1 Makani
13 Davida wakabuzyanya abasilutwe bazyuulu abasilutwe bamyaanda alimwi abasololi boonse.+ 2 Mpoonya Davida wakaambila mbungano yoonse yabana Israyeli kuti: “Ikuti naa ncibotu kulindinywe alimwi akuti kacitambulika kuli Jehova Leza wesu, atutumye mulomo kubakwesu ibakasyaala muzyooko zyoonse zya Israyeli akubapaizi alimwi akuba Levi muminzi yabo+ amacelelo aanjiyo, kuti baboole okuno batusangane. 3 Atukalilete Bbokesi+ lya Leza wesu.” Nkaambo tiibakalibikkila maano mumazuba aa Saulo.+ 4 Mbungano yoonse yakazumina kucita oobo, nkaambo makani aaya akababotela bantu boonse. 5 Aboobo Davida wakabunganya bana Israyeli boonse kuzwa kumulonga* waku Egepita kusikila ku Lebo-hamati,*+ kuti balete Bbokesi lya Leza mwini-mwini kuzwa ku Kiriyati-jearimu.+
6 Davida abana Israyeli boonse bakaunka ku Baala,+ ku Kiriyati-jearimu mucisi ca Juda kuyooleta Bbokesi lya Leza mwini-mwini Jehova, uukkede atala* aabakerubi,+ aawo bantu mpobaitila zina lyakwe. 7 Nokuba boobo bakabikka Bbokesi lya Leza mwini-mwini muŋola mpya+ akulileta kuzwa kuŋanda ya Abinadabu, alimwi Uza a Ahio mbabakali kweenzya ŋola eeyo.+ 8 Davida abana Israyeli boonse bakali kusekelela kubusyu bwa Leza mwini-mwini anguzu zyabo zyoonse kabaimba akulizya tuntimbwa, nsakalala,+ miyuwa,+ myeembo+ azibelesyo zimbi. 9 Pele nobakasika kucuumino camaila ca Kidoni, ŋombe zyakali kuyanda kwiiwisya ŋola, eelyo Uza wakalijata Bbokesi lyacizuminano ca Leza mwini-mwini kuti litawi. 10 Mpoonya bukali bwa Jehova bwakabukila Uza, eelyo wakamujaya akaambo kakujata Bbokesi,+ aboobo wakafwa mpoonya aawo kubusyu bwa Leza.+ 11 Pele Davida wakabijilwa kapati akaambo kakuti bukali bwa Jehova bwakabukila Uza cakutayeeyelwa; eelyo busena oobo bwiitwa kuti Perezi-uza* kusikila sunu.
12 Aboobo buzuba oobo Davida wakamuyoowa Leza mwini-mwini akwaamba kuti: “Ino Bbokesi lya Leza mwini-mwini ndilalileta buti kulindime?”+ 13 Davida tanaakalitola Bbokesi ooko nkwaakabede mu Munzi wa Davida, pele wakalailila kuti litolwe kuŋanda ya Obedi-edomu muna Gati. 14 Lino Bbokesi lya Leza mwini-mwini lyakali amukwasyi wa Obedi-edomu, lyakakkala kuŋanda yakwe kwamyezi yotatwe, eelyo Jehova wakazumanana kulongezya mukwasyi wa Obedi-edomu azintu zyoonse nzyaakajisi.+