Jobu
3 Sena inga wakukombelezya ziindi zinji,
Naa sena inga waambaula anduwe cakulibombya?
4 Sena inga wapangana cizuminano anduwe,
Kutegwa umupe kuba muzike wako lyoonse?
5 Sena inga wamusobanya mbuli mbosobanya kayuni
Naa sena inga wamwaangilila kutegwa bana bako basimbi bamusobanye?
6 Sena basikusambala inga bamucincanya acintu cimwi?
Sena inga bamwaabanya kuli basimakwebo?
7 Sena ulakonzya kumuyasaula amubili atusumo+
Naa kuyasaula mutwe wakwe amyuumba yakujaisya nswi?
8 Kobikka janza lyako alinguwe,
Tokailubi nkondo eeyo alimwi tokaciinduluki pe!
9 Kufwumbwa bulangizi mbojisi bwakumuzunda mbwabuyo.
Kumubona buyo kulakonzya kukuzilusya.*
10 Kunyina uuli acamba cakumusoka.
Aboobo ino nguni uunga waimikizyanya andime?+
11 Ino nguni wasaanguna kundipa cintu kutegwa ndimulumbule?+
Zintu zyoonse zilaansi aajulu nzizyangu.+
12 Tandikokuumuna buyo pe kujatikizya maulu aakwe,
Akujatikizya nguzu zyakwe alimwi amubili wakwe uubambidwe kabotu.
13 Ino nguni uukonzya kumufwunda?
Ino nguni uukonzya kunjila mukanwa lyakwe?
14 Ino nguni uukonzya kujalula milyango yamulomo* wakwe?
Meno aakwe oonse aali mukanwa alayoosya.
15 Musana wakwe ujisi milongo yamaamba*
Aajatene akusisinkana kapati.
16 Igamba limwi alimwi lilijatene kapati alyeenzinyina
Cakuti muya taukonzyi kwiinda akati kangawo.
17 Igamba limwi alimwi lilinamatide kulyeenzinyina;
Alijatene alimwi taakonzyi kwaandaanizyigwa pe.
18 Naesyemuka, mumuni ulamweka,
Alimwi meso aakwe ali mbuli mitungazuba yakubucedo.
19 Kumulomo wakwe kuzwa ndabo;
Nsasi zyamulilo zilapasauka.
20 Mumpemo zyakwe muzwa busi,
Mbuli bbibi lyamulilo ilyayasyigwa abwizu.
21 Muya wakwe upa kuti makala aamulilo ayakisye,
Alimwi mukanwa lyakwe muzwa mulilo uuvwilima.
22 Nsingo yakwe ijisi nguzu zinji kapati,
Alimwi boonse balatija kabayoowede kumbele lyakwe.
23 Cikanda caabula bwakwe nciyumu;
Nciyumu nta, mbuli lubulo lwakeengwa alimwi tacikonzyi kunyanyaasyigwa.
24 Moyo wakwe muyumu nta mbuli bbwe,
Inzya, muyumu mbuli ziyo lyaansi.
25 Avwundumuka, nibaba basinguzu balayoowa;
Napazaya bantu balaankamana.
26 Kunyina panga limusikila likonzya kumuzunda;
Noliba sumo, muumba naa muvwi.+
27 Butale ububona mbuli kuti nkasanga buyo,
Mukuba uubona mbuli kuti ncikuni cibolede.
28 Muvwi tuumupi kutija pe;
Mabwe aamunkwisyo kulinguwe ali buyo mbuli cikuba.
29 Inkoli wiibona mbuli kuti ncikuba buyo,
Alimwi nsongole iipikima ulaiseka.
30 Bula bwakwe buli mbuli nkaye zibosya;
Ulasiya mukondo muntimba mbuli cilayi+ cakuumya maila.
31 Ulapa kuti maanzi manji abile mbuli cibiya;
Ulapa kuti lwizi lukwase mbuli mpoto yamafwuta.
32 Mwaainda ulasiya mukondo uumweka;
Umwi inga wabona mbuli kuti maanzi malamfwu aatuba mbuli mvwi.
33 Munyika kunyina uuli mbuli nguwe,
Ncilenge cakalengwa kuti kacitayoowi.
34 Ulazilanga cabukali zintu zyoonse zilisumpula.
Ngomwami wabanyama bamusyokwe boonse basinguzu.”