Babetesi
21 Lino bana Israyeli bakakonka ku Mizipa,+ bakati: “Kunyina muntu naba omwe akati kesu uuyookwasya mwanaakwe musimbi kumuna Benjamini.”+ 2 Mpoonya bana Israyeli bakaunka ku Beteli+ akuyookkala kubusyu bwa Leza mwini-mwini kusikila kumazuba, kabalila akoomoka. 3 Bakali kwaamba kuti: “O Jehova Leza wa Israyeli, ino nkaambo nzi cintu eeci ncocacitika mu Israyeli? Ino nkaambo nzi sunu ncokwabula musyobo omwe mu Israyeli?” 4 Lino buzuba bwakatobela bakafwuma kakucili kooko akuyaka cipaililo nkoonya ooko kuti batuule zituuzyo zyuumpwa azituuzyo zyalumvwano.+
5 Mpoonya bana Israyeli bakati: “Ino nguni akati kamisyobo yoonse ya Israyeli iwataboola kuzoobungana kubusyu bwa Jehova?” nkaambo bakapanga cikonke cipati cakuti kufwumbwa muntu watasika kubusyu bwa Jehova ku Mizipa weelede kujaigwa. 6 Aboobo bana Israyeli bakausa akaambo kacintu cakacitikila banabokwabo bana Benjamini. Bakati: “Sunu musyobo omwe wagonkwa kuzwa kubana Israyeli. 7 Ino tulacita buti kutegwa aabo ibakasyaala tubajanine bamakaintu, mbokunga twakonka kuli Jehova+ kuti tatukakwasyi bana besu basimbi kulimbabo?”+
8 Bakabuzya kuti: “Ino nguuli musyobo akati kamisyobo ya Israyeli iwataboola kubusyu bwa Jehova ku Mizipa?”+ Lino kwakajanika kuti kunyina naba omwe wakaboolede kuzwa ku Jabezi-gileadi kuzoobungana kunkambi. 9 Bantu nobakabalwa, kwakajanika kuti kunyina naba omwe wabantu baku Jabezi-gileadi wakaliko. 10 Aboobo mbungano yakatuma ooko baalumi basinguzu kapati bali 12,000. Bakabalailila kuti: “Kamuya mukanyonyoone bantu bakkala mu Jabezi-gileadi apanga, nobaba bamakaintu nobaba bana.+ 11 Mboobu mbomweelede kucita: Baalumi boonse, kubikkilizya amukaintu uuli woonse iwakoonana kale amwaalumi, mweelede kubajaya.” 12 Akati kabantu bakali kukkala mu Jabezi-gileadi, bakajana banakalindu bali 400, nkokuti basimbi batakalinoona amwaalumi. Aboobo bakabaleta kunkambi ku Silo,+ munyika ya Kanana.
13 Mpoonya mbungano yoonse yakatuma mulumbe kubana Benjamini ibakali kundomba ya Rimoni+ akubamba luumuno ambabo. 14 Aboobo bana Benjamini bakaboola aciindi eeco. Bakabapa basimbi aabo mbobatakajaya ku Jabezi-gileadi,+ pele tiibakakkwana pe. 15 Alimwi bana Israyeli bakausa akaambo kacintu cakacitika kubana Benjamini+ nkaambo Jehova wakapa kuti kube cibende akati kamisyobo ya Israyeli. 16 Baalu bambungano bakati: “Ino tulacita buti kubaalumi basyeede kuti tubape bamakaintu, mbwaanga bamakaintu boonse bana Benjamini bakanyonyoonwa?” 17 Bakaingula kuti: “Kweelede kuba lukono lwabana Benjamini ibakafwutuka, kutegwa kutabi musyobo uuloba mu Israyeli. 18 Pele swebo tatuzumizyidwe kukwasya bana besu basimbi kulimbabo, nkaambo bana Israyeli bakakonka kuti: ‘Ulisinganizyidwe muntu uukwasya mwanaakwe musimbi kubana Benjamini.’”+
19 Kumane bakati: “Amubone! Kulaba pobwe lya Jehova mwaka amwaka ku Silo,+ nkokuti Beteli nkoili kunyika, kujwe lyamugwagwa uuzwa ku Beteli kuya ku Sekemu alimwi akumusanza kwa Lebona.” 20 Aboobo bakalailila bana Benjamini kuti: “Kamuya mukayube mumyuunda yamisaansa. 21 Lino mwaakubona basimbi* baku Silo baboola kuzoozyana cizyano cakuzinguluka, mweelede kuyubunuka mumyuunda yamisaansa akujata aumwi kufwumbwa ngwayanda kuti abe mukaintu wakwe, mpoonya mweelede kupiluka kunyika ya Benjamini. 22 Lino kuti bamausyi naa banabokwabo bakaboole kutupa mulandu, swebo tuyoobaambila kuti, ‘Amutufwide luzyalo akaambo kabaalumi aaba, nkaambo tiitwakabajanina bamakaintu bakkwene mweelwe wabo ciindi cankondo,+ alimwi nywebo nomwatakabapa bana banu basimbi kakunyina kuba amulandu.’”+
23 Aboobo bana Benjamini bakacita mbubonya oobo, umwi aumwi wakabweza mukaintu akati kabamakaintu ibakali kuzyana. Kuzwa waawo bakapiluka kulukono lwabo akuyakulula minzi+ yabo akukkala mulinjiyo.
24 Aciindi eeco bana Israyeli bakatalika kumwaikizyanya kuzwa kooko, umwi aumwi kumusyobo wakwe akumukwasyi wakwe, alimwi umwi aumwi wakapiluka kulukono lwakwe.
25 Mumazuba aayo kwakanyina mwami mu Israyeli.+ Umwi aumwi wakali kucita kufwumbwa ncaabona kuti nceciluzi mumeso aakwe.*