka bupalule, ino nkaambo nzi ncondicipenzyegwa? Nkokuti cagusyigwa cilebyo cijatikizya kukambauka cisamu cakupenzyezya. 12 Inga ndalombozya kuti baalumi aabo ibasola kumunyonganya balizibe beni.
13 Mwakaitwa kulwaanguluko bakwesu; pele mutabelesyi lwaanguluko oolu kuba coolwe cakuzuzikizya zisusi zyamubili, pele kwiinda muluyando amubelekelane mbuli bazike. 14 Nkaambo Mulawo woonse ulazuzikizyigwa mumulawo omwe wakuti: “Weelede kuyanda simukobonyoko mbubonya mbuli mboliyanda omwini.” 15 Pele ikuti naa kamuzumanana kulumana akulyana, amucenjele kuti mutanyonyoonani pe.
16 Pele ndaamba kuti, Amuzumanane kweenda amuuya eelyo kunyina nomuyoocita zisusi zyanyama naaceya. 17 Lino mubili ulakazyanya amuuya kujatikizya nzyoulombozya, alimwi awalo muuya ulakazyanya amubili; eezyi tazyeendelani pe, cakuti tamuziciti zyintu eezyo nzyomuyanda kuti mucite. 18 Kunze lyaboobo, ikuti naa musololelwa amuuya, nkokuti tamweendelezyegwi amulawo pe.
19 Lino milimo yamubili ili antangalala, njeeyi: bwaamu, busofwaazi, bukkale busesemya, 20 kukomba mituni, kusyoma mizimo, businkondo, kuzwangana, bbivwe, kunyema, kukazyanya, kwaandaana, tukamu twabukombi tuzandukide, 21 munyono, bukolwi, mapobwe aateendelezyegwi, alimwi azyintu zimbi zili boobu. Ndimucenjezyela limwi kujatikizya zyintu eezyi, mbubonya mbondakamucenjezya kale, kuti bantu bacita zyintu zili boobu tabakabukoni Bwami bwa Leza pe.
22 Pele mucelo wamuuya ngooyu: luyando, lukkomano, luumuno, kukkazyika moyo, luzyalo, bubotu, lusyomo, 23 kubomba moyo, kulilesya. Kunyina mulawo uukasya zyintu eezyi pe. 24 Kunze lyaboobo, aabo babalilwa kuli Kilisito Jesu mubili bakaugagaila acisamu antoomwe akunyomenena kwawo alimwi azisusi zyawo.
25 Ikuti katupona kweelana amuuya, atuzumanane alimwi kweenda kabotu amuuya ooyo. 26 Tutalisumpuli pe, tutabusyi mizundano akati kesu, alimwi tutafwidilani munyono.