Ciyubunuzyo

2 “Kumungelo wambungano iili mu Efeso, lemba kuti: Eezyi nzyezyintu nzyaamba ooyo uujisi nyenyeezi zili ciloba mujanza lyakwe lyalulyo, ooyo weendeenda akati kazibikkilo zyamalambe zyangolida izili ciloba, 2 ‘Ndiliizyi milimo yako, ambobeleka canguzu alimwi akuliyumya kwako, alimwi akuti tokonzyi kubaleka buyo bantu babi, akuti ulabasunka aabo balyaamba kuti mbatumwa kakuli tabali boobo pe, alimwi wakajana kuti mbabeji. 3 Kunze lyaboobo, ulaliyumya alimwi wakakatila muzyintu zinji akaambo kazyina lyangu alimwi tiiwakatala pe. 4 Nokuba boobo, kuli kaambo nkondijisi kulinduwe kakuti, waleka kutondezya luyando ndowakajisi kumatalikilo.

5 “‘Aboobo koyeeya aawo mpowabede kotanawa, weempwe akucita milimo njowakali kucita kumatalikilo. Ikuti utaciti oobo, ndilaboola kulinduwe, eelyo ndiyoogusya cibikkilo calambe cako aabusena bwaco, ccita kuti weempwe. 6 Nokuba boobo, kuli cintu cimwi ncocita kabotu, cakuti ulaisulaika micito yakakamu ka Nikolayi, eeyo njondisulaika andime. 7 Ooyo uujisi matwi aamvwe ncowaamba muuya kumbungano: Ooyo uuzunda ndiyoomuzumizya kulya micelo yacisamu cabuumi, icili mupaladaiso ya Leza.’

8 “Lino kumungelo wambungano iili mu Simuna, lemba kuti: Eezyi nzyezyintu nzyaamba, ‘ooyo Mutaanzi alimwi Musyaalizi,’ iwakafwa akuba muumi alimwi, 9 ‘Ndilaazyi mapenzi aako abucete bwako—nokuba boobo ulivwubide—alimwi amasampu ngobaamba aabo balyaamba kuti mba Juda, pele mubwini tabali boobo pe, pele ncikombelo ca Saatani. 10 Utayoowi zyintu eezyo nzyolangilwa kupenga lino aawa. Amubone! Diabolosi ulazumanana kuwaala bamwi banu muntolongo kutegwa musunkwe cakumaninina, akuti mube amapenzi kwamazuba aali kkumi. Tondezya kuti ulasyomeka mane kusikila kulufwu, eelyo ndiyookupa musini wabuumi. 11 Ooyo uujisi matwi aamvwe ncowaamba muuya kumbungano: Ooyo uuzunda kunyina pe nayoonyonyoonwa alufwu lwabili.’

12 “Kumungelo wambungano iili mu Pegamo, lemba kuti: Eezyi nzyezyintu nzyaamba ooyo uujisi panga damfwu libosya, ilikwengedwe koonse-koonse, 13 ‘Ndilikuzyi nkokkala, nkonkuko ikuli cuuno cabwami ca Saatani; nokuba boobo ulazumanana kukakatila kuzyina lyangu, alimwi kunyina nookakaka kuti uli alusyomo mulindime nokuba kumazuba aa Antipa, kamboni wangu uusyomeka, iwakajaigwa kumbali lyanu, ooko nkwakkede Saatani.

14 “‘Nokuba boobo, kuli twaambo tumwi ntondijisi kulinduwe twakuti, ooko nkobede ujisi baabo bakakatila kunjiisyo ya Balamu, ooyo wakayiisya Balaki kubikka cilebyo kumbele lyabana ba Isilayeli, kuti balye zyintu zipaizyigwa kumituni alimwi akucita bwaamu. 15 Mbubonya buyo, anduwe ujisi baabo bakakatila kunjiisyo yakakamu ka Nikolayi. 16 Aboobo empwa. Ikuti utaciti oobo, ndilaboola kulinduwe cakufwambaana, eelyo ndiyoobalwana apanga damfwu lyakumulomo wangu.

17 “‘Ooyo uujisi matwi aamvwe ncowaamba muuya kumbungano: Ooyo uuzunda ndiyoomupa mana amwi aasisidwe, alimwi ndiyoomupa kabwe katuba kabulungene, mpoonya akabwe aako kulembedwe zyina lipya litazyibidwe amuntu uuli woonse ccita buyo ooyo uukatambula.’

18 “Lino kumungelo wambungano iili mu Tiyatila, lemba kuti: Eezyi nzyezyintu nzyaamba Mwana wa Leza, ooyo uuli ameso aali mbuli mulilo uuvwilima, alimwi uuli amaulu aali mbuli mukuba mubotu, 19 ‘Ndiliizyi milimo yako, luyando lwako, lusyomo lwako, mulimo wako alimwi akuliyumya kwako, akuti milimo njocita lino ilayiinda eeyo yakusaanguna.

20 “‘Nokuba boobo, kuli kaambo nkondijisi kulinduwe, kakuti ulimulekelede mukaintu ooyo Jezebeli, uulyaamba kuti musinsimi mukaintu, alimwi ulayiisya akweena bazike bangu kuti bacite bwaamu akulya zyintu zipaizyigwa kumituni. 21 Alimwi ndakamupa ciindi cakweempwa, pele tayandi pe kweempwa kubwaamu bwakwe. 22 Bona! Ndilaafwaafwi kumusowela abulo kafwumba bulamfwu, alimwi aabo bacita bumambe anguwe ndilabasowela mumapenzi mapati, ccita kuti beempwe kumicito yakwe. 23 Alimwi bana bakwe ndiyoobajaya acilwazi cijaya, eelyo mbungano zyoonse ziyoozyiba kuti mebo ndendime yooyo uulanga-langa mizeezo* amyoyo, alimwi umwi aumwi wanu ndiyoomupa kweelana amilimo yakwe.

24 “‘Nokuba boobo, ndaambila nyoonse nobamwi nomuli mu Tiyatila, aabo boonse batatobeli njiisyo eeyi, aabo batakazizyiba eezyo nzyobaamba kuti “zyintu zisisidwe,” zizwa kuli Saatani ikuti: Tandikoomutwikka mukuli umbi uuli woonse uuminya. 25 Pele nywebo amujatisye buyo ceeco ncomujisi mane ndikaboole. 26 Alimwi ooyo uuzunda akucita milimo yangu mane kusikila kumamanino, ndiyoomupa nguzu zyakweendelezya masi, 27 alimwi bantu uyoobeembela ankoli yabutale cakuti bayoopwayaulwa mbuli mbozipwayaulwa zibelesyo zyabulongo, mbubonya andime mbondatambula kuzwa kuli Taata. 28 Alimwi ndiyoomupa ntanda. 29 Ooyo uujisi matwi aamvwe ncowaamba muuya kumbungano.’