2 Makani
4 Mpoonya wakapanga cipaililo camukuba+ cilampa tukokola tuli 20, atukokola tuli 20 mubwamba alimwi atukokola tuli 10 kuya mujulu.
2 Wakapanga Zyiba*+ lyamukuba. Lyakalibulungene, bwaasa bwalyo bwakali tukokola tuli 10, lyakali kulampa tukokola tosanwe kuya mujulu alimwi ntambo iilampa tukokola tuli 30 njiyakali kukonzya kuzinguluka mulomo walyo.+ 3 Alimwi kwakali zifwanikiso zyatunkuli+ kuzinguluka Zyiba lyoonse molili munsingo, tunkuli tuli 10 mukakokola komwe. Zifwanikiso zyakusakatizya zyatunkuli zyakali mumilongo yobilo alimwi zyakafwulilizyigwa kulindilyo. 4 Lyakakkede atala lyabapoho bali 12,+ botatwe kabalangide kunyika, botatwe kabalangide kumbo, botatwe kabalangide kumusanza alimwi botatwe kabalangide kujwe; kumane Zyiba eelyo lyakali atala lyabo alimwi zikungu zyabo zyoonse zyakalifwutatilene. 5 Alimwi intuli yalyo yakali mbuli bwamba bwajanza;* mulomo walyo wakapangidwe mbuli wankapu, mbuli duba lyampana. Zyiba eeli lyakali kuzula nongo* zyamaanzi zili 3,000.
6 Kuyungizya waawo, wakapanga zyakusambila zili 10, wakabikka zili musanu kululyo azili musanu kulumwensyi+ kuti kabasanzyila mumo. Zintu zyoonse zijatikizya zituuzyo zyuumpwa bakali kuzisanzizya mumo.+ Pele Zyiba lyakali lyabapaizi kuti kabasambila mumo.+
7 Kumane wakapanga zibikkilo zyamalambe zyangolida zili 10 + zikozyenye kweelana amalailile+ alimwi wakazibikka mutempele, zyosanwe kululyo, zyosanwe kulumwensyi.+
8 Alimwi wakapanga matebulu aali 10 akwaabikka mutempele, osanwe kululyo eelyo osanwe kulumwensyi;+ kumane wakapanga mitiba yanindi yangolida iili 100.
9 Mpoonya wakapanga lubuwa+ lwabapaizi,+ lubuwa lwamukati lupati+ alimwi azijazyo zyandulo, eelyo zijazyo eezyo wakazizilulula amukuba. 10 Zyiba wakalibikka kululyo lwaŋanda, kumusanza lwaajwe.+
11 Hiramu wakapanga zibbakete, mafosyolo amitiba.+
Aboobo Hiramu wakamanizya mulimo ngwaakacitila Mwami Solomoni kujatikizya ŋanda ya Leza mwini-mwini.+ Nzyeezyi zintu nzyaakapanga: 12 misemu yobilo+ ampumpu izyakali mbuli mitiba yanindi izyakabikkwa atala aamisemu eeyo; tunsabwe tobilo tupatangene twakusakatizya+ mpumpu zyobilo izyakali atala aamisemu; 13 mapomegranite aali 400 + aakubikka kutunsabwe tobilo, milongo yobilo yamapomegranite kukansabwe kamwi akamwi aakusakatizya mpumpu zyobilo izili mbuli mitiba iivwungumene izyakali atala aamisemu;+ 14 tuŋola* tuli 10 azyakusambila zili 10 atala aatuŋola;+ 15 Zyiba abapoho bali 12 ibakali kunsi lyandilyo;+ 16 zibbakete, mafosyolo amfwoloko,+ alimwi azibelesyo zyabo zyoonse izyamukuba uusalazyidwe eezyo Hiramu-abivi+ nzyaakapangila Mwami Solomoni izya ŋanda ya Jehova. 17 Mwami wakazipangila mucooko ca Jordano akati ka Sukoti+ a Zereda. Wakazipangila mucikombole caansi. 18 Solomoni wakapanga zintu zyoonse eezyi kazili zinji kapati; tiikwakazyibwa mbowakali kulema mukuba.+
19 Solomoni wakapanga zibelesyo zyoonse+ zyakuŋanda ya Leza mwini-mwini: cipaililo cangolida;+ matebulu+ aakali kubikkwa zinkwa zyacitondezyo;+ 20 zibikkilo zyamalambe amalambe aazyo aangolida iisalalisya+ aakali kuyaka kamutananjila mu Busena Busalalisya kweelana ambokwakali kuyandika; 21 maluba-luba aangolida iisalalisya, malambe aangolida iisalalisya, lumano lwangolida iisalalisya; 22 tugele twakuzimya malambe twangolida iisalalisya, mitiba yangolida iisalalisya, nkapu zyangolida iisalalisya, twakunyamwida mulilo twangolida iisalalisya; milyango yaŋanda, zijazyo zyayo zyamukati zyamu Busena Busalalisya+ alimwi azijazyo zyatempele, zyakali zyangolida.+