Isaya

20 Mumwaka Mwami Sarigoni waku Asuri naakatuma Taritani* ku Asidodi,+ wakalwana munzi wa Asidodi akuuzunda.+ 2 Aciindi eeco Jehova wakaambaula kwiinda muli Isaya+ mwana wa Amozi, kuti: “Koya, ukasamunune cisani camasaka cili mutusolo twako alimwi ampato zyako zili kumaulu aako.” Aboobo wakacita mbubonya oobo, keenda amantanda* azimpata.

3 Mpoonya Jehova wakaamba kuti: “Mbubonya mubelesi wangu Isaya mbwaali kweenda amantanda azimpata kwamyaka yotatwe kali citondezyo+ acintu cigambya cakucenjezya bana Egepita+ abana Etiopiya,+ 4 awalo mwami wa Asuri mbwayootola nkamu yabaange baku Egepita+ abazike baku Etiopiya, balombe abamadaala, kabeenda amantanda azimpata, matako kaalibonya, inzya mantanda aa Egepita aajazya nsoni. 5 Aboobo bayooyoowa akufwa nsoni akaambo ka Etiopiya ngobasyoma alimwi akaambo ka Egepita ooyo ngobalidundila.* 6 Mubuzuba oobo bantu bakkala mucilawo eeci cakunkomwe yalwizi bayakwaamba kuti, ‘Ma! Amubone mbwaaba ooyo ngotwakali kusyoma, ooyo ngotwakali kulundukila kuti atugwasye akutuvwuna kumwami wa Asuri! Aboobo ino tulatija buti lino?’”