bbuku lyakuti Sungwaala Kukubala Akukulemba iligwasya kwiiya kubala akulemba lyamwaigwa mumyaambo iinda ku 100

Lwiiyo Lwamu Bbaibbele Lugwasya Kucizyiba Kubala Akulemba

“Kuzyiba kubala akulemba ncintu ncayandika muntu uuli woonse, kupa muntu kuba anguzu zyakucita cintu cili coonse akupa kuyaambele.”—UNESCO.a

MALIPOOTI atondezya kuti bantu bainda ku 700 miliyoni nyika yoonse ibajisi myaka iili 15 akwiinda aawo tabacizyi kubala naa kulemba. Eeci cipa kuti kabatacikonzyi kuzyiba zintu zinji, kubikkilizya anjiisyo zyakumuuya zyakulilemeka izili mu Bbaibbele “zyakalembelwa kutuyiisya.” (Baroma 15:4) Aboobo, muzisi zili mbozibede, Bakamboni ba Jehova balabikkilizya abubambe bwakuyiisya kubala akulemba mupulogilamu yabo yakuyiisya Bbaibbele—bubambe oobu boonse tabubbadelelwi. Sena pulogilamu eeyi yazwidilila?

Amulange-lange mulimo wa Bakamboni ba Jehova ku Mexico, kucisi bantu banji nkobabelesya mwaambo waci Spanish. Kuzwa mu 1946, bantu bainda ku 152,000 bayiisyigwa kubala akulemba a Bakamboni, kumbele abalo basikuyiisyigwa baba bamayi. Mfwulumende yakatumina Bakamboni magwalo manji aakulumba mulimo ngobacita. Lugwalo lumwi lwaamba kuti: “Swebo toba General Board of Education twamulumbaizya akaambo kakugwasyilizya mukuyiisya bantu bapati kubala akulemba.”

Bana abapati bagwasyigwa apulogilamu eeyi yakwiiya kubala akulemba. Mucikozyanyo, ba Josefina bakajisi myaka iili 101 ciindi nobakalilembya mucikolo eeci ncobakamanizya mumyaka yobilo!

Nokuba kuti mwaambo waci Spanish nguubelesyegwa kapati ku Mexico, kwiiya kubala akulemba takucitwi buyo mumwaambo ooyu pe. Mu 2013, bantu babelesya myaambo iili 8 bakaiya kubala akulemba mumwaambo wabo kwiinda mupulogilamu eeyi.

Kwiiya kubala akulemba kupa muntu coolwe cakwiiya zintu zinji zipya. Pele kwiinda zyoonse, kwiiya kubala akulemba kugwasya bantu bamisyobo yoonse kucikonzya kubala Bbaibbele—ibbuku lizwa kuli Leza lyalo likonzya kubaangununa kukusyoma mizimo, njiisyo zyabukombi bwakubeja, alimwi abukkale bwakutalilemeka.—Johane 8:32.

a United Nations Educational, Scientific, and Cultural Organization.

WAKABAGAMBYA BAMUKWASYI WAKWE

Ba Daniel bakaiya mwaambo wakutambaika waku Mexico kubelesya ma DVD

IBa Daniel bakali basinkematwi alimwi tiibakali kukonzya kwaambaula kabotu. Akaambo kaceeci kanji-kanji bakali kutyompwa alimwi akunyema kapati kumukwasyi wabo. Ba Daniel nobakajisi myaka iibalilwa ku 23, Kamboni musinkematwi wazina lyakuti Josué wakatalika kwiiya Bbaibbele ambabo. Kumatalikilo bakali kubelesya nzila yakutambaika antoomwe akudulowiŋa. Mpoonya kwiinda mukugwasyigwa ama DVD, ba Daniel bakaiya Mwaambo Wakutambaika Waku Mexico.b

Ba Daniel nobakatalika kuzisyoma njiisyo zyamu Bbaibbele, bakatalika kuba “abuntu bupya” bwalo ibuboola kwiinda mukuba abube mbuli “lubomba, luzyalo, kulicesya, kubomba moyo alimwi akukkazika moyo.” (Bakolose 3:10, 12) Ba Daniel alimwi bakatalika kutobela lulayo lwamu Bbaibbele lwakumvwida bazyali alimwi akubalemeka. (Baefeso 6:1, 2) Mukwasyi wabo wakagambwa! Banyina baba Daniel mane bakalila, akulumba ba Josué akaambo kakugwasya mwanaabo kumuuya. Mu 2007, ba Daniel bakeelela kubbapatizyigwa akuba Kamboni wa Jehova.

b Ku Mexico, mabbuku aali 46 aa Bakamboni ba Jehova nkwaali aama DVD mu Mwaambo Wakutambaika Waku Mexico. Webbusaiti yesu ya jw.org, ilijisi makani aabalilwa ku 80 mumyaambo yakutambaika. Kutegwa boofwu bagwasyigwe, mabbuku nkwaali amu Braille.