Ciyubunuzyo
3 “Kumungelo wambungano iili mu Sade, lemba kuti: Eezyi nzyezyintu nzyaamba ooyo uujisi myuuya ya Leza iili ciloba alimwi anyenyeezi zili ciloba, ‘Ndiliizyi milimo yako, ikuti ujisi zyina* lyakuti uli muumi, pele ulifwide. 2 Pakamana, alimwi yumya-yumya zyintu zisyeede izyali afwaafwi kufwa, nkaambo ndajana kuti milimo yako tiiyacitwa cakumaninina kumbele lya Leza wangu. 3 Aboobo, kozumanana kuyeeya ncowakatambula ancowakamvwa, eelyo kozumanana kucibamba alimwi empwa. Masimpe ccita kuti usinsimuke, ndilaboola mbuli mubbi alimwi tokoozyiba abuniini ciindi nconditiisike kulinduwe.
4 “‘Nokuba boobo, yebo ujisi bantu* basyoonto mu Sade ibatakasofwaazya zisani zyabo zyaatala, alimwi aaba bayooenda andime muzisani zituba, nkaambo baleelela. 5 Aboobo, ooyo uuzunda uyoosamikwa zisani zyaatala zituba; alimwi kunyina pe nondiyoolimwaya zyina lyakwe mubbuku lyabuumi, pele ndiyoozumina kuti ndililizyi zyina lyakwe kumbele lya Taata akumbele lyabangelo bakwe. 6 Ooyo uujisi matwi aamvwe ncowaamba muuya kumbungano.’
7 “Kumungelo wambungano iili mu Filadelufiya, lemba kuti: Eezyi nzyezyintu nzyaamba ooyo uusalala, wamasimpe, uujisi kkii ya Davida, ooyo uunga ajalula kunyina uunga wajala, alimwi ajala kunyina uunga wajalula, 8 ‘Ndiliizyi milimo yako—bona, ndakubikkila mulyango uujalukide kumbele lyako, ooyo uutakonzyi kujalwa amuntu umbi. Alimwi ndilizyi kuti ujisi nguzu ziniini, akuti wakalibamba jwi lyangu alimwi tiiwakaleka pe kusyomeka kuzyina lyangu. 9 Bona! Ndilapa kuti aabo bazwa kucikombelo ca Saatani ibalyaamba kuti mba Juda, kakuli tabali boobo pe, pele balabeja—bona, ndilabapa kuti baboole akufwugama kumaulu aako akubapa kuzyiba kuti ndilakuyanda. 10 Akaambo kakuti wakalitobela jwi lyaamba zyakuliyumya kwangu, andime ndiyookubamba muciindi camasunko, iciyoosikila muntu woonse anyika, ikusunka baabo bakkala anyika. 11 Ndilaboola cakufwambaana. Kozumanana kujatisya eeco ncojisi, ikutegwa kutabi muntu uukunyanga musini wako.
12 “‘Ooyo uuzunda—njoomupa kuba musemu mutempele lya Leza wangu, alimwi kunyina limbi nayoozwa mulindilyo, alimwi ndiyoolemba alinguwe izyina lya Leza wangu alimwi azyina lyamunzi wa Leza wangu, nkokuti Jelusalemu mupya ooyo uuseluka kuzwa kujulu kuli Leza wangu, alimwi azyina lyangu eelyo lipya. 13 Ooyo uujisi matwi aamvwe ncowaamba muuya kumbungano.’
14 “Kumungelo wambungano iili mu Laodikeya, lemba kuti: Eezyi nzyezyintu nzyaamba Ameni, kamboni uusyomeka alimwi wamasimpe, imatalikilo aazilenge zya Leza, 15 ‘Ndiliizyi milimo yako, kuti totontoli alimwi topyi pe. Nocali cibotu ikuti nowali kutontola naa kupya. 16 Aboobo, akaambo kakuti ukasaala buyo alimwi topyi naa kutontola, ndilakuswida kuzwa mukanwa lyangu. 17 Nkaambo waamba kuti: “Ndilivwubide alimwi ndalijanina lubono lunji alimwi kunyina cintu ncondibulide,” pele tozyi kuti ulipengede, uleetezya, uli mucete, uli moofwu alimwi uli amantanda, 18 ndikulailila kuti uule kulindime ngolida yakasalazyigwa amulilo ikutegwa uvwube, alimwi azisani zyaatala zituba ikutegwa usame akuti utausi nsoni mantanda aako aabonwa abamwi, alimwi uule amusamu wamumeso wakulambika mumeso aako ikutegwa ubone.
19 “‘Aabo boonse mbondiyanda ndilabasinsa akubalaya. Aboobo sungwaala akweempwa. 20 Bona! Ndiliimvwi amulyango alimwi ndilakonkomona. Ikuti umwi wamvwa jwi lyangu akujalula mulyango, ndilanjila muŋanda yakwe alimwi walo andime tulalida antoomwe cilalilo. 21 Ooyo uuzunda ndiyoomuzumizya kukkala andime acuuno cangu cabwami, mbubonya andime mbondakazunda akukkala a Taata acuuno cakwe cabwami. 22 Ooyo uujisi matwi aamvwe ncowaamba muuya kumbungano.’”