Isaya
3 Nkaambo amubone! Mwami mwini-mwini, Jehova wamakamu,
Ulagwisya zintu zyoonse nzyobasyoma ampobaponena bantu mu Jerusalemu alimwi amu Juda,
Nkokuti zyakulya zyoonse amaanzi oonse,+
2 Muntu singuzu asikalumamba,
Mubetesi amusinsimi,+ musondi amudaala,
3 Silutwe wabantu bali 50,+ muntu uulemekwa, asikulaya,
Syaazibwene mumasalamuzi alimwi amuntu uucibwene kuungula.+
4 Ndiyoocita kuti balombe babe basilutwe babo,
Alimwi bayakweendelezyegwa abantu batakkalikene.*
Mulombe uyakuuma mudaala,
Alimwi muntu-muntu buyo uyoonyansya muntu uulemekwa.+
6 Umwi aumwi uyoojata munyina muŋanda yabausyi akumwaambila kuti:
“Yebo ulijisi jansi, koba mweendelezi wesu,
Citantaala eeci ceelede kuba mumaanza aako.”
7 Pele mubuzuba oobo walo uyookaka cakaanzambwene kuti:
“Tandikooba musilisi wazilonda zyanu pe;
Tandijisi zyakulya naa zisani muŋanda yangu.
Mutandibikki kuba mweendelezi wabantu aaba.”
8 Nkaambo Jerusalemu wakolomoka,
Alimwi Juda wawa,
Akaambo kakuti majwi aabo amicito yabo zilakazyanya a Jehova;
9 Masyu aabo apa bumboni bwakuti bali aamulandu,
Alimwi baambilizya cibi cabo mbuli Sodoma;+
Tabasoli kucisisa.
Maawe kulimbabo, nkaambo baliletela mapenzi!
10 Amwaambile balulami kuti ziyoobeendela kabotu zintu;
11 Maawe kumuntu mubi!
Mapenzi ayoomusikila,
Nkaambo nzyaacitila bamwi amaanza aakwe nzyayoocitilwa awalo!
12 Bantu bangu bajisi basikubabelesya basilunya,
Alimwi bamakaintu mbababeendelezya.
Nobantu bangu, aabo bamusololela bamupa kuleya,
Alimwi baziminganya nzila nzyomweendela.+
13 Jehova ulilibambilide kubapa mulandu bantu;
Waimikila kuti aambile misyobo yabantu cisubulo ncibatiipegwe.
14 Jehova ulabeteka bamadaala alimwi abasilutwe akati kabantu bakwe.
“Nywebo mwawuumpa muunda wamisaansa,
Alimwi zintu nzyomwakabbida bacete zili mumaanda aanu.+
15 Mwabaanzi ncomupwaya bantu bangu
Akuziya masyu aabantu bapengede muvwu?”+ mbwaamba Mwami Singuzuzyoonse, Jehova wamakamu.
16 Jehova waamba kuti: “Akaambo kakuti bana basimbi ba Ziyoni balalisumpula,
Baleenda kabanongomeka mitwe,*
Bayaabumeka kababilaula meso, balanankaila kweenda,
Kabacokola-cokola amaulu aabo,
17 Jehova uyoopa kuti mitwe yabana basimbi ba Ziyoni ibe azibbabbani,
Alimwi Jehova uyoovwumbula nkumo zyabo.+
18 Mubuzuba oobo Jehova uyoogwisya bweebesi bwamabbango aabo,
Misini atwakulisakatizya tumwi tubambidwe mbuli mwezi,+
19 Masikkiyo,* nkaya atulembo twakulivwumbya,
20 Zitambala atuwenje twakumaulu, tulembo twakusama kucamba,
Tubikkilo twamafwuta aanunkilila alimwi atukwama twamisamu,
21 Nweenwe aninga zyakumpemo,
22 Zikobela zyacipaale, zisani zyakulivwabika zilamfwu, majansi alimwi ampotomona,
23 Zimbonimboni zyakumaanza+ azisani zyamulembo muuba-uba,*
Zitambala alimwi amilembo yakulivwumbya kumutwe.