2 Makani
31 Lino mbozyakamanina buyo zintu zyoonse eezyi, bana Israyeli boonse ibakajanika ooko bakaunka kuminzi ya Juda, eelyo bakapwayaula misemu yamabwe yakukomba+ akugonkaula misemu yazisamu yakukomba*+ akumwaya masena aakukombela+ alimwi azipaililo+ mu Juda amu Benjamini moonse, kubikkilizya a Efraimu a Manase+ kusikila zyoonse bazimanizya kuzinyonyoona, kuzwa waawo bana Israyeli boonse bakapiluka kuminzi yabo, umwi aumwi kulukono lwakwe.
2 Mpoonya Hezekiya wakasala bapaizi aba Levi munkamu zyabo,+ imwi aimwi kweelana amulimo wanjiyo wabupaizi awaba Levi+ kujatikizya zituuzyo zyuumpwa, zipaizyo zyalumvwano, kubelekela Leza akumulumba alimwi akumutembaula mumilyango yamabuwa aa* Jehova.+ 3 Caabilo cimwi kuzwa kuzintu zyamwami cakali kubikkilizyigwa kuzituuzyo zyuumpwa,+ nkokuti zituuzyo zyamafwumofwumo azyakumangolezya,+ alimwi azituuzyo zyuumpwa muma Sabata,+ ciindi noukkala mwezi+ amuziindi zyamapobwe+ kweelana ambokulembedwe mu Mulawo wa Jehova.
4 Kuyungizya waawo, wakalailila bantu ibakali kukkala mu Jerusalemu kuti bape caabilo icakeelede kupegwa bapaizi aba Levi+ kutegwa bautobele cakulomya* mulawo wa Jehova. 5 Lino mbwaakapedwa buyo malailile, bana Israyeli bakapa micelo mitaanzi minji yamaila, waini mupya, mafwuta,+ buci alimwi azilimwa zyoonse;+ bakaleta zipaanzi zyakkumi zinji zyazintu zyoonse.+ 6 Alimwi bana Israyeli aba Juda ibakali kukkala muminzi ya Juda, abalo bakaleta zipaanzi zyakkumi zyaŋombe, mbelele azipaanzi zyakkumi zyazintu zisalala+ eezyo izyakaabwa kuli Jehova Leza wabo. Aboobo bakazileta akuzilundika mumilwi. 7 Mumwezi watatu+ bakatalika kulundika zyakusanga zyabo mumilwi; eelyo mumwezi waciloba+ bakamanizya. 8 Lino Hezekiya abasilutwe nobakaboola akubona milwi, bakatembaula Jehova akulongezya bantu bakwe bana Israyeli.
9 Lino Hezekiya naakabuzya bapaizi aba Levi kujatikizya milwi eeyo, 10 Azariya silutwe wabapaizi wamuŋanda ya Zadoki wakati kulinguwe: “Kuzwa ciindi bantu nobakatalika kuleta zyakusanga muŋanda ya Jehova,+ bantu bali kulya akukkuta alimwi kucili zinji zicisyeede, nkaambo Jehova wabalongezya bantu bakwe, nkakaambo kaako zintu eezyi zinji boobu ncozyasyaala.”+
11 Kumane Hezekiya wakabaambila kuti babambe ziyobwedo*+ muŋanda ya Jehova, aboobo bakazibamba. 12 Cakusyomeka bakazumanana kuleta zyakusanga, zipaanzi zyakkumi+ azintu zisalala; Konaniya mu Levi wakabikkwa kuti kalanganya zintu zyoonse eezyi kali silutwe wabo, eelyo Simeyi mwanookwabo wakali wabili kulinguwe. 13 Mpoonya Jehieli, Azaziya, Nahati, Asaheli, Jerimoti, Jozabadi, Elieli, Isimakiya, Mahati a Benaya bakali basikugwasyilizya Konaniya a Simeyi mwanookwabo, kweelana ambwaakalailila Mwami Hezekiya, eelyo Azariya wakali silutwe muŋanda ya Leza mwini-mwini. 14 Kore mwana wa Yimuna muna Levi mulindizi wamulyango wakujwe,+ wakali kulanganya zyakusanga zyakuliyandila+ zya Leza mwini-mwini, alimwi wakaapaula zyakusanga zya Jehova+ azintu zisalalisya.+ 15 Aabo mbaakali kweendelezya bakali ba Edeni, Minjamini, Jeshua, Semaya, Amariya a Sekaniya, muminzi yabapaizi+ ibakapedwe mulimo akaambo kakusyomeka kwabo kuti kabaabila kubanabokwabo cakweelanya munkamu zyabo,+ baniini abapati. 16 Ooku kwakali kuyungizya atala lyakwaabila ikwakacitwa kubasankwa ibakali amyaka yotatwe kuya mujulu ibakalembedwe mumulongo wamazyalani, aabo ibakali kuboola abuzuba kuŋanda ya Jehova akubeleka milimo munkamu zyabo.
17 Mulongo wamazyalani aabapaizi wakalembwa kweelana aziinga zyabamausyi+ mbubonya mbuli waba Levi ibakali amyaka iili 20 kuya mujulu,+ kweelana amilimo yabo munkamu zyabo.+ 18 Imulongo wamazyalani wakali kubikkilizya abana babo boonse basankwa abasimbi, bamakaintu babo, mbungano yabo yoonse—nkaambo bakalisalazya kuti babeleke milimo yabo iisalala njobakapegwa akaambo kakusyomeka kwabo— 19 kubikkilizya abalunyungu lwa Aroni, bapaizi ibakali kukkala mumacelelo aakazingulukide minzi yabo.+ Muminzi yoonse, mwakali baalumi ibakasalidwe kweelana amazina aabo kuti kabapa zyaabilo kumwaalumi uuli woonse akati kabapaizi alimwi akuba Levi boonse balembedwe mumulongo wamazyalani.
20 Hezekiya wakacita oobu mu Juda moonse, wakazumanana kucita zintu zibotu, ziluleme alimwi wakali kusyomeka kubusyu bwa Jehova Leza wakwe. 21 Alimwi milimo yoonse njaakacita mukuyandaula Leza wakwe kufwumbwa naa ijatikizya milimo yamuŋanda ya Leza mwini-mwini+ naa ijatikizya Mulawo amilazyo, wakaicita camoyo woonse alimwi wakazwidilila.