Jeremiya
34 Ndeeli jwi lyakamusikila Jeremiya kuzwa kuli Jehova, ciindi Mwami Nebukadinezara* wa Babuloni ampi yabasikalumamba bakwe boonse, amami oonse aamunyika, aayo ngaakali kulela, alimwi abantu boonse nobakali kulwana Jerusalemu alimwi aminzi yanguwo yoonse:+
2 “Mboobu mbwaamba Jehova Leza wa Israyeli, ‘Koya, ukaambaule a Mwami Zedekiya+ wa Juda, ukamwaambile kuti: “Mboobu mbwaamba Jehova, ‘Bona munzi ooyu ndilawaaba mumaanza aamwami wa Babuloni, eelyo walo ulawuumpa amulilo.+ 3 Alimwi yebo tokatiji pe mumaanza aakwe, nkaambo ncobeni uyoojatwa akwaabwa mumaanza aakwe.+ Yebo uyoolangana cantongolameso amwami wa Babuloni, alimwi walo uyakwaambaula anduwe mulomo mpande, alimwi yebo uyootolwa ku Babuloni.’+ 4 Nokuba boobo, komvwa jwi lya Jehova, O Mwami Zedekiya wa Juda, ‘Mboobu mbwaamba Jehova kujatikizya nduwe: “Yebo tokajaigwi apanga pe. 5 Uyoofwa muluumuno,+ alimwi bayookucitila cilengwa cakuumpa tununkilizyo mbubonya mbobakacitila bamauso, ibami bakaindi ibakali kulela yebo kotanaba, alimwi bayookulila kabati, ‘Maawe, simaleleesu!’ nkaambo ‘ndime ndaamba majwi aaya,’ mbwaamba Jehova.”’”’”
6 Mpoonya musinsimi Jeremiya wakaambila Mwami Zedekiya wa Juda majwi oonse aaya mu Jerusalemu, 7 ciindi mpi zyabasikalumamba bamwami wa Babuloni nozyakali kulwana Jerusalemu aminzi yoonse ya Juda yakasyeede,+ nkokuti munzi wa Lakisi+ amunzi wa Azeka;+ nkaambo eeyi njeminzi iikwabilidwe ilikke yakasyeede akati kaminzi ya Juda.
8 Ndeeli jwi lyakamusikila Jeremiya kuzwa kuli Jehova eelyo Mwami Zedekiya naakamana kupanga cizuminano abantu boonse bamu Jerusalemu kuti aambilizye lwaanguluko kulimbabo,+ 9 lwakuti umwi aumwi wabo aangunune bazike bakwe bana Hebrayo, basankwa abasimbi, kutegwa kutabi naba omwe uuzumanana kubelesya mu Judanyina kali muzike wakwe. 10 Aboobo basilutwe boonse alimwi abantu boonse bakamvwida. Bakanjila mucizuminano cakuti muntu woonse aangunune bazike bakwe basankwa abasimbi alimwi akutazumanana kubabelesya kabali bazike. Bakamvwida akubaleka kuti baunke. 11 Pele tiilyakalampa pe, bakapilusya bazike babo basankwa abasimbi aabo mbobakaangunude, akutalika kubabelesya alimwi kabali bazike. 12 Aboobo jwi lya Jehova lyakamusikila Jeremiya kuzwa kuli Jehova, kaliti:
13 “Mboobu mbwaamba Jehova Leza wa Israyeli, ‘Mebo ndakapangana cizuminano abamauso+ mubuzuba mbondakabagusya mucisi ca Egepita muŋanda yabuzike,+ ndakati: 14 “Kumamanino aamyaka iili ciloba, umwi aumwi wanu weelede kwaangununa mwanookwabo mu Hebrayo ooyo wakasambalwa kulinduwe alimwi iwakubelekela myaka iili cisambomwe; weelede kumwaangununa.”+ Pele bamauso tiibakaswiilila pe, nokuba kucenjeka matwi aabo kulindime. 15 Lino calino-lino* aawa nywebo mwakasanduka akucita cintu ciluzi mumeso aangu kwiinda mukwaambilizya lwaanguluko kubeenzinyoko, alimwi mwakapanga cizuminano kumbele lyangu muŋanda yiitwa azina lyangu. 16 Pele kabe buyo kaindi kaniini mwacinca maano, mwasampaula zina lyangu+ kwiinda mukupilusya bazike banu basankwa abasimbi, aabo mbomwakaangununa kweelana ancobakali kuyanda, alimwi mwatalika kubabelesya alimwi kabali bazike.’
17 “Aboobo mboobu mbwaamba Jehova: ‘Nywebo kunyina nomwandimvwida pe, tiimwaambilizya lwaanguluko umwi aumwi wanu kumwanookwabo akumweenzinyina.+ Aboobo lino ndilaambilizya lwaanguluko kulindinywe,’ mbwaamba Jehova, ‘muyoojaigwa apanga, cilwazi+ alimwi anzala alimwi ndiyoomupa kuba cintu cigambya kumami oonse aamunyika.+ 18 Alimwi nceeci iciyoobacitikila bantu aabo ibakatyola cizuminano cangu kwiinda mukutatobela majwi aacizuminano ncobakapanga kumbele lyangu nobakatenda moombe muzibeela zyobilo akwiinda akati kazibeela eezyo,+ 19 nkokuti, basilutwe ba Juda abasilutwe ba Jerusalemu, nkumekume zyamuŋanda yamwami, bapaizi alimwi abantu boonse bamucisi ibakainda akati kazibeela eezyo zyobilo zyamoombe: 20 ndiyoobaaba mumaanza aabasinkondonyina amumaanza aabaabo bayandaula buumi bwabo, eelyo mitunta yabo iyooba cakulya cabayuni bauluka mujulu acabanyama baanyika.+ 21 Awalo Mwami Zedekiya wa Juda antoomwe abasilutwe bakwe ndiyoobaaba mumaanza aabasinkondonyina, mumaanza aabaabo bayandaula buumi bwabo alimwi amumaanza aampi zyabasikalumamba bamwami wa Babuloni+ aabo ibacileka kumulwana nywebo.’+
22 “‘Amubone, ndiyoopa malailile,’ mbwaamba Jehova, ‘aboobo ndiyoobajola kumunzi ooyu, eelyo bayakuulwana, kuuzunda alimwi akuwuumpa amulilo;+ ayalo minzi ya Juda ndiyakwiipa kuba matongo aanyina muntu uukkala mumo.’”+