Babetesi

12 Lino baalumi bana Efraimu bakaitwa antoomwe, eelyo bakazabuka kuya ku Zafoni* akuyakwaambila Jefita kuti: “Ino nkaambo nzi ncootakatwiitila nookazabuka kuyoolwana bana Amoni?+ Tulakuumpila muŋanda yako.” 2 Pele Jefita wakati kulimbabo: “Mebo abantu bangu twakazwangana kapati abana Amoni. Ndakamwiita kuti mundigwasye, pele tiimwakandivwuna kumaanza aabo. 3 Nindakabona kuti tamukoondivwuna, ndakabikka buumi bwangu muntenda* akuunka kuyoolwana bana Amoni,+ mpoonya Jehova wakabaaba mumaanza aangu. Aboobo ino nkaambo nzi ncomwaboolela kuzoondilwana sunu?”

4 Mpoonya Jefita wakabunganya baalumi boonse bana Gileadi,+ kumane bakalwana bana Efraimu; eelyo baalumi bana Gileadi bakabazunda bana Efraimu ibakaambide kuti: “Nobana Gileadi nomuli mu Efraimu a Manase, mwakatija buya kuzwa kulindiswe.” 5 Alimwi bana Gileadi bakasinka cito ca Jordano+ icili kumbele lya Efraimu; eelyo baalumi bana Efraimu nobakali kutija bakali kwaamba kuti, “Amundileke ndizabuke”; mpoonya baalumi bana Gileadi bakali kubuzya umwi aumwi wabo kuti, “Sena uli muna Efraimu?” Ikuti waingula kuti: “Peepe!” 6 bakali kumwaambila kuti, “Koamba kuti Shibboleti.” Pele walo wakali kwaamba kuti: “Sibboleti,” nkaambo tanaakali kukonzya ikulyaamba kabotu bbala eeli. Mpoonya bakali kumujata akumujaya acito ca Jordano. Aboobo bana Efraimu bali 42,000 bakafwa aciindi eeco.

7 Jefita muna Gileadi wakabeteka bana Israyeli myaka iili cisambomwe, kumane wakafwa alimwi wakazikkwa mumunzi wakwe mu Gileadi.

8 Musyule lyakwe, Ibizani muna Betelehemu ngowakabeteka bana Israyeli.+ 9 Wakajisi bana basankwa bali 30 abana basimbi bali 30. Mpoonya wakakwasya bana bakwe basimbi kubasankwa batali bamukowa wakwe, akuletela bana bakwe basankwa ibasimbi bali 30 kuti bakwate. Eelyo wakabeteka bana Israyeli myaka iili ciloba. 10 Mpoonya Ibizani wakafwa alimwi wakazikkwa mu Betelehemu.

11 Musyule lyakwe, Eloni muna Zebuloni ngowakabeteka bana Israyeli; wakabeteka bana Israyeli myaka iili kkumi. 12 Mpoonya Eloni muna Zebuloni wakafwa akuzikkwa mu Aijaloni mucisi ca Zebuloni.

13 Musyule lyakwe, Abidoni mwana wa Hilelu muna Piratoni ngowakabeteka bana Israyeli. 14 Wakajisi bana basankwa bali 40 abazyukulu bali 30 ibakali kutanta ambongolo zili 70. Wakabeteka bana Israyeli myaka iili lusele. 15 Mpoonya Abidoni mwana wa Hilelu muna Piratoni wakafwa alimwi wakazikkwa mu Piratoni mucisi ca Efraimu mucilundu camuna Amaleki.+